Facebook | | | Facebook | |
| Dusreacho Fondd Khonnttana...Bastora vochpache vatter aslo. Sangatak tachi ghorkarn’n ani Kuwaitkarn’n‘cousin sister’ asli. Tin rosteancher pavchea adim vegan dhanvtoli gaddi sovkas keli ani ubea rosteavelea vahanank vatt ditana tachi gaddi fuddem aslolea mottor-saikolik tenkli. Gaddi cholovpi gaddientlo bhair sorun mottor-saikol topasli ani koslench luksannak pavpa titlem kainch zaunk naslolean tannnem mhonnlem. “Sorry ham! Chuk zali” “Chuk zali? Chuk kiteak zali?”, Mr. Mottorsaikolkaran challvollun vicharlem “Gaddi sovkas korun donuim vattamni polletana matxe mottor-saikolik tenkli. Chuk zali”, anik ekdam khalteaponnan Mr. Gaddiekaran mhonnlem. “Chuk koxi zali? Chuk kiteakuch zali? Chuk zaunk favo nasli. Tum kiteakuch chuklo?”, chuk bhogsunk toyar naslolea porim Mr. Mottorsaikolkar uloilo. “Sanglam nhi chuk zali mhunn. Orxim zalear tuje mottor-saikolik luksann zalolem nam. Tuka dista’demage’ zalea zalear, hanv duddvancho khorch farik kortam” “Duddu? Duddu mhaka nakat. Mhojea lagim zaite asat. Hanv tarvotti. Mhaka ekuch sang. Tujea lagim chuk kiteak zali” Chuk kiteak, koxi, kiteakuch zali portean portean gayan vazoita mhunn, gaddient aslolea Kuwaitkarn’nichea mostokar tiddok choddli. Tem gaddientlem bhair sorlem ani soroll mhonnlem.“Hey! Tujem kitem zalam? Tannem apli chuk zali mhunn sanglam, luksann-khorch ditam mhonnlam. Tori astona tujem pemprem bond zainam? Sang tuje mottor-saikolliche poixe. Hangasorlem halonastana duddu meztam” Tarvotteachi mottor-saikol kochro zalolea porim sottasott molaun duddu farik korunk toyar aslolem mamachea cheddvak, ‘cousin brother’ ojeapun polleunk poddlo. Kestanv fuddem vhorunk taka naslem. Punn, Mr. Mottorsaikolkar sozmoneche laikicho matui naslo tea khatir tannem mhonnlem. “Chukun zal’le ghoddnnuk tum bore baxen mittounk sodinam tor, odik borem vahatuk pulisek apoilear” “Naka,naka. Pulis naka. Hanv gunddank apoitam” “Gunddank? Barikxea apghatacho panchnama kortole te?”, Kuwaitkarn’nin thapun vicharlem. “Chuk kiteak zali tem sangonant tumi. Chodd uloitat. Dakhoitam tumkam”, Mr. Mottorsaikolkaran aplea mobailache ankdde chidd’ddile ani tin minttam somptam mhonnlear don skutorincher ailole char monis thoim ube zale. Chougantlo ektto hevtten-tevtten pollet Mr. Mottorsaikolkarachea dixen ghelo ani vicharlem “Khoim asat ghanttim?” Bott dakhoun mhonnlem. “Oto monis gaddiek tenkun asa to subeij uloita. Dusrem, sungttam porim usollta. Gaddi mhojea mottorsaikolir marli. Chuk kiteak zali tem mhaka zannam zaunk zai asli, punn to sot ulounk toyar nam.” Gaddievaleak tannem vollkhilo ani tachexim vochun taka mhonnlem. “Kamil tum? Hanga kitem korta?”, taka hat dilo ani tachea cousin-sisterixim vochun tika vicharlem. “Maria, ken’nam ailem Kuwait thaun?” “Kalchea Budhvarak” “Sullsullit dista” “Thanks for compliments. Punn Kistod, tuka polloun gondollak poddlim hanv” “Kiteak Maria?” “Gundda zala mhunn” “Maria, kitem uloita tum? Hanv gundda? Konnem sanglam tuka” “Kamilachi gaddi matxe mottor-saikolik lagli. Fattim fuddem pollenastana ani topasnni korinastana, oto pott bhair sorlolo dholko, boddboddunk laglo. Koxi chuk zali, chuk zaunk favo nasli. Koxich zali ti sang. Hanv gunddank apoitam…” “Remet hanga yeo. (Remet tachexim ailo) Tum haka vollkhotai? Nam mhunn tokli haloinaka. Atam vollokh korun ghe. Kamil tache nanv. Tuje osle pondra-vis lok tachea hatakal kam’ kortat. Ekuch fon marun challis gunddank hanga apovpak Porvorimchea challisui Amdar-Montream sovem tachi vollokhh asa. Tuvem kitem mhonnlem? Gunddank apoita? Ami tuka gundda distat dolldirea?”, Tannem tachea khumsak dhorun ekuch dhopko diun sat metr pois xevttilo. Zomnir poddlolo thoinsor vochun tachea golleak dorun ubo kelo ani kansular don vazoilim. Panvom ubarun khonttamni marpa vellar Kamilan mhonnlem “Kistod naka-naka please! Toxem korinaka. Tachi chuk zali” “Aik. Aik tachem. Churchurlo to tuka. Tannem sorry magli astana, koxi ani kiteak chuk zali hem zannam zaunk zai kutrea? Tujea lagim ken’nanch chuk zali nam? Don-tin viajiche duddu tujea tokler choddleat?” “Mhoji chuk zali Kistod. Mhaka maf kor” “Kan ugte korun aik. Gõyant bhailo lok disan dis choddot asa ani Gõykar unno zait veta. Jinsavar kauz zalole ami vachleat ani aikoleat ani polleleat. Bhailea rajantlo tourist, sorea nadar thollavea loka lagim kestanvam ani kizilam kortat. Jive martat. Gõykarank, Gõychea pulisancher visvas tuttun poddla. Aam aadmi mon’xank nit mellonam, ekach utran; adle sobit mankulem Gõy, kaidea vinnem zalam. Dekhun, kaim zann borea monan fuddem sorun somaz sevokachea axirvadan ami ek pongodd kela ani taka nanv dilam ‘Goa Protectors’. Bhailea lokan Gõyant yeun amchea lokacher dadagiri choloilear, ‘Goa Protectors’ tankam dhomki diun vo goroz poddlear pulis FIR korun kadoyen bhitor uddoupachi vevostha keleli asa.” “Chuk zali Kistod. Sorry?” “Tuka sanglolem, bhailea lokan tuka gorje viret trass kelear amkam kollit korchem. Tuje dolleancher duddvachi chorbi dhattayen mandlea ani Gõykar bhav tuka gantti disunk lagle...?Lino B. Dourado. Lapitt http://aitaracheokaskuleo.blogspot.com/
