Urang gaek, dunsanak2 ambo, sarato urang di kampuang ambo mamanggia ambo jo si "Af".
Tapi kecenderungan urang mamanggia namo tantu jo namo depan. Mangka dipanggia urang pulo lah ambo jo si "Wadi".
Padohal, urang gaek ambo maagiah namo depan "Wady" ka kami kasadonyo (ambo baranam urang kami badunsanak).
Memang ado semacam "mode" wakatu dulu tu di daerah sakitar kampuang ambo tu. Yaitu maagiah namo anak pangkanyo samo kasadonyo, dari nan gadang sampai nan ketek.
Kawan ambo samaso SMA (Limbonang) ado pulo nan coitu.
Ado surang kawan ambo nan namo lengkapnyo Jeki Koswandi, urang Tanjuang Jati. Panggilan nyo di rumah adolah Wandi. Sedangkan di sikola kami mahimbaunyo sbg "Jeki". Padohal namo depan kakaknyo adolah "Jeki" pulo. Baitu pulo adiaknyo. Kironyo gaek kami sakawan.
Ambo raso, caro ko agak kurang praktis untuak ditaruihkan. Untuak nan taralah, tantu ndak paralu awak barusuah pulo karano itu, cuma untuak maso ka datang, tibo di awak jo anak2 kito jikok dapek dipaelok-i. Labiah praktis lai jikok namo balakang disaragamkan daripado namo depan.
Dek karano alah tabiaso dipanggia urang jo si "Wadi" ko. Mangko bialah kito taruihkan sajo coitu dalam maota di palanta ko.
Sabab, jikok ditanyokan si "Af" di Paruang, iyo agak bakaruik kaniang urang dinyo.
Kutiko maota di udaro jo Mak Bandaro Labiah di RRI Bogor, ambo mintak pulo baitu. Sabab, sasudah Mak Ban maajak ambo ka studio tu, alah ambo serakkan pulo ota ka urang lain (kan alah samo tau kito si Wadi nan gadang ota ko) bahaso ambo ka siaran di RRI Bogor. Jikok namo si "Af' juo nan disabuik Mak Ban, beko dikecekkan urang nan mandanga ambo baduto, "Indak ado bagai si Wadi di RRI tu do, ota-nyo se nan gadang." Baitu kecek urang beko.
Jadi bialah kito taruihkan sajo nan taralah, dunsanak kasadonyo.
Maaf ambo puhunkan bakeh dunsanak kasadonyo, jikok alah bapanjang leba pulo ambo dek pakaro nambo ambo ko. Bantuak2 ambo se nan diuruih urang di palanta ko.
Talabiah jo takurang, tasasek takaleru, tasalah sarato jangga, maaf manyudahi.
Wassalam, Wadi (30th)
____________________________________________________
Berhenti/mengganti konfigurasi keanggotaan anda, silahkan ke: http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
