SON’VARACHIM SUNGTTAM: SORKAR ANI PORZA - Jose Salvador Fernandes Gõy Vidhan Sobhechi fattli vinchnnuk 2012 vorsa zali. Motdaramni, Kongres Pokxa kodde Gõy rajya khatir vavrunk ani raj cholounk favo te tankiche ani kopxieche monis nam te polleun, tea pokxak panch vorsancho visov dilo. Bharotiya Janata Pokxak (BJP) sodrier haddlo. Fattlea vorsantlea Mars mhoineant. Mhonnche, ek voros tin mhoineacho - pondra mhoine - kall sorlo. Hea pondra mhoineamni, BJP sorkaran Gõy rajyache udorgoti khatir kitem melloylem, zoddlem ani xarti pavoylem tem konnak khobor nam. Svota BJP-kui tachi mahiti asa zalear khobor nam. Gõy rajyacheo vinchnnuko lagim pavta-pavta BJP jairatintlean aplo jahirnamo porgott kortalo. Kongres ani vinchnnuk loddovpi her-ui pokx oxem korpant fattim nasle.Tea jahirnameamni, motdarank bhulounk, fulounk vo potrank posunk zalear khobor nam, aplea pokxak sodrier haddlo zalear, pokx motdaram khatir oxem-toxem kortolo mhonn pott’tiddken ani kinvanttean jahir kortale. Vinchnnukam uprant, zo pokx sodrier ailo, ani jea pokxak atam pondra mhoineancho kall bhorlo, tea pokxan hea pondra mhoineachea kallant apnnem rajyache gadier bosun rajya khatir kitem melloylem, zoddlem ani xarti pavoylem tem, tea pokxan motdarank adlech pott’tiddken ani kinvanttean, jairatintlean sangunk zai aslem. Punn sangpachem nanch zalear anik kitem sangtele? Punn fattlea vorsa BJP sorkar Gõyche sodrier yet porian tem az meren, hea sorkarak khuinchech vatten tharo naslolea porim disun ailam. Poilo prosn upraslo – mullavea xikxonnachem madeom. Tache fattafatt, prosn manddun dovorlolea bhaxen, bekaideachea minacho prosn udelo ani minacheo khonddi bond poddleo. Sorkari tizorimni yevpi yennavoll bond zali. Hea, aplea hata bhair aslolea prosnachi sorkar azun-ui khoros kaddta. Anik khubxea prosnam modem atam uprasla Mopa vimantollacho prosn. Fattlea satolleant Mandoviche nodint ubi zalole M V Casino (Horseplay) botticho prosn uprsala. Mhonnche, BJP sorkar Gõyant he khepek sodrier yet porian, hea sorkarak prosnacher prosnak fuddo korunk poddlam, ani tacho porinnam’ rajyache udorgoticher zala hantum matui dubav nam. Toxem polleunk gelear, her rayjamni prosn asonant oxem nhoi. Astat. Thoddeanche prosn suttoytat, thoddeanche suttun suttonant. Anik kaim zonnanche prosn-prosn sutt’ta-sutt’ta okosmat anik kitem addkholl ubi zata, ani tem sogllem lambter poddta, ani te-te poristhiti promannem padd-ui poddta. Gõycho BJP sorkar fattle pondra mhoine sot’ter asot porian je tache mukhar prosn ube zaleat, te sorkara kodde suttounk zaunk nant. Fuddarak zatole vo nam ti-ui khobor nam. Punn ek mat khorem: sorkaran motdarancher vinchnnuke adim visvas dakoylolo to, atam sodrier yetoch dakounk nam. Dekunuch khubxea prosnamni sorkarak modli nhoi, punn poll-vatt kaddchi poddlea, ani taka lagun Gõyant sodrier aslolo sorkar ‘amcho sorkar’ vo nam tem lok chintunk poddla. Rajyachi udorgot zatoli zalear, sorkara ani vinchun kaddlolea motdaram modim divop-ghevop aschem poddlem. Aichi poristhiti niyall’lear, sorkar apnnak vinchun diloleam koddchean fokot gheta, punn aple vattenchem tankam dinam oxem dista. Dekik: Sod’deak Mopa vimantollacho prosn ubo zala. Porza mhonnta MOPA vimantoll naka. Sorkar mhonnta, nam hanv kortanch! Hanga sorkar aplech porje kodde ‘temam’ khellta kai dista. Oxe torechim ‘temam’ khellche bodlek sorkaran porjechim motam ugtea monan aikololim zalear, Mopa vimantolla vixim aichi ji poristhiti nirmann zalea, ti ghoddie zaunchi nasli. Karonn, apnnem nivddun dilolo sorkar aplea dastiank ani prosnank kan dinam tednam porza rostear denvta. ‘Goans for Dabolim Only’ hi te poristhitichi ugti dekh asa. Sorkar ho porje khatir asta. Dekun, lokxayent porza aplea khatir aslolea porim khuincho-i sorkar vagta tednam, to sorkar rajyache sodrier asun-ui porje mukhar khala poddta. Porza magir taka sodanch tirpe nodren polleta. Tannem suchoylolea yevzonnank virod korta. Taka aplea monantlo bhair ghalta. Sorkar aslo-i sarko, naslo-i sarko uloyta ani vagta. Osli poristhiti khuincheach rajyacher, ani khas korun Gõy rajyacher uprsachi nhoi mhonn opekxa ballgum-ya. . .
