Damião Tantiakaranchim Tantiam -Tuka boreo ruchi yetat. Hem kor ani tem korun di mhonnta to, kanddeachi dor mollbak tenklea. Zannam mu tum? Hamlet korpak kanddeachi goroz. Kando 80 rupiancher pavla. Tantiancho dozon, 42 rupiancher asa. Char anneachi kombi ani bara anneancho masala zalea porim Avoychi boball aikun sokallchea nosteak hamlet khanvchi ruch Poptik ailoli ti, jironn gheli. Tachem tondd bavllem. Unnem pagar asloleancho gholo mhargai fugar korta zalear, Poptichea avoyk kanddeacho kosloch prat toyar korpak sangxi zalear, bexttich tiddok choddta. Nosteak tinnem chopati toyar kel’leo, punn Poptik chopateam borobor hamlet zai asli. Avoychea fuddeant koslench xanneponn kivam teimosponna cholonaslim. Tichem utor xevottachem ani discussão korunk zai naslolem. Popticho bapui porian tichea koddok kaideank biyetalo. Avoycho denkso aikun, Poptin man khala ghatli ani nitt vochun jevnnachea mezaxim boslo. Avoy dita tem khavpachem. Itlech!!! Avoichem kalliz tem. Sodanch aplea bhurgeam sovem oddtta. Ekloch morgad put. Poran ekui zap kaddinastona ogoch thoinsorlolo koddsorlolo pollevn, tichem kalliz hall’lem. Itli sogott duddu ani gireskay konna khatir? Tika monaposond vichar… -Ghorant tantiam nam. Ghe he poixe ani tantiamgher vochun tanttiam hadd. Porachea bavlolea tonddar amurko hanso ful’lo. Avoyn dilole poixe hatant poddtanch, to sottasot boslolea koddelivelo utthlo ani ekuch danv bhair marli. Ganvantlo Damião, ganvtti-kombi tantteancho dhonddo choloitalo. Dekun taka nanvuch poddlolem, ‘tatiamkar’ vo ‘tantiamgharager’ Tantiamgharager vetolo zalear Poptik, unguarded railway crossing par korchem poddtalem.Hamlet-echi ruch kaddit-kaddit, Popti, saikolichim pedalam martalo. Osoch to umedin saikolinchim peddalam marit vetana, pois thanv tannem, Damião tantiakarak pollelo. Tovuiunguarded railway crossing-a lagsar pavlolo. Dusre vatten, Mumbaim thavn yetoli aggaddi votrain vegan yetali. Damião tantiakarak kannanim borem aikopak yenaslem. Dekun, Popti;train yeta ani lagsar pavlea mhunn taka kollit korpak, angant asloli titlich xokti ektthaim korun mottean avaz kel’lo. Punn to avaz bherea kannar nam poddlolean, trainin, saikolisoit Damião tantiakarak xevttun marlo. Sogloch gaborlolo ani uloitana koddkoddun ani roddun eksarko fugar zaun, Damião tantiakarachi marrekar obseogachi dukest khobor avoyk sangtana…... -Tache paim eke kodden. -Deva oslem moron konnank nirminaka, avoyn mhontlem -Tache hat ambea zhadda lagsar poddlole -Bogum, hem marrekar moronn taka favo nhoi aslem. Avoy churchurli. -Pottachem banddem ani antkoddeo hanga thoim ximpoddloleo -Koslem moronn Saiba? Xinn korun ti uloilii -Tachi tokli xembor metr pois poddloli. Kistod onkolan (titiv) sodun kaddli. -Ani tantiam? -Tache paim, hat, pottantlem ani tokli hanvem pollelea. Tantiam mat pollenvk nam. Lino B. Dourado
.
