JEZUCHEM MORN ANI JIVONTPONN
Mun'xakullak patkantle mheklle korchea khatir Jezu Krist Apunn khursar melo.
Korezmancho kall amkam sondhi dhita Jezu Kristachea koxttancho nihall
korunk.
Korezmancho kall Jezu Kristachea koxttank bhettoilolo asa. Amchea
firgozamni, dhor-eka korezmanchea Aitara, Kristachea paxanvache Santos Pas
zatat. Hea Pasank adlech porim lok hajir asta. Kristache paxanvachi
dakhvonn ami Goyeant korun eilear xekdde bolanddlet. Azun Kristanv
Goyenkar, dadle toxeoch bailo, korezmant uphas kortat. Tech porim zaitech
amche dadle korezmant soro pienant. He amche supurle tyag Jezu Kristachea
koxttam mukhar kainch nhoi.
Aiz-kal ekuch utor voir-sokol zalear ami ragan bhortanv ani furr korun
eka-meka lagim zogddim manddttanv. Punn Jezun amchea moga pasot soglle
okman sonslet ani nimanno Apunn khursar umkoll'llo ani amchi soddvondd keli.
To tisrea disa meleleantlo jivont zalo ani Aplea punnorjivontponnam vorvim
amkam sasnnanchem sukh toyear kelem.
Ami Jezuche koxtt nirfoll zanvk divnk favonam. Hea korezmanchea kallar bhov
gorjechem Jezucheam koxttancho nihall korun Tannem amkam bhasailelea sasnnik
jivitachea rosteacho pattlav korunk.
Amcho dhorm Jezu Kristachea punnorjivontponnamcher attapla. Inacio Loyalan
(Bhagivont) tornattea Francis Xavierak (Bhagivont) mhuttlem: "Koslo faido
ho sogllo sonvsar jikon ani tuzo othmo luskonn korun ghevn?" Itlench puro
zalem Francis Xavierak dhobajeacho sonvsar soddun Devacho pattlav korunk.
Voilim, Bhagivont Inacio Loyala-achim utram ami kosak lavum-iea ani thir
nichev korun korezmant Jezu Kristachea koxttanim vantto ghevn Tannem
bhasailelea thikannancho rosto tankumiea.
Sogott Goyenkar Kristi bhava-bhoinnink othmik korezm anvddetam.
Moi-mogan,
Domnic Fernandes
Gaumvaddy, Anjuna
P.S. My new Hotmail address is: [EMAIL PROTECTED] (replaces
[EMAIL PROTECTED])
The above short Konkani article was written for 'San Miguelacho Avaz' -
Anjuna church quarterly magazine
