Zanteleancheo Chuki Bhurgeancher Tapcheo Nhoi Natrancho mog ani apurbai dhor ek xemai-xepaichea kallzant tiglolo asta. Tanchea bhurgeanchim bhurgim tanchench rogot zaun aslolean, xepai-xemaim aplea jiva poros natranchi apurbai kortat. Ani oxe toren Lenny-k, tachea xemai-xepaicho upott mog melltalo. Ani eka disa natva ani xepai modim, oxe toren gozal zali….. “Baba Lenny, tuvem; tujea daddy-chea mai-paik pollounk nam nhoi? Tum zolmochea adich tujea daddy-cho maim-pai vo tujim xemaim-xepai Devachea ghorant pavlolim” “Oxem kiteak mhonntai papa?”, Lenny, aplea xapaik, papa mhunn voddkitalo. “Mhojea daddychea maim-paicho mog mellunk nam, punn mhojea mummychim avoy-bapui ajun mhaka donui xemaim-xepaicho mog unno korinant” “Tumchea ghorant, salantle vonttir tujea xepaicho fottu umkailolo asa” “Hoi, hoi. Mhojea daddycho pai sarko ‘hero’ ani maim samki ‘heroin’, punn ek sang papa; aiz derefent tancho ugddas tuka kiteak zalo?” “Baba”, Lenny-k kankeant ghevn zodd utramni uloilo. “Anik thoddeanch disamni hanv tankam bhettcho asam” “Mhonnchem? Tuka sorgar vochunk tunvem morunk zai nhoi?”. Lenny-k, tachea avoychea utranchi yad zali. Zonn eklean morun sorg pollounk zai. Dekun, tannem taka vichar kelo “Hoi” Xepaichem ‘hoi’ utor aikotanch Lenny-chea dolleant dukham ubzolim. Punn tannem xepaik gomoinastana thoinchea thoim dolle pittpittavn sukoilim. “Papa….”, “Sang baba” “Itlo vegim tum tankam kiteak mellunk sodta?” “Puta, mhojem duens vhaddot veta ani khoincha-i vellar amchea kopelachea torir asloli ghantt, mhojea mornnanchi khobor divnk toyar asa” “Papa, puro kor tujim fokandam. Tujean, mhojea viret ravunk zaina. Tea khatir, hanv sodanch tujea fuddeant aslolo zai tuka. Tujean mhaka soddun vochunk zanvchena” Luciano vo Lennycho xepai kankrache piddent khoxtovtalo. Tachi hi pidda nimnnea panvddear pavlolean to khoinchea vellar hea sonvsarak adeus kortolo, hem sangunk zai naslem. Innosent Lenny-k, tachea gombhir duensachi khobor nasli vo taka sanglearui tachea 7 vorsanche bhurge motik bospa sarki nasli. “Baba, Devachem apovnneank ami raji zaunk zai. Hanv nokom khoinchea vellar amcho sorgincho Bap mhaka tikett dhaddtolo poi to. Tea pasot, hanv tuka sangonk sodi, tunvem pollounk naslolea tujea xepaik ek chitt boroun mhojea koddlean dhaddun dilear hanv ti….” “Ti chitt tum taka ditolo?, grandpapachem sompchem adim to boddboddlo. “Albot ditolom………” Lennyn, fattim fuddem pollenastana ekuch dhanv ghora vaten marlo. Ghorant bhitor sortanch tannem vonttir umkovtolea xepaicho fottu kaddun sofar dovorlo. Avoichea rumant vochun arso haddlo ani xapaichea fottva samkara ubo raun arxean pollunk laglo. Ek kadern ghevn chitt borovpak survat keli. Mogall…(chintlea uprant) Grandpa, Hanv Lenny….tum mhaka vollkocho nam. Hanv tuzograndson. Borem…borem. Hi chitt tuka ditolea koddlean, tum taka vichar hanv konn poi to. Ani to tuka sarkem sangtolo. Grandpa, mhozo daddy sodanch mhaka sangta hanv tuje bhaxen distam. Xezarcho lokui toxench uloita ani odik korun Sakrament aunty mhaka ghott vegent dorun mhonnta. “tuka sogllem xapaichem ailam.” Amchea ganvant tum hero aslo mhunn, futtfuttun Clementin ani Rosa timaim uloilolem hanvem aikolam. Posrear veche vatter aslolea ghorantlea tarvotti onkolachi bhoin Magdu mhojea nanvan mhaka voddkinam. Ti mhonnta, “Lambert mure. Posrear veta?”. Ganvantli voijin mavxi ballont zalolea novea bhurgeank tujem nanv ghalunk suchoita. Konnagherui saibinnink vo ladainik ghelear zanteleo ostoreo Lambertachea atmeank ek Amchea Bapa ani Noman Mori mhonnon, magnnem sompoitat. Ganvcho ani xezarcho lok tuji vhoddvik uloita, punn mhoji mammy mat, tujem borem uloilole hanvem keddnanch aikunk nam. Mhozo daddy tika sapuch biyeta. Ken’na ken’na tanchem modim tanv-tinv zata ten’na, ti mhonnta “hanv biyetam amcho put tuje pai bhaxen zait mhunn”. Argam Devak. Ti tumchea ghorant pavche poilich tunvem sorgar poll kaddli mhunn. Poir tedus amchea angnant khelltalom. Xezarchea ghorantlim bhurgim amchea lamb rund angnant khellunk yetat. Tuka khobor asa vo nam hem hanv nokom. Xezarchea ghorant choddan chodd cheddvam bhurgim asat. Chedde bhurge bhov thodde. Cheddvanchi majority zatolean mhaka dusro upai nam zaun tanchea vangdda khellchem poddta. Mhoje mammy-k hem borem lagona . Ani porchea disa ami kabaddi khell khelltana tea cheddvamni mhaka dotorer add ghalun dorlo ani buskavpak laglim. Konn eklem mhozo hat oddta, konn eklem paim oddta. Konn tokli poseta ani konn polle chimttaita. Mhojea mammy-n pollelem. Tinnem mhaka bhurbhurit oddun ghora haddlo ani ekuch kana sokoll vazoun mhonttlem: “Xepai bhaxen hero kombekar zatolo?” Tunch sang ga. Hem tichem sarkem? Tujea lapittponnanchi mhaka kiteak sojea? Lino B. Dourado