"Datuak Nan Duo" Oleh Redaksi Minggu, 19-September-2004, 05:18:10 180 klik
Panghulu jikok nyo pacah Kato jo laku indak sairiang Hilang picayo anak nagari Adaik nan indak paguno lai. Sarupo kecek Tan Koti kapatang, "Dek den indak manyakik bana sia nan ka manjadi Presiden. Sumbarang se lah, lai kajadi Jin, Syetan atau Dubilih nan ka naiak, dek rakyaik badarai sarupo den ko nan paralu paruik kanyang, lalok sanang, pikiran tanang, tabaia pulo utang,." Mungkin rakyaik apatis, atau indak namuah sato jo karajo-karajo politikus di nagari ko. Sabab rakyaik acok maraso didutoi, dilukoi sarato dikhianati. "Dek acok sakik, indak baraso sakik, dek acok luko indak baraso luko. Hati nurani manjadi mada, indak baraso," komentar Pudin sahari tu. "Atau dek karano rakyaik labiah santiang daripado politikus. Sagalo garak jo gariknyo dapek dibaco. Alun takilek alah takalam. ," tambah Mak Labai. "Iyo pulo tu yeeh..," cimeeh Tan Koti sairiang jo darai galak. Mira mahanta goreang pisang. Tan Koti indak saba lai, hup.! Tangan nyo tibo di piriang goreang. "Owaiiiik.Kaleraa..! angek juo baru mah," tadanga Tan Koti maupek. Pudin galak sengeang. "Itu namonyo takaca goreang angek." "Labiah rancak, dari pado takaca cirik Ayam angek. Tangan busuak, malu dapek," sorong Labai. Di halaman, duo urang saparo bayo malenggang manuju lapau. "Ssst..! Sia nan manuju kamari tu sanak?" kecek Tan Koti sambia managakan jari tunjuaknyo di bibia. Urang nan galak langsuang baranti, sarantak mancaliak ka halaman. "Assalamu'alaikum wa rahmatullahi wa barakatuh," kaduonyo sarantak basuaro diiriangan jo galak manih. Jo muko heran bacampua tando tanyo, Mak Kari manjawek saiiriang urang nan di lapau. "Assalaamu'alaikum wa rahma. Alun salasai sudah salam dijawek, urang nan baduo tadi langsuang mamotong, " Manolah sanak nan basamo. Ambo bagala Datuak Baharago. Di subalah suok ambo bagala... "Datuak Bisa Banego.," sambuangnyo mangamukokan diri, saroman acara Kelompencapir di Televisi. Urang banyak tangango, Tan Koti nan duduak di suduik baitu pulo. Badannyo tinggi badagok, nan mangaku Datuak nan Baharago galak tasanyum, paham jo apo nan manjadi pangana dek urang nan di lapau sahari tu. "Kami kamari manyilau anak kamanakan. Sasuai jo gala nan kami sandang, sapatuiknyolah Panghulu manyilau anak kamanakan, sakurang-kurangnyo manjalang Pamilu sarupo kini," jalehnyo jo suaro barek. Kato-katonyo tanang bakulimek. Datuak Nan Bisa Banego maangguak-angguak sajo di subalahnyo, sambia mauruik-uruik jangguik. Kaduo urang tadi babaju gadang biludu lakan. Langan tasenseang indak pamberang. Pangipeh angek nak nyo dingin. Pahampek gabuak nak nyo tarang. Baju kabasaran Panghulu sajak dahulu. Di kapalo tatonggok saluak batiak batimbo. Bayangan isi dalam kulik. Panjang tak dapek diukua, leba tak dapek dibilai. Salilik lingkaran kaniang, ikek sa tuang jo kapalo. Tiok katuak baundang-undang. Tiok karuik budi marangkak. Tabuak dek paham tiok lipek. Lebanyo pandindiang kampuang. Baitu pangajaran niniak mamak nan takana dek Mak Kari. "Duduak lah mak Datuak. Apo nan ka ambo buekan," baso si Mira mambaranikan diri. "Bialah kami tagak sajo, sabab kami baduo ka basugiro, baliak ka Jakarta malapor ka Datuak Rajo Kuaso nan mautuih ambo.," kato urang nan mangaku Datuak Nan Baharago. "Kalau ambo harus malaporkan hasil karajo induak samang ambo, Bundo Kand.," "Setooop..! Usah sanak lanjuikan manyabuik namonyo. Indak sumbarang padusi dapek malakekan gala sakahandak hati..! Cukuik kami tahino dek urang-urang nan gilo kuaso...! Indak bamalu, barani maateh namokan kami basamo. Tanggakan pakaian nan lakek dibadan kalian baduo. Capeeek..! Braaakk..! Praaang..!" Urang nan sadang tagak di hadokannyo manjawek jo galak sengeang,"Kami justru mampajuangkan harago diri urang MInangkabau ko.Kok untuang ado juo urang awak nan jadi mantari di kabinet nan ka datang," jawek Datuak Nan Baharago ka Mak Kari. "Kami baduo lah mangatur strategi, kalian nan indak mangarati.mabuak dek kabanggaan kosong indak barisi. Sibuk dek mangkaji adaik, tapi indak ado mamfa'aik," tukuak Datuak Nan Bisa Banego. Mak Kari tasingguang barek. Mandanga kato nan disampaikan dek urang tadi Mak Kari batambah sakik hati. Dilayangkan kakinyo ka rusuak Datuak Nan Baharago, Mak Kari mampakirokan kakinyo bisa maramuakan tulang rusuak urang ko. Dihujonyo sakareh-karehnyo, "Uhhh..!" cueknyo sairiang jo suaro. Tapi, uang nan ditujunyo tadi galak sengeang sajo. Indak ado bakeh nan lakek di rusuaknyo. Mak Kari batambah paneh, inyo ambiak ancang-ancang sakali lai. "Astaghfirullahal 'Adziim.Mak Kariii..!" pakiak si Mira sambia mambuka pintu kamar, mancaliak apo nan tajadi. "Capek Miraa..! Siram kalera nan baduo ko jo aia angek..mambuek malu urang Minang karajonyo. Mantang-mantang mamakai saluak jo tungkek Datuak, inyo lah maraso punyo hak ma-ateh namokan urang Minang untuak dukuang mandukuang di nagari ko.Bunduang..!" umpeknyo manjadi-jadi. "Braakk..!" Tumik Mak Kari tibo di dindiang. Tan Koti jo Pudin sarato Labai masuak ka kamar Mak Kari lalok. "Mangucaplah sanak.mangucaplah.," sorak Labai ka Mak Kari. Inyo indak talok mandakek, karano takuik kanai kaki dek Mak Kari nan pandeka tu. "Mak.Jagolah Mak.Mangucaplah.," si Mira maingekan mamaknyo sambia manangih, cameh mancaliak mamak nan sangaik di sayangnyo tu manggigau sarupo urang kasetanan. Mak Kari. Sakutiko Mak Kari diam, indak manggarik. Urang saliang mamandang. Lambek-lambek Mak Kari manguliek. Dihelonyo hangok dalam, "Astaghfirullahhal 'Adziim, astaghfirullahal 'adziim." katonyo baulang-ulang. "Alhamdulillah.! Mamak alah sadar," sorak si Mira girang. "Minumlah dulu mak, tampaknyo mamak manggigau...," sambuangnyo sambia ma-onyok-an galeh barisi aia putiah ka Mak Kari. "Astaghfirullah.Bamimpi ambo tadi.!" (Viveri Yudi) http://padangekspres.com/mod.php?mod=publisher&op=viewarticle&artid=783 ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
