Sabananyo taragak bana mandanga dantuangnnyo tu, apo lai mancubo ma ambuih dan mamatiak an apo kadalam lubang sumbunyo, tapi......
Salam. Lah sampai sagaek ko, Mangkutak tatap se katuju main mariam batuang. Labiah-labiah malam manjalang rirayo. Indak dapuli dek inyo urang sadang sumbayang tarawih atau sadang tadaruih. Dulu, kutiko ketek-ketek, mariam batuang dibuek dari buluah, dilubangi, diagiah minyak tanah, dipanciang jo api. Diambuih asknyo. Malatuih saroman bunyi mariam. Sabai lah tabik suga managahan Mangkutak. Tapi nan tatagah indak tatagah. Dilapeh juo molah nan jadi. Kasudahannyo Mangkutak malapeh mariam batuang sakandak hati. Kama madok se. Lai malatuih, sia nan jadi sasaran indak paduli. Apo nan jadi sasaran itu jangkang dek mariam batuang tu atau indak, indak pulo inyo paduli. Nan penting main mariam batuang. Kini, Mangkutak main mariam batuang pulo baliak. Mariam batuang gaya globalisasi. Mangkutak indak paduli lai sasaran mariam batuangnyo. Indak paduli lai ka madok muncuang marim tu. Nan penting dek inyo malatuih. Lai malatuih, alah jadi dinyo tu. Baitulah kaadaan Mangkutak. Nan penting ado latusan. Kalau main mercon indak bulah, indak molah. Tapi main mariam batuang sia nan malarang. Itu mainan tradisi. "Ciak. Waden ka mamatenan mariam batuang ko mah ciak. Kok indak dipatenkan, beko diambiak lo dek urang. Nyo kecek an pulo mariam batuang tu hasil budaya inyo," kecek Mangkutak ka aciaknyo Sabai Nan Aluih. Tasambua galak Sabai Nan Aluih mandanga rencana Mangkutak, adiaknyo nan ongok-ongok tangguang tu. "Baa kok mariam batuang bana nan ka waang patenan? Sia pulo nan ka nio jo mariam roman tu. Malatuih lai bapiluru indak. Barasok lai tapi kanai sasaran indak. Lah katinggalan mariam waang tu mah Mang," jawek Sabai managahan rencana Mangkutak tu. "Mariam batuang tu milik budaya awak. Milik tradisi awak. Itulah mariam nenek muyang nan masiah dapek awak lesterikan sampai kini," sonsoang Mangkutak. "Tapi itu kan permainan. Bukan meriam nan sabananyo," jawek Sabai. "E, aciak lai. Kini ko sadonyo permainan mah ciak. Mulai dari pemilihan walinagari, camat, bupati, walikota, gubernur, menteri, pemilihan ketua partai sadonyo tu permainan," kecek Mangkutak. "Itu lain pulo permainannyo mah. Permainan urang-urang bapitih banyak." "Dek karano awak indak bapitih banyak mako awak cukuik main mariam batuang sajo. Bunyinyo sakareh bunyi mariam, asoknyo banyak daripado asok mariam, maiduiknyo murah indak paralu teknologi tenggi, sudah dipakai bisa dijadian kayu di tungku, pokoknyo mariam batuang tu bisa serba guna," kato Mangkutak. "Jadi, apo mukasuik waang nan sabananyo ko? Baa mangko di patenkan bana mariam batuang tu? Apo memang baitu model awak iduik kini?" tanyo Sabai. "Santiang aciak den. Iyo baitu kini. Nan penting bunyi. Lai manakuik an bunyi tu. Mariam nan sabananyo indak paralu diawak kini doh ciak. Buek apo mariam dibali, tapi indak panah dilatuihan. Pulau dirampok urang, mariam awak haniang. Pulau dilego urang, mariam awak haniang," kato Mangkutak. "O, jadi waang nak ka mamatenkan mariam batuang tu dek karano iduk awak kini lah saroman mariam batuang tu? Mariam batuang tu kan cuma mancogok kutiko bulan puaso. Pangajuik-ngajuik an urang sumbayang taraweh sajo," solo Sabai. "Itu nan penting. Nan penting awak takajuik. Sudah takajuik alah tu. Ampok takajuik kecek urang di lapau. Mukasuiknyo urang tabang hambua ka ilie ka mudiak takuik ditangkok polisi," kato Mangkutak. "Mang. Bila waang ka baranti main mariam batuang tu ha?" tanyo Sabai. "Baranti? Maa bisa! Indak usye ye! Kini lah sadonyo urang main mariam batuang. Manga awak musti baranti? Justru awak harus mematenkan permainan ko supayo diakui dunia," kato Mangkutak basumangaik.(Wisran Hadi) http://padang-today.com/index.php?today=kakobeh&id=105 Selasa, 15/09/2009 11:58 WIB --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: rantaunet-unsubscr...@googlegroups.com Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---