Devak, Mobile Fonachi Goroz Asa?
Dhormik babanim itlem saglem astanam, Povitr Misachi bhettovni choltana, Igorjent mobile fon kiteak vaztat? Ani hachem kharan, amche ixtt Lapittak ghelea Aitarak gomun ailem. Mis chalu astana mobile fon vaztat ten’na, Lapitta osle devbhoktti prannichem Mis piddear zata. Oxem ganvche Igorjent cholta mhonnon, ghelea Aitarak Lapitt, tachea ixtta sangata xarantlea igorjeant Misak ghelo. Vellar Misak pavpak, matso vell zall’lo. “Dev amchea thaim uloita”, Pativacho xermavn chalu aslo. Lapittan kan fuloile. “Bhurgeamno, sovnsar adhunik zala. Amchea thaim atam mobile fon asat. Tacher zaite torecheo messages yetat. Calls yetat. Kitlea torechim kollam asat? Pativan, bhurgeank proxn ghatlo. Xarantlea igorjent vetolea bhurgeanchem khub oprub Lapittak dislem. Zitle pavtti sermanvan pativ vichar kori, titleach pavtti bhurgim uxearkayen zabab ditalim. Ek eklean zap divn sanglem. Receiving calls, dialed calls, International calls, local calls, blind calls, missed calls. Jitleo mobile fonar sovloti astat, titleoi tannim ek- eklean sangun kaddleo. “Ani koslem call asa? Bhurgim ogi poddlim. Sorbhovntim nodor marit Lapittan hat ubarlo, ani mhonnttlem. “Death call”. Tacho avaz Pativachea kanar poddunk nam. Kiteak to ani tacho ixtt fattlea daraxim ube asle. Punn azu-bajun aslolo lok taka polloit bhitorlean hanslo. “Shuuu. Ogi rav”, ixttan taka xiddkailo, ani, thoddea vellan luhan vicharlem “Death call mhonnttlelem kitem re?” “Tin-char pavtti mobile fon vazlo ani zap dina ten’na somzuchem to monis melo” Lapittan sanglem. "Heach toren Dev amchea thaim uloita. Nhoi mobile fona velean ponn…..” “Dev sarko durboll kitem? Mobile fon ghevnk zaina?” Xermavn chalu astona Lapittan vichar kelo. Tacho ixtt taka tirxea dolleani pollevnk laglo “Dev amchea darar marta. Dev amkam zagoita ani utoitta?” Pativan avaz motto kelo. “ My dear children, God calls each and every one of us personally…….” Oxem pativ mhonnta thoinch aslo, konna ekleacho mobile fon vazlo. Ganvche igorjeant fon vaztat mhonn xarantlea igorjent ghel’lodevbhoktti porot disturb!!! Itki thidok taka marli, ragan mhollem. “Please switch off mobile phones” “Chup! Ogi rav”, Lapittacho ixtt taplo. “Toxem mhonnom naka” “Kiteak?? “Aikunk nam tunvem pativ kitem sangta tem? God calls us. Taka Devachem mobile call ailam” Lino B. Dourado
