Ugto Nhoi Gupit Mog Kal osoch 'internet'-ar bhonvande ghaltana, bholayke vixim bhouch mahiti diteli ek 'website' hatak sampoddli. Bhitor vetlo vo ti 'website' ugti kortolo tor, hanvem thoim fokot te mavle thollak tatpurto 'account' ugdun membr zaunk zai aslem. 'Choose your username'---- boroch vell chintlea uprant hanvem nanv dilem ugto_mog. 'Password' magtoch, hanvem soroll boroilem kortana. Thoddea vella modim mhaka mekleaponnan te websitir bhitor sorunk marg ugto zalo. Mhaka zai titlich bholayki mahiti ghetli ani kompuitor bond korun ek novem kantar boroitolom mhunn, pen ani kadern ghevn boslom. Zaito temp zalo mogachem kantar ghoddlear. Nigtich novi ID ani 'password' kela, Ugto_Mog Kortana. Tachi yad zali ani Ugto Mog nanv divn kantar boroypak suru kelem. Poilo verse mogachim bhavnam fuloit boroilo ani dolle dhampun dusro verse koso suru korcho hem chintana, rumanchem dar sovkas ugte zavn konn tori mhojea fattlean yevn, hanvem kitem boroilam tem vachta mhunn, mhaka bhas (feeling) zalo. Pattlean vollun pollenastana, hanvem dusro verse borounk suru kelo ten’na, mhojea fattlean ubo aslolean mhonntlem. “Tum tuka, Skeeter Davis mhunn somzota?” “Skeeter Davis? To konn?” “To nhoi Tem. English kantorist Jim Reeves 'He’ll Have To Go' gaita zalear, Skeeter Davis taka zap divn 'He’ll Have To Stay' gaitalem. Tinnem, herui kantoristank soddunk nant. Ray Peterson 'Tell Laura I Love Her' gaita, Skeeter Davis 'Tell Tommy I Miss Him.' Hank Locklin 'Please Help Me I’m Falling' ani tem mhonnta 'I Can’t Help You I’m Falling Too.' “Konn Skeeter, konn Jim, Ray ani Hank hanchi mhaka suluch nam vo vollkona zalear, tanchi khobor mhojea osleank kiteak? Hanv mhojem kantar boroitam. Lokachem nokol marina” “Tujea kantarachi survat zalea tem vachun mhaka dista tum sorgest Alfred Rose-achea famad GUPIT MOG katarak UGTO MOG mhunn zap dita. Tachea kantaran survatek to mhonnta: Chitt vachun, ojeap zata (ani tum boroita: Port vachun, ekdom sontostam) Dukhi utram him vachun, dukhan suskartam(Sukhi sobd he vachun, sukhan ulastam) Tujem dukh, anv nialltam(Tujem sukh, hanv nibaytam) Kitem korum anv, kazar zalom atam(Kainch korunk disna, tuka lagon ankvar asam) “Baba tum khoinchea sonvsarant asa? Atam gupit kainch uronam. Gupit mog kortole jivitant fottovleat ani fottovtat. Dekun, hanv mhozo mog uktalar haddun mogkornarank sukhan jiyevnk hea kantarantlean sangunk sodtam. Gupit mogachem fugasanv kallzan dovorun mogan fottovleant tim pixeam hospitalache bedir asat. Bhoinnim bhaxen mog kortalom hem sangchea bodla nhovro-vhokoll zavn ugto mog kelear fuddarak mogan konnuch fottovche nant mhunn, mhojea kantaran dakoll zatelem” “Punn tum, dusreanchea buzancher bondunk dovorun far marta. Alfred Rosachea kantarak zap dinvchea divn tum tachea suracheruch kantar ghoddta” “Arre papia, khoinchea tiatristan dusreanchea suranchim kopi nam marleli asa? Gupit Mog hem kantar English suracher bosoylam.” “Hanv tuka bore bhaxen sangunk sodtam, adim khoincheach kantoristanim dusreanchea kantarank zap dili nam. Vo dusre bhaxen, amchea poromporik tiatr pollevpi hem svikarche nant vo manddun ghevnche nant. English somazan tem sobtta punn nhoi Konknni….” “Kiteak sobchena? Nove kitem tori korun pollumya nhi? Lok svikarta vo nakarta tem tuka kiteak poddlam? Hanv Skeeter Davis-a porim prosidh vo famad zait mhunn tujem zollunk laglem? Somplolea tiatristanchi niz kala jivi dovorpak zaite zann haddpotatt-dollpotat zalear, hanvem, tanchim omor ugddasachea katarank zap divn kantaram ghoddlear tujem kiteak korzota?”, Kedov meren mhojea fattlean aslolo monis konn to pollevnk hanv fattim voulolom. Tannem patt keli ani to cholunk laglo……..”Hey…ekuch pavtti tujem tondd dakoi papia”, hanvem bhouch mottean mhontlolem tacho avaz mhojea kanar bosun, hanv nidentlo zagrut zalom. Lino B. Dourado
