Petrus J V Dionysiopolitanus Bryantus, agnomine Australianus, Sodalibus Mantuanis omnibus S.P.D.
Ego vobis festum nativitatis Christi celebrantibus optima quæque exopto, atque annum novum faustissimum felicissimumque vobis vestrisque ex animo precor. Ludovicus Veuillot (1813-1883), natione Francogallicus, poematium ex versibus hemistichiisque Vergilianis concinnavit, quod de Magis Tribus agitur. Quod cum ad festum Epiphaniæ celebrandum aptissimum sit ad vos, gregales, animi causa mitto. Itaque oro atque obsecro ut in bonam partem hoc titivillitium merum accipiatis. Nam procul omni dubio, poematia huiuscemodi levia ac nugatoria sunt, sed nihilo setius meo iudicio voluptatem nobis suppeditare possunt. Quamquam hic Vergiliocento callide ac sollerter scriptum est, tamen interdum pæne instar ænigmatis aliquantulum obscurus fit. Quid refert? Nam lusus poeticus est, immo ut vocabulo Ausoniano utar, est technopægnion. Si quis scire vult quomodo hæc carmina, quæ centones vocantur, conscribi possit, adito Ausonium poetam("Centonem Nuptialem"), ibi conscribendi rationem reperiet. Tres Magi 1. Ecce autem, primi sub lumina solis et ortus, 2. stella facem ducens, multa cum luce cucurrit 3. signavitque viam cæli in regione serena. 4. Tum reges, credo quia sit divinitus illis 5. ingenium et rerum fato prudentia major, 6. externi veniunt quæ cuique est copia læti 7. munera portantes molles sua thura Sabæi 8. dona dehinc auro gravi, murraque madentes. 9. Agnovere deum regem regumque parentem. 10. Mutavere vias: perfectisque ordine votis, 11. insuetum per iter spatia in sua quisque recessit. Index Fontium Virgilianorum 1. Æn.VI,255 2. Æn.II,694 3.Æn.V,526; Æn.VIII,528 4.Æn.VIII,330 ; G.I,415 5.G.I,416 6.Æn.VII,98; Æn.V,100 7.Æn.XI,333; G.I,57 8.Æn.III,464; Æn.XII,100 9.Æn.IX,659; Æn.VI,765 10.G.I,418; Æn.III,548 11.Æn.VI,16; Æn.XII,129 Notandumest Ludovicum Veuillot concinnitatis causa aliquot versus mutasse. Quamobrem legimus "et" pro "aut" in versu quinto;"veniunt"pro"venient"in versu sexto ; "gravi" pro "gravia"in versu octavo. Præterea particula : "-que" ad vocabulum: "perfectis" in versu decimo adjuncta est. Curate ut pancratice basilice athletice omnes valeatis ! Scribebam XXVI die Decembris mensis anno MMIV p.Chr.n. Perthæ apud Antipodas et Antiscios in Australia occidentali ******************************************************************************* ******************************************************************************* Petrus Australianus Peter J V Dennistoun Bryant [EMAIL PROTECTED] ******************************************************************************* ******************************************************************************* ******************************************************************************* ----------------------------------------------------------------------- To leave the Mantovano mailing list at any time, do NOT hit reply. Instead, send email to [EMAIL PROTECTED] with the message "unsubscribe mantovano" in the body (omitting the quotation marks). You can also unsubscribe at http://virgil.org/mantovano/mantovano.htm#unsub