Yth. Dunsanak sabalik Palanta Rantau Net nan ambo hormati; Assalamu'alaikum W.W. Pado saat ambo manulihkan surek ko bakeh dunsanak kasadonyo nan ambo hormati, ambo ado dalam keadaan sehat wal-afiat lai indak kakurangan apopun juga. Mudah-mudahan baitu pulo andaknyo jo kito kasadonyo disiko; nan ketek kok indak ambo sabuikkan namo, nan gadang indak ambo himbaukan gala. Bbrp wakatu nan lalu, ambo pernah mangirim suatu carito nan bajudul "Indak Ado nan Tau" ka Palanta ko. Carito iko ukan lah carito baru, melainkan carito nan ambo tulih di sebuah tengah malam pado taun 2006. Ambo pernah mangirimkan carito ko ka Palanta Urang Awak, namun ndak banyak tanggapan nan ambo tarimo. Kapatang ko ambo cubo pulo mangirim bakeh palanta ko dengan harapan bermanfaat lah handaknyo - walaupun saketek - bagi kito basamo. Namun sasudah ambo mangirim tu, ambo caliak baliak, ternyata carito ambo ko mamanjang sajo dari pangka sampai ka ujuang bak cando tali barua; indak baalinea baparagraf. Ambo sendiri agak paniang mambaco, ambo raso dunsanak nan lain tantu baitu pulo. Baa lah ambo indak usua pareso sabalun bakirimkan, ba-kopi paste sajo dari notepad ka email, sahinggo surek tu takirim sarupo itu. Ragu lah tibo di ambo: jikok diulang mangirim baliak, kok manyeso bakeh nan rami. Namun jikok ndak dikirim mungkasuik ambo ndak sampai dalam menyajikan carito - bak cando si bisu barasian pulo beko. Sasudah baretong di dalam hati sarupo itu, mangko ambo cubolah mangirimkan carito ko baliak, nan alah ungguak-ungguak tiok alinea bakcando karangan normal, nan alah babarih baririk bak pinang. Maaf jo rila ambo pintak, bakeh dunsanak nan kurang berkenan ateh surek ambo ko (mungkin ado nan bakato dalam hati: baa kok si Wadi kanai ko itu-ka-itu sajo nan dikirimkannyo). Maklum jo pangaratian nan ambo harok, jan sampai manyeso ka nan banyak - mudah-mudahan ado juo barakaiknyo. Ateh babarapo niniak mamak nan lah mambari tanggapan, tarutamo Mamanda Mulyadi SH dan nan lain-lain nan indak ambo sabuikkan, ambo mangucapkan tarimo kasih nan sagadang-gadangnyo. Pujian dari baliau sungguah manggadangkan hati ambo, ka jadi ubek jariah pailang rangkik-rangkik. Baitu pulo bakeh Mamanda Bandaro Labiah; lah lamo ambo indak basuo jo baliau sajak ambo pernah diundang untuak maota-ota di udaro di RRI Bogor bbrp tahun nan lalu. Ambo taragak bana nak mahambuih-hambuih buluah sarueh (bansi) di sarato maota-ota jo dunsanak kito lwt udaro tu Mak, namun karano tampek tingga lah ba-alieh pulo kini ka Jakarta Selatan, indak di Parung lai, mangko batambah jauah lah langkah ambo dari RRI Bogor mak. Namun baitu jikok lai panjang juo umua kito sarato diagiah kesempatan dek nan Maha Kuaso, Insya Allah ambo ka manyigi manyilau baliak bakeh studio mamak. Sakian dulu kaba barito dari Ambo. Mohon maaf karano lah jarang mancogok ka palanta, indak lain dan indak ukan karano sawah jo ladang nan mangurehkan (sibuk karajo kecek rang kini). Namun baitu, dek lamo lupo lupo lai nyo ndak tibo; dunsanak-dunsanak di palanta ko tatap takana juo dek ambo. Dek banyak ragu lai alun nyo datang; walaupun banyak palanta-palanta bertema Minang namun palanta Rantau Net lai tatap di hati ambo. Di bawah ko ambo kirimkan baliak nan tadi ambo mungkasuik tu, tairiang ma'af jo rila bakeh dunsanak nan kurang berkenan. Wassalam, W.A. Sutan Pamenan (33 tahun) Pikumbuah - Jakarta Selatan ==================== "Indak Ado Nan Tau" Dicaritokan dek: Wady Afriadi Sutan Pamenan Pado maso saisuak, ado surang saudagar nan kayo rayo hiduik di Ranah Minangkabau, awak sabuik sajo namonyo sebagai Sutan Rajo Kayo Nan Bapitih. Balain si Karun dalam carito-carito nan manumpuak harato sahinggo lupo kapado Allah SWT, sahinggo haratonyo tu pulo nan mambunuahnyo sarato mambaoknyo masuak narako; Sutan Rajo Kayo Nan Bapitih ko indaklah bakcando itu. Walaupun kayo balindak, rumah nan gadang bak cando istano, ameh sagadang lasuang (nan indak ditampakkannyo ka nan rami), namun Sutan Rajo Kayo Nan Bapitih ko indaklah lupo kapado Allah SWT. Baliau adolah saudagar nan shaleh sarato suko membantu fakir miskin. Musajik didirikannyo, surau baitu pulo. Alah tigo kaum nan mamintak bantuan mandirikan surau, katigo-tigonyo nyo bantu dek Sutan Rajo Kayo ko, dari pasang batu, tagak kudo-kudo sampai pasang parabuangan. Syahdan, pado suatu hari, adolah salah surang pemuda miskin nan datang kapado Sutan Rajo Kayo nan Bapitih ko andak malamar mancari karajo. Kito sabuik sajo namonyo Buyuang Ketek, walaupun bangkalainyo sabananyo indak ketek, ndak sasuai jo namonyo. "Manolah Sutan Rajo Kayo Nan Bapitih." Kecek Buyuang Ketek mambukak sambah. Sasudah tu nyo sambuang jo alua antah bara ratuih pantun nan basabuik antah bara halaman alua nan dibaconyo, tapi nan intinyo ciek: yaitu wanyo mintak karajo ka Sutan Rajo Kayo. " Apo kapandaian Angku?" Tanyo Sutan Rajo Kayo. Mangko dijawek lah pulo dek Buyuang Ketek jo bahaso nan indak kalah manihnyo bahaso kapandaian wanyo iyo banyak; sagalo manaruah. Dari karajo balunau (mamangkua sawah) sampai karajo barasiah, batukang. Dari manggali sumua nan dalam sampai mamasang gonjong rumah gadang nan tinggi manjulang kateh langik, dari mamaliharo nan baangok (bataranak) sampai mananam nan bapucuak (bacocok tanam). "Jadihlah." Manitah Sutan Rajo Kayo. "Angku ambo tarimo bakarajo jo Ambo, anak mudo. Ambo agiah angku maso percobaan (probation) tigo bulan. Jikok lah lewaik tigo bulan tu ambo agiah tau bakeh angku apokah angku taruh bakarajo disiko atau cukuk kontrak sampai disiko. Si Upiak Banun, sekretaris ambo, akan maagiahkan tugeh-tugeh nan harus angku karajokan bisuak pagi." Mangko mulailah Buyuang Ketek karajo jo Sutan Rajo Kayo nan Bapitih tu. Tugeh partamo nan diagiahnyo, indak tangguang-tangguang barek, mambuek rangkiang (lumbuang padi) gadang, bagonjong sarato baukiran, harus salasai dalam tigo hari! Batabik paluah Buyuang Ketek mamuta kincia-kincianyo supayo baa karajo bisa capek dan efektif, sahinggo dalam tenggat waktu nan ditentukan, rangkiang tu alah sarah terima kunci ka Sutan Rajo Kayo. Indak lewaik dari tangah hari di hari nan katigo, alah salasai rangkiang tu dek si Buyuang Ketek. Takajuk bacampua heran Sutan Rajo Kayo, indak disangko anak mudo nan banamo Buyuang Ketek ko bisa mangarajokan sagadang tu. Mangko diagiahnyo pulo tugeh nan kaduo, yaitu: Mambelokkan aliran batang aia Namang sahinggo mengaliri lurah dima sawah Sutan Rajo Kayo batumpak, dan harus salasai dalam duo hari sajo! Ondeh, raso ndak kamungkin si Buyuang Ketek sanggup mangarajokan tugeh tu. Batang Namang ukanlah banda ketek, tapi sungai salaweh tujuah dapo! Basitungkin pulo lah Buyuang Ketek mamuta utak manjalankan kincia-kincianyo, baa caronyo batang aia tu harus dikelokkan sahinggo mengaliri sawah lurah Sutan Rajo Kayo, dan salasai dalam duo hari... Berkat rahmat Allah SWT kapadonyo juo (untuak mampasingkek carito, usahlah ambo jalehkan disiko sacaro teknis baa si Buyuang tu mangali sarato mamindahkan aliran sungai tu), mangko proyek si Buyuang tu bahkan dapek disalasaikannyo hanyo dalam wakatu satu satangah hari! Ampia takarambuang Sutan Rajo Kayo Nan Bapitih mancaliak batang aia Namang alah pindah, bakelok mengairi areal persawahan punyo Sutan Rajo Kayo, sahinggo hasia padi bisa diharokkan meningkat, dari hanyo limo ratuih gantang sapiriang (sapetak) sawah manjadi saribu gantang sapiriang. Dan Sutan Kayo hanyo tinggak maetong bara piriang sawah nyo di lurah tu, kalikan saribu. Sakitu lah perkiraan hasil padi di musim manuai nan katibo! Sasudah baranti panek si Buyuang Ketek kiro-kiro abih sabatang paisok, mangko dipanggia lah wanyo dek Sutan Rajo Kayo baliak untuak manamui baliau di ateh tingkah rumah gadang nan sagadang istano Pagaruyuang tu. "Buyuang Ketek," Titah Sutan Rajo Kayo Nan Bapitih tu bawibawa. "Alah duo kali ambo mahagiahkan bakeh angku karajo nan sangaik barek, namun kaduo-duonyo angku salasaikan hanyo dalam wakatu sakejap sajo." "Ambo Sutan Rajo Kayo." Sahuik Buyuang Ketek jo suaro nan agak gametar. Apo pulo karajo lain nan ka diagiahkannyo bakeh ambo? Baitu tanyo dalam hati Buyuang Ketek agak-agak cameh. "Karajo nan katigo nan ka ambo agiahkan bakeh angku, adolah karajo nan sangaik ringan." Lanjuik Sutan Rajo Kayo. "Apopun itu Sutan, ambo maanjuang tinggi mahamba gadang titah dari Sutan." Sahuk Buyuang Ketek mempersiapkan diri. "Ambo ka mamintak tolong bakeh angku untuak mandabiah ayam jantan ambo nan banamo si Kurai Taji." "Jikok baitu titah Sutan Rajo Kayo, utang di ambo malakukan." Jawek si BK. "Namun ado syaraiknyo ciek, Buyuang. Ayam ko harus angku dabiah di suatu tampek nan sangaik dirahasiokan, sahinggo indak surang pun nan tau bahaso angku mandabiah ayam ko. Sudah tu baru angku bao ayam nan alah badabiah ko bakeh ambo baliak. Kalau alah salasai dek angku tugeh tu, mangko angku sacaro resmi ambo nyatokan sebagai karyawan tetap ambo." Indak abih pikia si Buyuang Ketek, apo sariknyo mandabiah ayam basisuruak tu? Namun si Buyuang capek manjawek: "Ambo siap Sutan." Mangko basiua lah si Sutan Kayo, "Switt..." Siua nan singkek sajo, tapi ruponyo itu adolah panggilan khusus untuak si ayam jantan nan banamo Kurai Taji, tibo-tibo wanyo tabang mancogok di pintu rumah gadang, malompek ka hadapan Sutan Rajo Kayo Nan Bapitih, tuannyo nan ruponyo sangaik disaganinyo tu. "Koq... Koq.. Koq.." Baitu bunyi si Kurai Taji sambia bajalan baputa-puta di kaki Sutan Rajo Kayo. Mangko diambiaknyo lah dek Sutan Kayo ayam jantan nan sangaik rancak tu, dikabeknyo kakinyo, diagiahkannyo bakeh si Buyuang Ketek. "Iko nyo buyuang, dabiah lah di tampek nan tasuruak. Ingek, INDAK buliah surang juo nan tau! Jikok sampai ado nan tau, mangko tugas angku ambo nyatokan gagal! Jaleh?" Mangko pailah si Buyuang Ketek sambia mangapik ayam jantan tu, mancari tampek nan tasuruak sambia mambaok pisau sabilah. Namun alah kiro-kiro ampek hari ampek malam si Buyuang Ketek tu mailang mancari tampek nan tasuruak, alun juo tampak batang iduangnyo babaliak sambia mambaok ayam nan alah badabiah. Di hari nan katujuah, pas hari Jumaaik, kiro-kiro matohari baru tabik di wakatu sadangelok sumbayang dhuha, mancogok lah si Buyuang Ketek jo mato nan kuyu sarato wajah nan sangaik latiah tampaknyo. Herannyo lagi, ayam nan dibaoknyo pulang bukan ayam mati nan alah badabiah, tapi ayam jantan si Kurai Taji nan masih hiduik juo baru, bahkan sangaik sehat tampaknyo! "Mano lah Sutan Rajo Kayo Nan Bapitih!" Seru si Buyuang Ketek bakeh urang diateh rumah gadang. Mangko kalualah Sutan Rajo Kayo dengan pakaian sarato tungkek kebesarannyo. "Wahai Buyuang Ketek, apo nan tajadi sahinggo tujuah hari tujuah malam angku mahilang, tapi nan ayam tu alun tadabiah juo?" Sabalun manjawek tanyo Sutan Rajo Kayo, dilapehkannyo dek si Buyuang Ketek si Kurai Taji tu di halaman rumah gadang, lalu malompek nyo ka tunggua karambia, dikapakkannyo sayoknyo tigo kali, langsuang nyo baeh bakukuak panjang: "Kkukuruyuuaakkkkk...!" Maramang bulu kuduak sado urang nan tagak di halaman, nampaknyo si Kurai Taji ko bukan ayam sumbarang ayam, melainkan ayam nan sati jo batuah sahinggo alah tujuah hari tujuah malam wakatu abih, namun si Buyuang Ketek indak juo berhasil mandabiahnyo. Manyoru lah Buyuang Ketek sudah tu: "Iyo alah gagal ambo melaksanakan tugeh Angku, Sutan Rajo kayo." Kasado mato di halaman rumah gadang langsuang manuju bakeh si BK manunggu kelanjutan keceknyo. "Ari partamo pai ambo ka puncak gunuang, namun ambo indak bisa mandabiah ayam Sutan ko karano ruponyo ado nan mancaliakkan ambo; ado nan tau bahaso ambo ka mandabiah ayam ko." "Ari kaduo masuak ambo ka guo nan paliang dalam, tapi ado juo baru nan tau bahaso ambo ka mandabiah ayam ko. Ari katigo dan seterusnyo, alah berbagai tampek nan ambo jelajahi, dari rimbo nan paliang labek sampai lautan nan laweh indak batapi, tapi ado juo baru nan mancaliakkan ambo..." "Akhianyo ambo sadar, wahai Sutan Rajo Kayo Nan Bapitih nan budiman, bahaso ambo indak sanggup mangarajokan tugeh angku ko doh." Tatagun kasado nan hadir. Urang lah balungguak di halaman rumah gadang tu, kasadonyo mambulalang raso ndak pacayo ka apo nan tajadi. Alun sempat Sutan Rajo Kayo manitah, disambuang dek Buyuang Ketek keceknyo: "Dengan ini ambo secara resmi mengundurkan diri dari jabatan nan ambo apply, karano ambo nyato indak sanggup melaksanakan perintah Sutan Rajo Kayo nan sabananyo tampak ringan tu." Mangko dicampakkannyolah dek si Buyuang Ketek KKS (Kartu Karyawan Samantaro) dari perusahaan Sutan Rajo Kayo Ltd. nan salamo ko dipaciknyo, nan manunjuakkan bahaso BK ko masih dalam maso probation di Sutan Rajo Kayo Holdings, & Co. Mangko manitahlah Sutan Rajo Kayo: "Wahai Buyuang Ketek, siapokah garangan nan bisa mengikuti engkau bahkan ka tampek-tampek nan paliang langang sarato paliang tasuruak tu?" "Sutan Rajo Kayo... Nan mangikuti ambo kama juo ambo pai, indak lain dan indak ukan adolah Allah SWT nan selalu mengetahui apo nan ambo karajokan." Jawek si BK tegas. Haniang menyelimuti halaman rumah gadang untuak beberapa saat, sahinggo panjaik jatuah pun pasti tadanga. Bahkan banyak pulo nan yakin bahaso malaikaik lalu katiko tu sahinggo tahanianga sajo urang sabanyak tu. Dalam keheningan tu, mangko malangkah lah si Sutan Rajo Kayo mandakek bakeh si Buyuang Ketek. Urang rami batanyo tanyo dalam hati, apokah garangan nan kadilakukan dek Rajo Kayo ka BK? Apokah ka ditampa dilapuaknyo BK ko karano ndak sanggup mangarajokan karajo nan tampaknyo sangaik gampang tu? Namun indak disangko dek nan banyak, tibo-tibo dipaluaknyo si Buyuang Ketek dek Sutan Rajo Kayo Nan Bapitih nan sangaik terhormat tu. Agak heran rang nan banyak, baa mungkin surang Sutan Rajo Kayo mamaluak surang anak mudo matah nan bansaik pulo, nan lah gagal pulo melaksanakan tugeh nan diembannyo? Mangeceklah Sutan Rajo Kayo sambia manangih di bahu si Buyuang Ketek; "Ondeh Buyuang Ketek anakku..." "Memang batua apo nan Ananda katokan, sasungguahnyo kama juo awak pai, apo juo nan awak karajokan walaupun ndak ado urang nan mancaliak, sesungguhnyo Allah SWT Maha-Mengetahui..." "Indak ado karajo awak nan indak diketahui-Nyo..." Kecek Sutan Rajo Kayo sambia taisak-isak. (Sejujurnyo dunsanak, ambopun manangih pulo dinyo katiko manulihkan carito ko- iyobana terharu awak dinyo... titiak aia mato ambo mambayangkan.) "Engkau ukanlah gagal melaksanakan tugeh dari ambo Nak... Ruponyo angku lah nan ambo cari-cari salamo ko namun ndak pernah ambo tamukan..." "Alah ratusan pemuda nan datang bakeh ambo, alah indak taetong pulo ayam ambo nan mati tadabiah... Namun baru angku-lah nan manyadari bahaso kasado perbuatan awak, baik nan baiak atau nan buruak indak lapeh dari pengawasan Allah SWT, wahai anakku..." Lamo Sutan Rajo Kayo taisak-isak di bahu Buyuang Ketek, hadirin di halaman rumah gadang pun banyak nan baurai aia mato (tamasuak penulis - pen.). Nan induak-induak bajaleh-jaleh manangih marauang, sadangkan para pemuda sambia tasipu-sipu manyeka aia mato di suduk matonyo, baitu pulo apak-apak sarato niniak mamak sarato datuak-datuak nan hadir. Kasudahan kaji, si Buyuang Ketek akhianyo diangkek sebagai urang kepercayaan nomor satu Sutan Rajo Kayo Nan Bapitih. Indak itu sajo, si Buyuang Ketek pun akhianyo dikawinkannyo jo anak perempuannyo satu-satunyo dari Sutan Rajo Kayo nan banamo Puti Nilam Bainai, nan sangaik rancak putiah manih sarato jombang. Indak ado pemuda nan indak titiak aia saleronyo jikok mancaliak anak gadih Sutan Rajo Kayo nan jauah labiah rancak dari Paris Hilton nan suko indak bakain tu. -salasai- Bogor , tangah malam malakik ka pagi, Kamis, 20 Juli 2006 M / 23 Jumadil Akhir 1427 H.
--------------------------------- Be a better friend, newshound, and know-it-all with Yahoo! Mobile. Try it now. --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet. - Tuliskan Nama, Umur & Lokasi anda pada setiap posting. - Hapus footer & bagian yg tidak perlu, jika melakukan reply. - Email attachment, DILARANG! Tawarkan kepada yg berminat & kirim melalui jalur pribadi. - Posting email besar dari >200KB akan dibanned, sampai yg bersangkutan minta maaf & menyampaikan komitmen mengikuti peraturan yang berlaku. =============================================================== Berhenti, kirim email kosong ke: [EMAIL PROTECTED] Daftarkan email anda pada Google Account di: https://www.google.com/accounts/NewAccount?hl=id Agar dapat melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---