Soor Moiddanavele Ugddas ani Humalle Kal Son’varak, Kuwait City-n vochpak bhair sorlom. Sharq aslolea ‘Center Point’ shopping mall-ant vochunk zai aslem mhaka. Shot-kut marunk, hanvem ghaddi Soor Street-a vatten gunvddayli. Apo-ap mhoji nodor, Soor Ground-cher poddli. Moiddanar chalu kel’li banddavoll (constructions) khoim meren pavlea ti polloit vetana…
“Kitem re papia? Zaytea tempan aiz mhojea islean pollevnk dislem? Orxim sumanantlean kitlech khepek arpar vochpi tumi. Sapuch visor ghatlo re mhojer?”, ek vhodd xinn kel’lea porim Soor moiddan, kitem tori sangta kai dislem mhaka. Khall bodolta te toren, adlem ugtea Soor moiddonachem eksarkem rup bodlot veta. Punn amche ugddas mat bodlunk nant. Taze asat. Mhoje bhaxen, zaitea Gõykarank, hem Soor moiddan apurbayeche aslem. Ani taka zaitim kharana asat. Poilea svater, gormi vo thonddi mhunninasta, dor Sukrara solkachea vellar hangasor choltolo futbollacho tornament, Gõycha sabar ganvantlea Gõykar bhav-bhoinnank ektthaim kortalo. Futboll pollevncha pollevn, dusrai-i kama khatir Gõykaranchem mellop zatalem. Poilech pavtti Kuveittche bhetter (visit-visa-r) ailolea soireank, Soor moidanank bhett dilea xivay tanchi bhett ordipurti zal’lea vori diso. Gõyam thavn haddlelim parcelam pavtti korpak, hem moidan faideachem zatalem. Audio-video ani halincha tempar VCD Konknni kantaram ani filmanchim vikri borich nettan ani funkot prosiddi (publicity) zatali. Thodde zann futboll khellak pixe asle. Dor Sukrarak, te chukoynastana moidanar distale. Duent vo overtime poddun te-te futboll mogi moiddonar dislenant zalear, her dusre khell pollennar ani lagxile ixtt-mitr tanchi rokddich khobor ghetale. Tancho husko zaunk kharan aslem. Tanchea avddiche ttimincha khellgoddeank, virodhi (opponent) ttimicha khellkoddean dox (fault) kelo tor, ani ti chuk refri dakoina zalear, te moidanar vhoir-sokoll dhavun loka modim sobonant toslim utram mottean ulovun, ak’khench moiddan ghazoytale. Dusrea zannank apnnalo nett vo vhoddponn dakhoipa khatir, Soor moiddanacho upeog khortale. Orxim te choddxe moiddonar diso nasle. Novi ghaddi vikot ghetli mhunn, tichi dakhovnni (display) korpak, Soor moiddana xivay dusro boro marg tankam mello naslo. Tannim ugtea moiddonar bhitor sorchem aslem, ani moiddonaveli dhull ubo-it don-tin bhonvadde marche asle. Hea vellar, futboll khell pollevnk zomil’lo lok khell pollevpacho soddun, ghaddi cholovpeachi vollok sodi. Borea futboll khellgoddeamni, hea moiddanavelean boro nigut khell khellun borem nanv zhoddlam ani puroskar zhoddun ghetleat. Huxear khellgoddeank utt’tejonn divnk zaiteo sovlotti dor ek kluban favo toxeo dileat. Thoddeamni apnnalea bolsak chimptto kaddun futboll klub choloileat ani ajun choloitat. Punn, jitli namnea vo prosiddi Soor moiddanavelean melltali ti atam, her dusrea moiddonacher disona. Oxem kitem kat hanv, adlea ugddasachea humallean xennlolo astona, fuddem veche vatter digital ground-axim pavlo tednam, hanvem ek atvoch avaz aikolo. “Kitem re papia? Ho zamana ghaya re. Soor ground somplear vorsam sorlim. Ajun tachich chinta kiteak? Dor ek vost digital zalea ani atanchim futboll moiddamna purian digital zaleant, tanchi khobor nam tumkam? Perim zhaddamni bhorlelea moiddonank perim-ground mhunn nanv divnk zata zalear, mhojea oslea famad ground-ar kiteak disonant tumi? Tumchea khatir, mhonnchem; futboll khell mogiank lagun Musolmanacha Ramadana vo upas-disamni sanjecha vellar khaim futboll mogi, futboll tornament choloitat to pollevpak, chodd gormi lagta re tumkam? Anik aik……………..” Rostear dhavnteli ghaddi pois pavil’lean, fuddem aikupak moskil zaunk laglem. Oi! Soor moiddonar adim khotkhotea votacha dogar ani thonddechea disamni khullkhullun ami futtboll khell polloitale. Ti gormi ani ti thonddi, ek onek torechi asli. Id vo her mukhel sutt’techa disamni, disbhor futboll tornament aslear, suru to xevott porian ube ravun Soor moiddan madoilam ani mostilam. Soor ground, eka farak don odhik suknnim marunk sondi ditalo. Laginch aslolea igorjen vochun, suman sontacho kaido pallchea pallun, her gorzo nibaytalo. Tedna tankam (futboll khell pollennarank), gormi nhi mhunn thonddi lagonasli. Khellachem urbebhorit mosteponn Gõykaranchea rogtan khelltalem tea khatir, Soor moiddan chomoktalem. Punn atanchea khallar Ramadan-a disamni, ghora kodden sust donparcha vellar acin (AC) susegad nidhlolo Gõykar, adle toren nidhentlo utthun futboll khellacha moiddonar disunk kotthin zala…..Kiteak? Hachi zap konna thaim tori mhaka mellot kai? Lino B. Dourado
