Nit Keddna Mellteli? http://groups.yahoo.com/group/gulf-goans/message/35787 Kalchea sumanant, Moddganvchea eka dhondevaleacha atth vorsanchea putak chorun vorpacho yotn kelo. Bhurgeachi suttka khorunk, chorun vorpeamni, bhurgeacha bapay lagchean 20 lak rupia magle. Bapayn beg-begim pulis kes nond keli. Ani pulis vego-veg Bollywood filmi styli bhaxen kidnapper-anchea fattik lagle ani tankam Curti-Fonddem addrostear (bypass) sampdaile. Bhurgeak chorun vortole Uday ani Vitalak dhorunk samil aslolea pulis zomeachi bhatmi fotusoit, dusrea disa Gõycha disanleancher taboddtob chappun aili. Pulisank inam’ bhasaylo.
Chorun vel’lea vo kidnapped kel’lea bhurgeacho bapui ek vhodd dhondekar. Duddvancho pez, pulis thannavelea mezar poddtoch sotasott pulis chovkevelim her gorjechim kama soddun, soroll bhurgeak chorun vorpeanchea fattik lagle. Te zannach asle. Tankam sompaddait tor inam’ nhoich sorkara koddlean punn teavon dupett dhondeakar ditolo mhunn. Ghoddie mell’le zait? Punn ek vichar. Hoch bhurgo konnui eka durboleacho asul’lo zalear, pulis khatean vavurpi aplo jiv sonkexttan vo riskar ghalun hech toren, taktiken karvai korta asle kai? Verna ganvchem 16 vorsanchem iskolachem bhurgem bai Ravina Rodrigues voizachea durlokx vo beparvaik lagun tornech pirayer morun ghelear, 14 mhoynnem sompunn ghele. Inosent balkacho jiv kaddteleanchi, sorkari koddok karvay sogllea kaidean cholunk zai asli ti cholona. Jiv luksann zalolea dhuvechim avoy-bapui ani ghorchim hea ani tea kaideanchea darar martat, punn tankam khori nit ajun mellunk nam ani ti mellchina. Kiteak, duddvanchem vozon poddun kaideache hat bandun dovorleat. Ek vorosbhor monneponnan dukh sonslea uprant, kallzantle vilap bhair ghalunk, koxe toren Ravinank koxttanche morn favo kelem tem loka somoyar haddunk, tannim ek VCD Miss Ravina Somplem vo Sompoilem toyar keli. Oslim choddvoddeanchim mornnam dusreank favo na zaunk VCD-n xiddkavnni ditana, Ravinacha mornnank guneanvkari asloleank veginuch sojea vo kheast mellchi mhunn avoy-bapui ani ghorchim nitisobhek magnni kortat. Chorun velolea girest bapaycha putak vattaunk kaide samballpi dhanvun ghele, punn durboll ghorabeantle dhuvek foddan nidaylem tea guneanvkaranchi nit korunk kaideache monis susegad kansva porim kiteak choltat kai? Lino B. Dourado .
