Assalamu'alaykum w.w.
puntiang talatak di hulu, dibawah kiliran taji
dirundiang asa dahulu, tigo limbago nan tajadi
paratamo sambah manyambah, kaduo baso jo basi, katigo siriah jo pinang
sambah manyambah dalam adat, tali-batali dalam undang
tasabuik bamuluik manih, muluik manih pangarang baso
budi baiak tali pikatan, banamo adat sopan santun
tumbuah sarupo iko kini, basiang ateh nan tumbuah
ikan banamo ikan bilih, sisiak batatah asuaso
mangaji ambo nak dari alih, babilang ambo nak dari aso
rajo aceh di tanah kapah, siba banti kiri kanan
panghulu ambo nan gadang basa batuah,
bak mangkuto manganduang intan
Kok pai tampaik batanyo, nan pulang tampaik babarito
nan ibaraik baringin gadang ditangah koto, nan baurek sabana tunggang, nan
badaun rimbun manjulai, kok ureknyo tampaik baselo, nan batangnyo tampai
basanda, tibo didahan tampek bagantuang, rimbun tampaik bataduah jo balinduang,
bataduah dihari hujan, balinduang dari kapanehan, tampaik si budak bamain
tondeh, tampaik sikayo bamain padang, tampai simiskin baibo hati, tampaik nan
barado basanda gurau
Rumah adat dipaga ruyuang, buatan tukang indo jati
alim ulama tangah kampuang, suluah bendang dalam nagari
siangnyo rintang ba pituo, malam tibo baibadat, nan mangatahui halal jo
haram, sarato sunat jo paralu, nan mambuka jalan ka sarugo, manutuik jalan ka
narako, nan salalu bakato bana
taruih kapado cadiak pandai, palito dalam kampuang, palito nan tiado padam,
urang nan cadiak tahu jo pandai, cadiak nan mamakai pamikiran,
tahu nyo inyo jo manenggang, manenggang suok jo kida, jaleh dihereang dengan
gendeang, mamakai raso jo pareso
Pandai dek inyo malalukan, arih jo urang ka tasingguang, jalek dek inyo urang
ka talendo
Didalam lingkuang salam juo, iyo kapado bundo kanduang, bundo kanduang
limpaeh rumah nan gadang, kaunduang-unduang ka madinah, ka payuang panji ka
sarugo, sumarak dalam kampuang, jadi tauladan dalam nagari, kok hauih tampaik
mintak aia, tampaik mintak makan katiko litak.
indak lupo kapado rang mudo, rang mudo pandidiang dunia, nan capek kaki
ringan tangan, capek kaki indak panaruang, capek tangan indak pamacah.
sarapeknyolah kapado hadirin nan hadir di milling list nangko, ketek nan
indak basabuik namo, gadang nan indak ambo imbaukan gala, sambah jo salam ambo
jalangi
Duduak surang babulek-i, duduak basamo bapaiyokan, tumbuah nan sarupo iko
kini, nak ambo cubo manyampaikan, nan takana di hati, takilan dimato, iyo
satantangan :
Bakarih si Katik Mudo
Talatak di biliak dalam
Ratak sabuah jadi tuah
Jikok dibukak pusako lamo
Dibangkik tareh nan tabanam
Lah banyak ragi nan barubah
seni budayo tanah aia
lapuak di jaman panjajahan,
kini kok lai jadi buah pikia
samo di dalam panggalian
untuang kok lai sampai nan di niaik, pacah juo nan di ama, iyo nak ka
maadokan acara Bagurau, di Bogor pado tanggal 20 Mei 2006, nan acarano adolah :
- Randai (dicubo manngatangahkan randai nan lah babarapo bulan ko lah babukak
sasaran di Bogor)
- Saluang jo Rabab ( disampiang saluang klasik, insyaallah nanti,saluang
nantun juo akan dikolaborasikan dengan Rabab, Accordion, Bansi, Sarunai dan
organ)
- Gamad
- Biaso, kalau dalam pementasan randai, tantu ado pulo parintang jo
pamenanno, Insyaallah, lah siap pulo jo tari piringno
Limbak nan dari pado itu, kok jauah indak ta jalang, nan ampia indak taturuk,
surek sapucuak indak talayangkan, siriah langkok dalam carano indak tibo,
iyo... mamintak ambo dengan sambah sarato, ambo padokan sajo kaba nangko, nak
manjalang jo manuruk niniak mamak, alim ulama, cadiak pandai, bundo kanduang
sarato rang mudo, untuak maluangkan wakatu, maringankan langkah, nan mahadiri
cara BAGURAU nantun, ba pulang maklum tantang itu
Nan pintak biaso buliah,
Kandak biaso bapalakukan
Raso taubek panek jo jariah
Dek lai datang urang maramikan
sakiro itu nan dapek kaba ambo sampaikan, untuang kok lai tacapai juo niaik
nan di hati, rila jo maaf ambo sampaikan, jikok tasuo di nan indak, batamu di
nan bukan
Wassalamu'alaykum w.w.
Bandaro Labiah
Send instant messages to your online friends http://uk.messenger.yahoo.com
--
Website: http://www.rantaunet.org
=
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=
