Kavlleankui Rong Asa http://groups.yahoo.com/group/gulf-goans/message/35294 Mhojea kallza merecho ixtt to. Tancha poilea putacha batizmank hajir zal’lom hanv. Taktiken vo poilim kollit korinastona avchit tannem mhaka, saud ubarpak poratlem. Tagelo khaxello soiro padribab, saud ubarunk yevncho aslo. Okosmat tacho bapui duent zavn hospitalant vorcho poddlo, tea khatir to pavunk nam. Velluch divnk nam mhaka. Koxem ani koxi saud suru korchi tem hanv chintunk poddlom. Khoim tori hanvem ek daktixi istor vo kanni vachleli. Vachop kitlem gorjechem ani keddnam-i tori upeogak poddta mhunn, tea disa mhaka kollun ailem. Adim vachlele istorichem sottasot kollponnink vorixtt lhar mhojea menddvar aptolem ani hanv saud ubarpak eksarko toyaren astana, konnem tori mhojea hatant mike dilo. Zomill’lea lhan bhurgeancher nodor marit mhojea stylin, saudik survat keli Bhurgeanno, daktto por bab Newton kaim vell adim, amchea Kristi dhorman bhitor sorla. Dekhun, ami sogott taka yevkar divnk hangasor ekthaim zaleant. Khorem mu?”, (Batizmanche kekixim sorbhonvtim ubim aslolea bhurgeank hanvem vicharlem. Bhurgim aka-taka polloit gunngunnunk laglim, punn konnei-i eklean zap keli nam) Bhurgeamno, hanv tumkam ek kanni sangttam. Sintid divn aikat. Ek dis kavllean, lhan pillank khatele gonnink sanglem “Polle gonni, ho poi dista tea ghuntteran, mhojim sobit ani sundor poram nhidlelim asat. Tankam khavum naka.” “Borem khavllea. Tum sangtta te toren tujim poram dixttat zalear hanv khorench tankam khanvchim nam”, oxem kavlleak vachan vo soput divn gonn aple xikarek udon gheli, ani kavllo aplea pillank khavoll sodunk ghelo. Gonn xikarechi bhonvddi martana tichi nodor kavlleanchea pillancher tharli. Bhurgeamno, hanv ek vichartam. Tumi kavlleacha lhan porank polleleant? Hek. Xi! Hollxig distat tim. (Mhojem tondd ambott korit uloitana, thoddea bhurgeanchem tonddam bavlolea porim zalim.) Keddnanch pollenakat. Khub mhellim vitt haddpa sarkim kavllea pillam tim. Gonnin kitem kelem? Ekuch zompoi marun kavlleachea pillank khailim. Kavllo bhurgeank khavoll ghevn ailo. Punn, tachi poram thoim dislim nant. Khub dukhlem taka. Dollean dukham bhorlim tachea. Tiddok choddli ani gonnink sod-sodit tika vicharlem. “Hey---y. Lhan poranche churchure naslole dolldire gonni. Tunvem mhaka sanglolem mhojea porank khanvchi nam mhunn. Sang mhaka, mhojea pillank kiteak khailim? “Tunvem mhaka kitem sanglolem khallea rongachea kavllea! Tujim poram khubuch sundor ani sobit distat mhunn. Punn hanvem khaileant tim burxim, ghannairim ani pollevnk sapuch mhellim distat toslim pillam” “Avoy-bapay-k aplim bhurgim burxim, panglim, kudd’dim, berim, moni nam astat mhunn, hi tuka khobor nam gonni? Koslem-i bhurgem tem zaum, avoy-bapaychea nodrek tim sodanch sundor astat. Oi ki na?”, Kavllean bhouch dukhi zavn vicharlem. Bhurgeamno hi lhanxi kanni amkam kitem xikoyta? Khorench, avoy-bapaycha nodre mukhar tanchim bhurgim sodanch sobit ani sundor astat. Tim bhurgim panglim, berim, monim, kudd’dim vo ani koslem-i tem zaum. Avoy-bapaychi ti ek vhodd molladik gireskai. Ani aiz Kristi dhorman bhitor sorlolo bab Newton , tachea avoy-bapayk zavn asa…………” Mhoji saud sompoun hanv kodelir bosunk vocho. Itlean eka lhan bhurgean mhojea hatak dorlo. Tacho katicho rong kavllea itloch aslo. Khub kallo kollso diso. Punn dant mat chokchokit dhove asle. Tachea angar aslole kopdde gomoytale, tacho avoy-bapui duddvamni boroch astig asa mhunn. Sumar 7 vo 8 vorsam pirayecho aslo to. Mhojea samkarakuch aslole kodelir to boslo ani mhontlem “Tuji story, mhoje mummy-k bori lagli” “Ani tuka”, hanvem vicharlem “Titli nhoi” “Kiteak?” “Mhojea katticho rong khallo aslolean, boroborche bhurge mhaka kavllo hea nanvan mhojeo moskori kortat” “Polle baba. Mhoji kanni tuje mummy-k ekdom bori lagli. Oi? Hatuntlean mhaka somzunk zata tuji avoy tuzo khub mog korta mhunn. Tuje katicho rong kallo zait, punn tujem kalliz mat mollbantlean poddpi jhela porim dhove nitoll asa mhunn gomtta. “Kiteak oxem mhontta tum?”, poran proxn kelo “Itlea bhurgeam modim tum ektoch mhojea sorxim yevn tujea avoychi avodd ani tujim bhitorlim bhavnna mhaka ugti korpak. Khorem mhonllear, kallo rong soglleankuch avoddta. Na tor polle. Heach vosrean kitlo lok kallim angostram nhesla poi to. Khallem nhesop atanchem fashion zalam. Monis kallo, dhovo ani mhojea porim brown katicho zalo oxem kaim nam. Punn, mon’xancho sobhav ani kornneo mat kkalleo zaunk favo nant. Tujea katticho rong khallo asa mhunn, tum niraxi zainaka. Amchi Konknni kogull bai Lorna, ticho katticho rong koslo? Dhovo? Nam nhi?. Punn ticho suadik tallo soglleankuch pixear kaddtta. Tiche katticho rong pollevnk lok yena, punn ticho tallo aikunk lokachi godd’di zata. Survatek te aiz meren bai Lornank, Devan dil’lea gavpacha denneam vhoir lok uloitat ani nhoi tiche katichea ronga vixim. Amchea samkara bosleleank polle. Avoy-bapui ani tanchi ektich dhuv. Kitlem sobit dista tanchem lhan por. Ticho katicho rong? Tujea bhaxen kallo nam nhi? Zannaim tea choliechi kanni………?” “Sanglea viret koxem kolltelem…Mister… tujem nanv kitem?” “Lion uncle mhontlear zata. Te choliecho avoy-bapui mhozo vhodd ixttam. Ektich tanchi apurbayechi dhuv. Kitli sobit dista ti polle. Punn?” “Punn? Punn kitem zalem Lion uncle. Please sang nhoi?” “Tum niraxi zata tujea katicha rongak. Her kuddicheo vostu Devan tuka chukoinastana eksarkeo dileat. Te choliek rup dilam, punn ulovunk jib ani aikunk kan nant. Ti zaun asa….” , mhojem fuddlem aikum nastona to koddelivelo dhenvun cholot ghelo... Lino B. Dourado