Tanchem Pap, Ami Kiteak Divnchi Zap?
Thoddem bhov Inglez vachunk-borovnk xiklolem Fulam-bai, (disbhor mhateak fulam
mallpi, dekhunuch tika fulam-bai nanv dilam) tichea xezareak ravpi
Klement-timaink, tea disache disaleacher chappun ailoli khobor, Swine flu-hit
suffer social stigma! vachun sangtalem. Klement-timai, apnnalea dhukrank khann
ghaltali. Hea disamni ti matxe pertubad (disturb) asli. Bhailea desamni rabito
(thikann) korun aslolo lok, kosli tori dhukrachi pidda ghevn tourism-achea
nanvan Goem bhitor sorta mhunn tika khobor asli. Goyche dhukrank ani masak
giraik nasun, tika bhouch lukson zalolem. Tigelim, tonddan udkam haddpa
sarkelim dhukrachim chevrisam Moddganvchea pornea bazaran hot cake koxim
khoptalim. Fulam-bayen, swine flu he pidde vixim tika mahiti ditana,
luksonachea ujean lastolea Klementin-timaink, paperacher chhapunn ailoleo
khannio sangun anikui chintnachem vozem tichea mhatear dovorlem.
Klementin-timaigelo ek tuntunit anglotin bhorlolo solog (dhukor) pottbhor dhon
khavn laginch aslole dhukrik mellunk ghelo.
“Hey dhukri. Rav! Aik, aik!”
“Kitem zalem re pelvont dhukra? Soglloch abuzadd zala koso? Rongar bha yeunk na
mhu?”
“Hanv kitem sangtam tem poilim aik. Rongancheo khobro uprant dovor. Bhailea
desamni aslole Goykarank amchi, mhonnchem; pig flu pidda zalea. Ani tea pasot,
hea disamni amche sonsticher hol’lo (attack) unno asa.”
“Itlench? Fokot itlench aikolam tuvem? Arre dhukra, amchi pidda dhamichi
(contagious) zalolea bhaxen ani dhukor-piddek kosloch ilaz naslole porim
chukicho somoz ghevn lok asa tem mat sarkem nhoi mhunn, Goyche Bholaike Khatean
lokachea nodrek haddlam khoim. Inglez vachunk-borounk noko asloli
Klementin-timaink, tea Fulam-bayen ek aslolem tem, dha korun sanglem astolem.”
“Avois!! Hem tuka koxem ghomlem bara pillanche dhukri?”
“Tuka kitem dislem? Tujench Fulam-bai Inglez zannam mhunn? Mhoji-i ghorvali
unni na. Kal ti Agostinhochea kumarik sangtanam, hanvem sogllem aikolam.”
“Mhakai-i aikopak di nhi?”
“Halinchea disamni Goyant anink dog zonn swine flu piddek boli poddleat mhunn
Bholaike Khatean thokrari nond zaleat. Ani tankam Chikalim Cottage Hospitalant
vorun, ilaz divn ghora portileat henvuim sarkem. Punn atam, ganvcho lok tankam
veglech torechi vagnnunk divnk lagla. Tanchea ghora nhoi mhunn lagsor vochun
tanche thaim ulounk bhieta mhunn, piddek boli poddlolea eka ghorkarachi mogall
potin, Bholaike Khatem odikaream thaim xinn korta. Hem lokachem sarkem re yea?”
“Sarkench! Pig flu pidda laglolea mon’xanchea khonvli velean zontu (virus) yeta
khoim”
“Kainch noko zalear, ogich rav dhukra! Tum sangta te toren amchi pidda bori
zainam osli (incurable) mhunn? Adim, Goyant dhukranchi pidda nasli? Lok
mortalo? Bhailea desantlean hi swine flu pidda hanga ailear ami guneavkari?
Dhukranchi poltton aslole kodden sonvsarbhor dhukrachi pidda asach. Jednam
dhukrachim poromporik chevrisam vikun dispotto zhoddtolea dhondekaramni apli
oddchonn ani luksonn zata tem Bholaike Montreak ani Kasdar Sardinho ani PWD
Montri Churchillache nodrek haddlem tednam tannim sanglem, zonvoranchem mas
bore toren xizoun khailear koslich pidda zavpachi xoketai nam mhunn. Kombi
mhunn bori? Bird-flu mhunn ghevn yevnk nam? Goycho sorkar ani Bholaike Khatem
zata te toren lokak he pidde vixim zagrutai kortolo mhunn sanglam ani somaja
koddsun unneponn sonsunk poddtolea lokak apnnalo adhar basaila.”
“Itli sogott khobor tuka khoinchean mellta?”
“Mhoji ghorvali, Agostinhoche kumarik sangtana aikolam. Ani itlench nhoi. Ti
mhonnta, Goychim dhukram irvem tonn, char ani zhaddachim panam khatat dekhunuch
koslech duensam amkam lagu zainant. Goychim poromporik ruchik chevrisam amchea
masakoddsun zatat toslim chevrisam mollant (farms) postolea dhukram koddlean
mellonant. Kiteak? Amkam mellta toslem nallache pende borobor sullsulit xitacho
nis khavunk, famant postolea dhukranchea noxibant nam….”
“Punn ami ganvant heddtolim dhukram, mon’xanchi hollxig khatat te toren mollant
vo famant aslolim dhukram khainant nhi gho yea?”
“Mhonnchem?”
“Hi poi Klement-timaim udkacho thambio ghevn veta. Tichi matxe khobor ghevn
yetam.”
Lino B. Dourado
