Number Poddlo Teddnam Kal sokallchea adesa margelem nustem anponna korun molaitana, bazarantlea maslechi dor mollbak tenkloli aikon, mhozo mobile pasun fugar zaun roddunk laglo. Konnacho fon to pollelo. Fon korpeache fona ankdde vollok-pallok naslole “Hello”, hanvem mhontlem “Tuzo number poddla”, tannem sanglem Number poddla? Hanv chintunk poddlom. Mhozo number poddunk hanvem lotri kaddunk zai kivam hanvem Mumbai, Kalyan, Milan matka khellunk zai. Thailandi lotri asa. Punn tea sortiche ankdde mhoineache 1ler vo 16ver aberturak ravunk zai. Ani kal Son’var 8 tarik. Hyper Market-an KD 3 mollacheo vostu ghetlear ek lucky kupon mellta. Hangai mhojem noxib poilea panvdear porian dukolnam. Onvollki monis khoinchea numbrachi gozal korta kai? Ani haka, mhozo mobile fon konnem dilo? Mhaka prosn poddlo. “Baba, koslo number mhontlem tuvem?”, hanvem vicharlem “Hoi re khorench. Tuzo number poddla!” Tannem anik ekdam sanglem. “Hem koxem zaunk xoktta? Number poddunk vo lagunk hanvem ek sort vo lotri kaddunk zai, nam tor hanvem matka khellunk zai. Punn hea khellanim hanv pois asam. Ani tum number poddla mhontta to koslo?” “Tujea mottori lagsar number….?” “Kitem….?”, taka fuddem ulounk dinastana hanv uloilom. “Doyeal korun, thoinsoruch rav. Hanv yetam”. Beg-begim dempram marit mhojea gaddiexim cholunk laglom. Ek mhoino pasun zaunk nam komponin mhaka novi gaddi ghevn dilear. Ani number plate koxi poddonk xokta? Mhojea gaddie lagsar aslolea mon’xak zap korinastana, fattim-fuddem gaddichi number plate-i topasleo Tankam kainch zaunk nam ani teo ghott asleo. “Tum number poddla mhunn sangtalo. Motoracheo number plat….” “Tea numboranchi gozal hanv korinaslom. Ho poi ani ho ge tuzo number” Ani tannem mhojea hatant, gaddiechea darantleant bhair poddlolo mhojea mobilacho number laminated kel’lo, tukddo dilo. Lino B. Dourado .
