Otoilea Xivai Bhorunk Mellona “Hea ani tea sorkari kocherini, eka ferik zavpachea kamank hanvem dha tripi marleo. Punn konna-i ekleachim hatachim tallttam gorom korunk nant. Zaitea zannanim mhaka sol’lo dilolo. Meza poddchean dilear kit-kit nastana vegim kama zatat. Sogllo vevhar kaidea pormonnem zaunk hanvem ek domdicho lonch dinastana, sat mhoinneamni zatolea kamank odez vorsam tandlim. Hi tuka bhes bori khobor asa.” Shri Nazario Nacimento Noronha motthvea nanvan 3N (TriN mhonntat), apnnachi oddchonio somaz sevok Lapittak ugtaitalo. Ghara battant vo ghorak tekhun, kaidean lagu zatolim sogllo kagot-potr vavr ani NOC mellunk konnachoch favor magonastona ani rixvot (bribe) dinastana ganvchi panchayat tem sorkari vorixtt khatim ekleanuch mostun Cold Drinks & Ice Cream Parlour, dhondo cholounk ek lhanso kudd bandun toyar kelolo. Punn oitoilea xivai bhorunk mevona. Nimnnem ani xevottachem kam’ Parlour-ak bizli mellunk, ghelea odez vorsam sorkari khateamni feri ghatloleo tea von dupett tannem, Bizle Khatean ghelea tin mhoinneam modim ghatleo. Zomni poddchean bizlecho tar vorunk ani rosto khonnunk PWD-chi porvongi zai. Him ani tim nibam divn dor disa taka ritea hatamni portun yevnchem poddtalem. Dusro upai ghena zalear, thoddea disanchea kamkazak anik vorsam vochot mhunn tannem xevttim somaz sevok Lapittichi mozot magli. “Itlench? Hea barik kamank lagon tuvem itle tras kaddun ani vell ogdaun mhojea sorxim kiteak ievunk zai aslem? Tunvem mhaka ek fon korcho aslo. Padd poddil’lea mon’xanchea bolsanim, otoilea xivai bhorunk mellona. Atancho kall promannink mon’xank nhoi. Hanv zannam. Tuje koxttanche duddu lonch divnk tum kosoch toyar nam. Tankam divnchea bodla tum durbolleanchea utten teavon dupett ghalpi. Biyenaka. Bizle Khateacho Montri mhozo chodd lagsorlo ixtt.”, Lapittan kainch nhoi zalolea porim TriN-ank asvasan dilem. “Sogllem hanvem zorot-morot kaidean korun ghetlem. Bizlechem kanekxonn mellunk soglle dukument ditayen tak-tik asat. Punn atam hea illexea kama khatir Montreache payam poddop? Tanchea upkaran ravop? Hem mhojea totvan (principle) sobona” “Nazar, amchea motdarsanghantlea Montreak tunvem ani hanvem moladik motam divn vichun kaddla. Kitiak? Motdamranchim kama korunk. Oxem mu? Zalear, tanchem kam’ tem. Tum huskea meklo rav. Tin disa bhitor tujea parlour-ak rosnni melltoli” Lapittache upkar attoun TriN bhair sorun veche vellar tacho mobile vazlo. Bolsan hat ghalun Samsung Galaxy S3 novea modelacho fon bhair kadlo. Lapitta islean pollenv tannem mhonttlem “Bailecho fon aila”, ani fon kannank tenkun fonar uloilo “Hoi, hoi, kam’ zalem. Lapittache upkar. Borem-borem. Ietana bazarantlem nustem ani baji-torkari ghevn ietam” “Boroch mhargelo fon. Sumar 34 hozar rupia odik tachem mol asa. Tosloch hanv ek ghenvk sodi. Kitle farik keleat tunvem. Fonacher discount bha boro ditat?” “Hanvem ghenvk nam. Mhojea ghorkarnnin ghevn dila mhaka” “Ken’na savn tuji ghorkarnn sirvisek lagli?” “Sirvis korina ti, punn teag keleat” “Teag? Kosle teag?” “Tika khub nhespachi avodd asli. Aichea fugsavank nheslolo vistid faleanchea sorombank nhessunk tika dusro vistid zai poddtalo. Pilar vosunk nhesloli sari Goychea Saibachea festak nhesunk toyar nasli. Kopddeanchea rongar bostole moche, hatant dorchim begam ani her vostu ghetali. Sumana don pavtti tori posh khannavollint tika bhair vorunk zai asli. Punn fattlea dhedd voros ho ticho despez vo khorch zaito unno zaunk laglo. Ani hache kharan mhollear, mhojea 50vea vorsak apleak unnem korun duddu zomoun novoch bazarant ailolo Galaxy S3 vikot ghevn dila” “Va, va, va. Khorench valor tuje ghorkannink. Kitem zaum. Tuzo mobile mhaka di....” “Kitem? Ho mobile? Koxe zatelem?” “Tujem kam’ zatoch…….”, Lapitt fuddem ulovncho bondd zalo. Te dogui uloitale thoinsor Lapittachi daktti dhuv aili ani komputorocho password ghalunk bapay thaim vinonti keli. Ani to tichea borobor bhitor ghelo. Nazariche tokler zhodd vozem dovorlolea porim zalem. Konna ekleak lonch dinastana lhanxem dukan ubem kelam. Ani atam bizlechem konekxonn mellunk give and take, podot vapurchi poddli? Otoilea xivai bhorunk mellona? Ani tovui zalear ek ixtt ani somaz sevok. Ghorkarnnin teag korun koxttanchi bhett diloli ti zopt korunk sodta? Him koslim dhongiponnam? Taka Lapittachi mozot naka kosi disli ani thoinsorlo koddorun vetalo tech vellar Lapitt tachea morean ubo zalo. “Khoim vochunk vetalo? Veche adi tuzo mobile di mhaka” “Mhojean mobile divnk zaina. Sorry. Ani tuje…..” “Kitem? Dinam tor hanv tuka koso sompork kotolom?” TriN-achem ulovop sompchea adim Lapittan vicharlem “Sompork mhonnchem?”, Lapitt kitem sangunk sodta tem somzunk naslolean TriN-an vicharlem “Tujem kam’ zalem mhonntoch hanvem tuka contact vo fona velean sompork korun kollit korunk zai mu?” “Mhozo novo mobile number zai tuka?” “Hoi” “Hai Saiba!!! Mhaka dislem tum mhozo mobile magta mhunn”, TriN-an aple toklek hat marit taka fon number dilo. Vhoir sorlolo jiv, somadan zalo. Lino B. Dourado
