Maanta Maik ka Kubua
Sabtu, 22/02/2003 11:26 WIB <http://padang-today.com/foto/jilatang/jilatang-2.jpg> Tapurangah si Atang duduak manyanda di kurisi goyang. Lah banyak bana urang basalam jo inyo. Basalam dek karano si Atang alah dianggap sukses mampromosikan budaya Minangkabau jo caro maadokan alek gadang. Acara baralek nan alun panah dibuek urang. Baralek massal. Lah panek tangan si Atang manjawek salam saluruah urang nan tibo maantakan ucapan selamat. Jila, antah dari ma datangnyo, antah bilo tibonyo, tahu-tahu lah ado sajo di muko si Atang. "Maaf. Pak. Waden indak talok manjawek salam urang lai doh. Lah panek. Iyolah. Den tarimo ucapan selamat dari apak. Tarimo kasih. Pai lah lai. Waden ka lalok agak sakalok," kato si Atang sambia mamiciangan mato. Sakik bana hati Jila. "E, Tang! Iko waden! Jila! Kok indak dek waden, indak ka jadi wali waang dek sari, lai tahu waang ndak! Kini indak mancaliak, indak hek indak hok, langsuang waang usie den. Waang samoan waden jo urang-urang nan datang manjilek waang tiok hari, hantu!" hariak si Jila ka talingo si Atang. Atang talambuang. "Ampun den Jila, Waang molah kironyo. Lai mah sato pulo waang maucapkan selamat sukses ka waden. Iyo sabana kawan sejati waang komah," kato si Atang. "Waden datang maagiah tahu, barisuak malam saluruah pangulu ka datang ka rumah waang ko. Mamintak pertanggungan jawab, apo bana alasan waang maadokan barelek saroman ko. Lai manuruik aturan adat, atau nan kalamak dek waang sajo," kato Jila. "Bilo pangulu-pangulu tu ka tibo? Barisuak?" tanyo si Atang tagagau. "Iyo," jawek si Jila. "Apo nan musti waden jawek?" tanyo si Atang. "Ma jaleh di den," kato si Jila. Sapaningga si Jila, Atang jo stafnyo rapek mendadak. Mancari jawek nan tapek kalau pangulu-pangulu tu batanyo, baa mangko diadokan acara baralek gadang indak sasuai jo adat nan biaso dibuek urang. Kalimpasiangan si Atang mancari alasan. Dek tarabo, sempat juo tatinju dek inyo stafnyo nan maagiah masukan. Barisuak sanjo, lah babarih sagalo anak buah si Atang di laman, di muko pintu rumah. Manunggu pangulu nan ka demo. Dek lamo lambek manunggu, lah panek pulo si Atang. Nyo masuak ka biliak. Kutiko inyo di dalam biliak tulah, pangulu-pangulu tu tibo jo rombongannyo. Gempar. Pangulu-pangulu jo urang-urang padusi nan mairiangan, mamakai baju itam sadonyo. Nan nyo iriangan indak pulo tangguang-tangguang. Sambilan karando maik, lengkap jo tutuik kain sarato payuang itamnyo. Rombongan pangulu tu masuak indak talok diambek dek anak buah si Atang. Kasambilan karando maik tu langsuang dilatak an di muko pintu rumah si Atang. Sasudah karando dilatak an, pangulu jo sagalo urang nan mairiangannyo, duduak elok-elok maadok ka karano. Urang-urang tu mulai manangih. Lamo-lamo tangih urang-urang tu samakin kareh. Ado nan tabuik jihin bagai. Iruak rumah si Atang jadinyo. Atang kalua. Nyo caliak karando maik sambilan buah. Urang duduak manangih bajadi-jadi. Atang berang. Nyo hariak urang-urang tu. "Sudah! Sudah!" pakiak si Atang. Urang-urang haniang. "Apo karajo kalian ko! Pangulu apo ko namonyo, nan mambao karano maik ka rumah den! Indak mangarati jo adat!" sumpah si Atang. "O, pak Wali. Lah banyak nan pak wali buek untuk mamajukan adat jo budaya awak. Untuk nampak dek turis. Buliah kagum urang-urang lua nagari tu. Untuak labiah langkok tampak dek turis tu, kini kami manyumbang ciek acara pulo ka pak wali. Iaitunyo, mambuek acara maanta maik ka kubua. Ikolah adat sabana adat, pak wali," kato pangulu nan tuo. "Kalau acara adat baralek, bararak, maanta marapulai, bukak tapai, makan bajamba, alah acok bana pak wali buek. Seakan-akan urang Minang ko karajonyo makan, babini, makan babini. Seakan indak ado urang Minang ko nan mati. Padohal banyak urang Minang ko nan mati," kato pangulu nan lain pulo. "Ado nan mati aka, mati angin, mati suri. Ado nan mati-matian, mati sabana mati, icak-icak mati, dimatikan dan mamati-matikan diri," kato surang anak bujang nan tampek ele stek. "Jadi, apo mau kalian!" hariak si Atang! "Maadokan acara untuk turis. Iaitunyo, adolah, acara maanta maik ka kubua," kato pangulu nan tuo. Indak lalok si Atang samalam tu doh. Karando maik tu nyo tinggakan dek rombongan pangulu tu dan bajanji bisuak ka datang baliak. Kutiko si Atang maampeh-ampeh di tampek tidua dek takuik, si Jila datang manokok pintu biliaknyo. "E, hantu! Waden alun ka mati bagai lai doh! Baa mangko sambilan bana karando maik diantakan ka rumah den!" kato si Atang dari dalam biliak. "He he he," galak si Jila dari baliak pintu. "Kalau sambilan anak daro basuntiang manunggu waang dimuko pintu, waang galak, capek kalua. Tapi kalau sambilan karando maik manunggu waang di muko pintu waang pansan, bakunci pintu abih-abih. He..he.. lai takuik pulo waang mati yo?" sambuang si Jila. (***) ? 2008 PT. Padang Ruangmedia Informatika Jln. Proklamasi No 38 A-B Tarandam Padang - Sumatera Barat Tel 0751 841258 | Fax 0751 841257 [EMAIL PROTECTED] --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet - Tulis Nama, Umur & Lokasi anda pada setiap posting - Dilarang mengirim email attachment! Tawarkan kepada yg berminat & kirim melalui jalur pribadi - Dilarang posting email besar dari >200KB. Jika melanggar akan dimoderasi atau dibanned - Hapus footer & bagian tdk perlu dalam melakukan reply - Jangan menggunakan reply utk topik/subjek baru =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
<<inline: image001.jpg>>
<<inline: image002.png>>
<<inline: image004.gif>>
