Title: Message
Topics / Ciloteh
Minang
Lapau Mak
Kari
Adaik Salingka
DPRD
By
padangekspres
Senin, 24-Mei-2004, 02:56:54 WIB2 klik
Alah pacah kaba di dalam kampuang, tabatiak barito
sampai ka tanah jao, taruih ka pulau Celebes, maleba
sampai ka pulau Maluku jo Sulawesi, ganok jo Irian
sarato ka Flores di NTT.
Mandagiang talingo urang di rantau, tabulancik mato rakyaik di
muko Televisi, bakaruik kaniang urang nan mambaco koran di
sagalosuduik. Iyo tantangan anggota DPRD Sumatera Barat nan
divonis duo tahun sampai duo puluah tujuah bulan. Baitu pulo
anggota legislatif kota Padang, sapuluah urang lalok di
kandang situmbin, Lembaga Pemasyarakatan caro rang kini.
Satiok suduik urang bacurito, tiok Lapau urang maota,
bagunjiang ria tantangan barito nan Ruuuaaarrr biaso nantun.
Ado nan satuju, ado nan indak, ado pulo nan manangguak di aia
karuah. Kapalo nan samo babulu, pangana surang-surang.
Di hari sahari nantun, lah bakumpua pulo urang di Lapau Mak
Kari. Ado angku Pudin nan acok mambuek talingo urang
angek-angek tangguang. Mak Labai nan sarupo ulamo tangguang,
baitu pulo si Mira anak gadih nan jolong gadang.
Baluluak kapalo awak dibueknyo ko mah Mak Kari.! kecek angku
Pudin dihadok-an urang nan sadang rami di Lapau Mak Kari.
Indak samato itu doh sanak, arang nan tacoreang di kaniang
namonyo ko. Apo juo nan ka dipanggak-an bahaso urang Minang ko
baradaik, tapi indak mamakaikan Adaik nan basandi jo syarak,
syarak nan basandi jo Kitabullah, sambua Udin Kirun, kusia
bendi nan sato maota di patang hari nantun.
Mak Kari icak-icak indak mandanga ota konco-konconyo nan
sadang basumangaik mangaji apo nan sadang tajadi kini. Dek Mak
Kari nan paralu lapaunyo rami, sakali-sakali inyo sato sakaki.
Tangannyo kini sadang manggili tip rikorder usangnyo nan
bamerek JiViCi. Indak lamo antaronyo, tadanga Ratok Risaulai
nan didendangkan dek Syamsimar jo Ajis Sutan Sati.
Manga mangko Adaik Basandi Syarak, Syarak Basandi Kitabullah
bagai nan ba baco. Maraso baluluak bagai kapalo. Manuruik ambo
DPRD tu bukan Limbago Adaik, apolai limbago agamo. Manga
dicaliak jo kacomato awak urang baradaik, Mak Kari muloi
basuaro.
Tapi kito kan urang baradaik.., jawek angku Pudin indak
namuah kalah.
Mak Kari galak tasengeang mandanga kecek Pudin. Sambia
mamelok-an kain saruang inyo mangecek, Ado adaik nan sabana
adaik, ado adaik nan diadaik-an, ado adaik nan taradaik, ado
pulo adaik istiadaik.
Satiok urang nan duduak di Lapau madok sambia manyimak pati
kato nan sadang disampaikan dek Mak Kari. Sakutiko itu indak
ado garah sarato galak nan badarai nan biaso tadanga dari
Lapau ba-atok rumbio di suduik kampuang nantun. Nan tadanga
hanyo bunyi saluang nan batingkah jo dasie minyak
panggoreangan dari dapue si Mira.
Lain padang lain Bilalang, lain lubuak lain ikannyo. Itu nan
dinamokan adaik salingka nagari, baitu Mak Kari manjalehkan
ka urang basamo.
Jadi buliah pulo anggota legislatif tu mambuek adaik nan
salingka DPRD tu Mak?, tanyo Pudin sakutiko, sambia galak
sengeang.
Mandanga kato nan sarupo itu, kasado mato mancaliak ka si
Pudin. Inyo jadi salah tingkah.
Eee..e..mungkasuik ambo, anu Mak..ee..anu
Ha..ha..ha.., tibo-tibo sado urang tagalak gadang. Pudin
manggusuak-gusuak kapalo sulahnyo. Tambah aia Mira. Tambah
hauih den ko mah, hariaknyo ka dapue untuak ma-ilangkan
cangguang.
Mak Kari nan ditanyo manahan galak, dijaweknyo juo tanyo
sumbang dunsanaknyo ko. Sapanjang lai sasuai jo Alua sarato
patuik. Patuik nan basanda ka syarak, syarak bahulu ka
Kitabullah, apo pulo salahnyo.
Mancaliak batang karambia ko alah rabah, Mak Labai sato pulo
batenggek. Sambia menyendeangkan mato ka Pudin, inyo sato
manyolo, Tapi kok basanda ka napasu, bahulu ka karajo syetan,
tantu manyumpah aruah niniak muyang kito ndak Mak Kari.
Manuruik Mak Kari, labiah rancak awak bacamin diri. Banyak
bancano nan alah tajadi di nagari awak nangko. Mulai dari
gampo nan mahoyak bumi, sampai tanah longsor nan manimbun
dunsanak awak di Pasaman. Kini sarupo iko pulo barito nan
didanga, mamintak awak ka nan Kuaso, badoalah awak basamo
supayo jan ado lai bancano nan sarupo iko.
Indak ado gadiang nan tak ratak. Awak manusia biaso, salah jo
khilaf ka manjadi sifaik. Banyak mangecek, banyak salah. Kana
pulo anak-bini sarato keluarga dunsanak awak nan sadang dapek
cobaan nantun. Bia lah hukum nan kamanantukan.
Nan bungkuak makanan