AMCHO AVAZ - Rongit satollear 23-11-2013, pan 10 uzvaddak ailolo lekh http://www.readwhere.com/read/188909/Amcho-Avaz/Amcho-Avaz#page/10/2
Lapitt Utodd’dekar, ‘Marathi’ Shikaat Aahe. Lapittan, Borkar Book Stall-ar thanv, ek mullavem Marathi (basic Marathi) pustok, viktem haddlem. Pustok haddpachem karann mhonllear, halinch Gõyche mhalgodde budvont Romivaleamni, Morathivaleancho adhar ghevn, Konknni Romi Lipi vangdda Marathikui fattlea darantlean Rajbhaxecho dorzo divpachem chintlam. Mhuntoch, fuddarak Gõyant Marathi-chi goroz poddtoli. Hem lokxant dovrun, Lapittan; soroll Marathi xikpachem kelam. How are you? - thu kasa ahes I am fine - mi tik ahe. What is your name? - thujha nav kay ahe My name is Lapitt - mazha nav Lapitt ahe What are your plans for tonight?-Aaj rartvree kaay karatnaa-r? I am invited to a Kaju feni drink and dinner by my long time friend Popti Anton - Maazhyaa ekaa junyaa mitvraane Popti Anton Kazu feni pee-ne aani jewaayalaa bolaawale ahe Ani oso dhean divn zoran Marathi patt xiktana, ‘Ang Mhojem Poi’ eka Konknni cholchitrantlem kantar gavunk laglo. Taka dislem, hem famad Konknni kantar Marathi bhaxen onnkar korchem. Ani tannem borounk suru kelem. Liknnen, hanga-thoim, chukeo distaleo. Ganvantlo Marathixallentlo Mastor Nakash, zagear ghaltolo. Punn sod’deak, gavuntori polloum-ia? Oxem monan chintun, golleancho pitch ekdam zagear haddun, gavpachea lohor-ar (mood) ailo. aang mhaajhe bagh pan hath laavunaka vonth mhaajhe bagh pan chhumb ghevunaka ie ghari, ie ghari, ie ghari, ie ghari ghar mhaajhe bhag pan daar toddunaka. Donparchea jevnnachi uttavolin toyari kortolea ghorkarnichea kanar, Lapitt gaitolea poddacho avaz boslo. Sonxea porim tinnem apnnale kan fuloile. Thoddo vell adim ‘ang mhojem poi’ ghaitolo monis kitem kai mhollear ‘aang mhaajhe bagh’ gavunk laglo.“Okosmat haka kitem zalem kai?” Tonddantuch gunngunnun, kuznantlem kam’ soddun kuddachem dar ukttem korun taka pollelear...? Jem tichea toklen khorzotalem, tem sarkem thirlem. Tichem kalliz hodd’deantlean bhair poddtta kai dislem. Kitloch vell, ticho bhitorlo svas bhair sorunk tras zale. Tichem pãy zhodd zale. Ani ghusmottun roddunk lagli. Aiz thavn ticho sonvsar sompta kai dislo. Itlea vegim ani oxe toren dukhachea sagorak fuddo korunk, koxench tika puttvonaslem. Lapitt, apnnalea sonvsarant gul’l zal’lo aslo. Arxea samkara ravun kamra haloit ‘aang mhaajhe bagh’ git gaitalo. ‘Vonth mhaajhe bagh’ mhunntana, to arxeak chumb ditalo. Taka khobor nasli tachi ghorkarn, tachem natok polletali mhunn. Ti lohu thoimsorli koddsorli, ani dusrea kuddant vochun fonache ankdde ghuvnddaile. “Hello Babush, mhojea bhava (roddta).. Zata titlo vegim amchea ghora kodde yeo re (roddta)… Tujea kuneadan toklecho xok’k ghetla..(roddta)… Lapitt-achea dhakttea bhavak vo derak fon kortana…. “Hello. This is mental hospital. Can I help you?”...fon-ache ankdde chukle. Tevui-i zalear khuim mhunn vochun bosle? Pixeam hospitolant? Tichem presanv choddlem....Ani ordem vor sompta mhollear mottoram skuttori ani rikxanchem pursanv Lapitt-achea ghora samkara eksarkem thamblolem tem, tannem zonelantlean pollelem, Mevnno ani tachi ghorkarn. Mevnni ani tigelo ghorkar. Bhav ani tancheo ghorkanim. Mavxi bhoinn ani ticho poti. Itli soireanchi pollton ekach bharim? To chitunk poddlo. Ghorant tor, itlea vegim konnachoch zolm dis somorombcho nam, ani nhoi mhunn koslench dusrem fugsanv nam. To apleach vicharan astana, kuddachem dar ugoddta ani vosreant bhitor sorta zalear, mavxe bhoinniche vegent, aple ghorkarnik mottean roddta ti pollovn, tachem hodd‘ddem dapeta. “Bhurgim khuim asat?” Sogott distat punn bhurgim disonant tea huskean Lapitt vicharta. “Bhurgim iskolak salamat asat.” Mavxe bhoinnichi zap mellta ani Lapittak prosn korta,“punn amkam kollunk zai tum koso asa?” “Hanv boro asam. Punn tem bhizudd zavn roddta kiteak?” Ghorkarnnichea islean pollovn vicharta “Tujea bholaykechem chintun.” “Mhoji arogya ghottmutt asa. Punn tumi sogott hangasor zoma zavnk, karann kitem?” “Bushan-an (Lapittachi ghorkarn) amkam sanglem, tum okosmat koslim tori pixeam bhaxen kantaram ghavpak lagla. Akantun, amkam soglleank fonar nirop dilo.” Vhoddlea mevnnean sogott hajir zavnchem karann Lapittak ugddapem kelem. “Are papianno, tumchea modlea eklean mhojea lagim fonnar ulounk zatalem ki nam? Itlo ghuspoll tumi kelo to, mhaka dislem amchea ghorant konnank tori vaitt zalem. Asum tem… Sangpachi gozal oxi: Kaim Gõyche malgodde bhuddvont Konknni fuddareamni Konknni bhaxecho tontto gombhir kela. Romivale kitle xanne Marathivaleancho adhar ghevn Rajbhas odhikrut kaideant bhitor kaddunk? Marathivaleamni kedna tori Gõychem borem chintlam? Ani atam Romi Konknnichem borem chintole? Kednanch na! Lino B. Dourado