Sukhantlem Vorun Dukhant Ghalum Naye - I
Donparchem jevonn ghetlea uprant Srimati Esparança
Verdes, bolkavant bosun Vavraddeancho Ixtt vachunk
bosleli. Moddle panar asleli khobor vachtam-vachtam
tiche dolle motte zait gele ani soglich akhantli.
Porot ekdam tinnem nodor marli ani ti chintnachea
somdirant astanam tigelo ghov thoim pavon sorlo.
Potracher asleli khobor aplea ghorkarak iskutavn
sangli ani thoinsorli utthun ti bhitor geli. V.
Ixtt-ar oxi khobor chappun aileli.
Gõy Voizki Kolejicho Dean Dr. V. N. Jindal hache
sangnne pormannem Gõycheam rosteancher obsoeg zavn
toklek mar laglole piddevont chodd asat, tankam
neurosurgery-nt ilaz ditat. Dor vorsa toklek mar
bosloleam 200 zannanchim operesanvam kortat mhonn
sanglem.
Mogall Purificação,
Eka sumanam bitor, mhoje dhuvechem kazar tuje puta
thaim zoddchelem asa. Tujea putachi soirik ghevn
ailelea soirikaran vo kharbarean tuje puta vixim
zaitem borem sanglelem punn ekuch, tujea putak
partyank vochpachi khubuch umed asa khoim. Aichi novi
Gõychi pillgi socialize zalea mhonntoch, tujea puta
vixim amkam vhoddlem xem disonk nam. Punn aichea
sumanantlea V.Ixtt-ar, chappun aileli khobor vachun,
hanv matxe gombhir zaleam.
Tumi sanglelea tea pormonnem koslich oddchonn
nastanam dotiche poixe ani vostu toyar keleat. Amchi
eklich dhuv ani dogam bhavanchi eklich bhoin zalelean
tumcho demand puro korpak Gulf-ant nokri kortelea
bhavank, duddvancho prons nam. Zednam tumi 5 lak nogot
duddu magle tednam mhojea putanim vicharlelem.
Zanveank (son-in-law) vinktto gheta kai mhonn.
Tumchea ghorant kitem asa vo nam tem polle nastanam
tumchi khuxi puri korunk Frij, automatic washing
machine, 49 inch Flat TV, Bajaj Pulsar mottor-saikol,
Home theather-DVD,VCD &MP3-ani her ghorant disantlean
upeg zateleo, heo soglleo vostu ami toyar korun
dot-dennem disa ghevn yevchim asat. Oi! Mhoje dhuvek
thondd piyepam avoddtat tea khatir novi frij ditam.
Mhoje dhuven aiz meren aplea angavele kopdde dule
nant. Tagele mhelle kopdde duupak tuka tras nakat
dekhun, fully automatic washing machine ghetlam. Lhan
TV-cher, tiche avddiche hindi serial pollevpak tika
mouz yenam. Dekhun 49 inch Flat TV vinkot ghetlea.
Orxim mhagelea ghorkarak aple dhuvek Maruti ZEN divchi
pott bhor khuxi asli, put tunvem Bajaj Pulsar magli.
Zanv! Pulsar mottor-saikolir fokot dogank bosunk svat
asa. Tisri pidda nam. Sozmolem astelem tum. Hanv kitem
mhonnonk sodtam poi tem. Koslich vost unni
korinastanam tumchem shopping list toyar kelam, jem
tumchean dusrea zolman porian vikot ghevnk zanvchem
nam titlem mhoje dhuvek divn tumchi khuxi puri kortam.
Hi chitt borovpachem ekuch kharan asa ani tem
mhonnlear tumchea soirikaran amkam sanglelem, tumchea
putak partyo avoddtat. Mhoje bhoxen tunvum-i V. Ixtt
vachta mhonn tunvemnuch mhaka kollit kelam. Hea
sumanantlo, V. Ixtt, (Dezembr 1li, 2007) Gõycheo
Khobro pan 5, uktem kor ani Gõyant zatoleam
obsoegamnim toklek mar laglole chodd hea mhattalean
asleli khobor vach. Hanv mhonnonk sodinam tumcho put
party animal, punn hanv zannam zavnk sodtam tumcho put
soro piyeta vo nam to. Tumchi khuxi, mhonnchem, tumi
maglelem titlench divnk ami toyar asat. Kitem borem
zalem zalear dhuvemchem noxib nam tor soirikarak
roddchea adim mhoji ekuch khuxi puri kor. Gõyche
Voiziki Hospitalantle neurosurgery vhoddil Dr. V. N.
Jindal hache koddlean tumcho put non-alcoholic vo
soreacho vis naslolo mhonn ek setifikete toyar korun
amkam beg-begim pattovn di.
Noxib aslear, fuddarachi soirim,
Tumchem,
Esparança Verdes.
Lino B. Dourado
CHOLTA
..
Chotrai: Khoreanich Esperanca-chi dhuv, Purificacao
puta lagim logn zata kai? Dusro bhag fuddlea Aitarak
http://www.goa-world.com/goa/poems
http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado
____________________________________________________________________________________
Never miss a thing. Make Yahoo your home page.
http://www.yahoo.com/r/hs
