Angovnno Puri Kortanam…
Khorea bhavarthan magloli vost tuka melltoch, tuvem kel’li angvonn potram-masikancher porgott korta. ‘Hea’ bhokt-santak, ‘te’ saibinnink kivam khursa udexim tunvem maglole upkar tuka favo zale mhunn, Devak din’vasun angvonn palltta. Thodde lok (onbhavarti kai?) angovnno kortana, ‘barter system’-a porim kortat. “Tunvem mhojem kam’ kelear, hanv ladain kortolom/kortolim ani potrancher porgotolom/porgotolim’, oxe toren; ek kontrad soi ‘hea’ ani ‘tea’ bhagevontam sovem kortat. Tum mhaka di, hanv tuka ditam. Halinch bhair sorloli Jose Rod-achea ‘GOVAI’, nove cd-intlem ‘Puri Korat’, kantar aikotana, ekdam vhoile vichar mhojea monant gusle. Gavpi Jose Rod, gitantlean ek sondex dita. Angovnno kortolean, (angvonn kortolo/kortoli somplim zalear) tanchea ghorcheamni ti puri korchi. Tagelem kantar aikotam-aikotam, hanv hea nirnoyar pavlam. Bhokt-Santank, Saibinnink ani Khursank angvonno kortanam, angvonn kortolo bhasavnni dita. Maglolo upkar dilo zalear (vhoir sangleam te toren, barter system) ladain korun vo potrancher jahirit ghalun, upkar attoitolom/attoitolim. Hem borem asa! Tunvem maglam toxem korpak, tumgeli itsa. Amchi addkoll? Nam!!! Punn? Khorea bhavartant magloli vost, Dev dinastona ravona. Dar bodoi dar ugoddtolem. Mag ani maglolem tuka melltolem. Hem amchea Povitr Pustokant vachunk mellta. Toxench Kristi dhormik pustok amkam ek ugddas korta. Bhorlolem pott borchea svatter ritem pott bhorlear, bhukelolo tujea upkarant sodanch astolo. Oxem tor? Amcheo angovnno bhokt-santank, saibinnin kivam khursak kortanam, angovnneo korpi durboleanchem kiteak chintinam? Thoddea bhov lokak ghevn kirtanam ghaichea bodla, maglole upkar favo kortolea bhagevontachea nanvan onath vo ashramant aslolea bhurgeam sangata, Devan dilolea upkarache zoi-zoi gavun, tanchea dukhi mukhamollancher hanso haddlear koso? Angovnno kortoleanim niyallchem! Lino B. Dourado
