Lapau Mak Kari : "Nan Sasuai jo Adaik, Nan Sajalan jo Agamo" By padangekspresSenin, 14-Juni-2004, 04:27:41 WIB
"Satiok simpang, lah panuah dek anak-anak ketek, nan ba-main di tangah jalan, ma-manjek-manjek oto urang sambia banyanyi-nyanyi. Kama muko ka awak suruak-an...!" Kato-kato nan disampaikan Pudin tadi bak raso bunyi mariam di talingo urang nan sadang duduak di Lapau Mak Kari, sahari nantun. Urang-urang saliang bapandangan jo muko nan sirah-sirah masam. "Awak lai nagari baradaik. Dima lataknyo anak dipangku, kamanakan dibimbiang tu. Dima lataknyo Sahino-sa malu sa-samo urang Minang nan awak bangga-banggakan dek niniak mamak tu?," tambah Pudin sambia bakacak pinggang. Mak Kari paham bana jo kakobeh konco palangkinnyo nan mangecek tadi. Adaik nan dipakaikan Pudin, bak adaik Dubalang. Suko bakato mandareh, mahariak mahantam tanah. Tabujua lalu, tabulintang patah. Babeda bana jo adaik nan dipakaikan dek Mak Labai nan gadang di Surau. Jikok bakato mamakaikan ayaik jo hadih, kadang-kadang mangaluakan riwayaik dari Nabi. Samantaro Pudin hiduik di balai, baru duo tahun ko batobaik, sujuik di lapiak sumbayang. Lain pulo kakobeh si Mira, kamanakan di bawah lutuik dek Mak Kari. Walaupun sikola tamaik Paguruan Tinggi, namun mamakaikan taratik Millenium. Bamuluik lancang, indak manenggang. Apo nan taraso dikarajokannyo, apo nan takana dikatokannyo. Indak tantu urang ka tasingguang,to the point keceknyo. Generasi Millenium katonyo. "Manga dibao rabah padi sarumpun. Sabatang nan baulek, usah sarumpun nan disabik," kecek Mak Kari mamakaikan kieh. "Indak elok manuduah-nuduah sajo. Indak buliah ba-buruak sangko," tambah Mak Labai nan duduak di suduik. "Bana tu sanak," sambuang Mak Kari. "Tantangan anak kamanakan awak nan di jalan tu indak bisa di latak-an ka kuduak niniak mamak sajo doh. Disinan ado tangguang jawab Pamarentah, sasuai jo undang-undang nan dibuek. Tantu ado pulo tangguang jawab urang kampuang, alim ulama sarato cadiak pandai," tukuaknyo pulo. Mak Labai mamelok-an latak kupiah. Pudin ma-angguak-angguak tando mangarati. Tibo-tibo inyo tagak. Jari tunjuaknyio dilatak-an di kaniang sulahnyo. Tampaknyo ado pangana elok nan sadang baputa di kapalonyo. "Haa...aden ado pangana..!" katonyo. Urang nan sadang duduak di Lapau madok ka Pudin. Manunggu kato-kato nan ka kalua dari muluik lawehnyo. "Den raso iko sasuai jo adaik kito, sajalan jo ugamo," tambahnyo. "Capek se lah katokan Angku, buliah nak salasai," hariak si Mira dari dapua. Ruponyo kamanakan Mak Kari nan bijak ko manyimak dari tadi. Pudin indak icak-icak indak mandanga. Si Mira batambah manggaritih. "Cubo danga dek sanak elok-elok... Sakironyo satiok ustadz atau ulama di nagari awakko basadio mangumpuakan limo urang nan patuik mambaia zakat di sa-kaliliang tampek tingganyo surang-surang, mako bisa takumpua Duo Puluah Limo Ribu urang nan mamabaia zakat satiok tahunnyo,'" kecek Pudin sarupo lakon sandiwara. Urang nan mandanga saliang mamandang, ma-angguak-angguak tando paham. "Kalau satiok zakat maal dapek manjadi pokok galeh dek ciek keluarga, mako ustadz jo ulama alah mancarikan jalan untuak mahiduiki Duo Puluah Limo Ribu keluarga dunsanak awak nan miskin. Bara nyao nan tatolong tu sanak," sambuang Mak Labai basumangaik. Mak Kari tagalak sengeang, dalam hatinyo inyo basyukur ka nan Kuaso, dek karano ditunjuak-an jalan nan sasuai jo adaik sarato agamo nan kito pakai. Apolai kalau satiok Niniak Mamak namuah mangarajokannyo di satiok Sukunyo. "Kalau baitu, alah bak Siriah pulang ka gagangnyo, bak Pinang baliak ka tampuaknyo, Indak muek dek tapak tangan, jo nyiru kito tampuangkan," kecek Mak Kari mambanakan. Tibo-tibo suaro si Mira malangkiang dari dapua; "Sia kiro-kiro nan ka mamulai tu Maaak..! Sia nan ka namuah inyo mangarajokan ? Nan banyak hanyo pandai bacurito sajo. Tapi indak namuah ba-susah payah untuak urang banyak..?" Lapau haniang sakutiko, Mak Labai diam pulo, Pudin tangango-ngango, Mak Kari bado'a sajo, arok kok lai ado pambaco nan ka mancubo. Wallahualam bissawaab. (viveri yudi) Padang Ekspres Online : http://www.padangekspres.com/ Versi online: http://www.padangekspres.com/mod.php?mod=publisher&op=viewarticle&artid=2812 7 ____________________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net ____________________________________________________
