Pantai Padang
Jumat, 22 Agustus 2008 'Pantai Padang Makin Parah'. Barita tu dibaco elok-elok dek Tan Baro. Sabarih indak ilang, satitiak indak lupo deknyo. Barita tu basumber dari anggota wakia rakyaik. Inyo mangaku kecewa jo karajo Dinas Pariwisata nan hanyo pandai bajanji. Satiok ditanyokan masalah pantai tu, pajabaik di dinas tu mangecek-an dari beko ka bisuak se. Samantaro, di mato wakia rakyaik tu kondisi pantai Padang lah sabana parah. "Angah, batanyo ambo ciek lai buliah?" Tanyo Tan Baro. "Eee..., baa kok formal-formal pulo Tan Baro sakali ko? Tanyolah! Apo nan taraso!" Jawek Angah. "Bantuak iko. Angah acok lalu di pantai Padang kan? Baa kiro-kiro kondisinyo? Karano, ambo baco di surek kaba ko, agak tabik jogi wakia rakyaik jo kondisi pantai tu," Tan Baro manjalehan apo masalahnyo. "Kalau ambo indak salah, pantai Padang kini masih pantai nan dulu juo. Mukasuik ambo, indak banyak parubahan. Kalau pun ado parubahan, itu indak labiah dari parubahan sasaat nan dibao dek pangunjuang. Umpamonyo, kalau saisuak awak indak batamu jo urang bapangku, bapaluak atau baciuman di tapi pantai tu, kini lah bisa ditamui. Walau saisuak namo pantai Padang identik jo tampek kumuah, namun indak ado pondok esek-esek bantuak kini. Kalau soal sarok atau sampah ambo kiro masih samo jo saisuak. Baitu juo masalah harago makanan, di sinan masih ado nan main pakuak dari kuduak. Kalau nampak ongok-ongok tangguang dek urang manggalehnyo, bisa dilakuaknyo gadang-gadang," baitu Angah mancubo manjalehan sasuai jo pancaliak-an dan pangalaman inyo. Maklum, katiko dapek manjadi supir serap angkutan kota tambangan Pasa Raya ka Lubuak Buayo, pastilah lewaik di tapi lawik tu. "Oooo..., baitu! Patuiklah wakia rakyaik ko agak marabo. Katonyo, anggaran untuak pariwisata, untuak mampaelok-i pantai Padang tu lai agak gadang, tapi indak juo dikarajokan," baleh Tan Baro. Baitulah suasana di lapau Uwo Pulin pagi kapatang. Ado-ado se barita di surek kaba 'Singgalang' nan dijadikan bahan ota sarato diskusi. "Sabananyo iyo mah. Kalau wak caliak-caliak pantai Padang kini indak banyak barubah dibandiangkan sapuluah taun lapeh. Kalau pun ado parubahan, barangkali jalan nan lah duo jalur. Salabiahnyo masih sarupo dulu. Alun lai masalah sarok sarato kurenah palayanan di sinan. Tiok hari ado se pangunjuang nan tapakiak. Ado ulah harago makanan atau minuman nan sumbarang disabuik se dek urang manggaleh, ado pulo dek anak-anak nan mangamen, ado dek tukang parkir. Pokoknyo ado-ado se. Kasudahannyo, indak ado kanyamanan taraso di sinan. Padohal, urang-urang nan datang ka sinan adolah untuak bawisata, balibur, untuak mailangkan masalah, tapi di sinan justru mandapek masalah," Udin Kuriak lah sato pulo mangecek. "Itulah biaso di nagari-nagari baru mardeka. Awak ko kan nio mampacaliak-an tuah surang-surang se," kecek Kari Garejoh. "Kalau dipabiakan sajo, sarancaknyo pantai tu indak dijadikan objek wisata. Mustinyo ado tindakan dari polisi wisata, tarutamo ka tukang-tukang pangua atau pareman nan ado di sinan. "Dek ambo indak itu doh. Kalau memang ado anggarannyo, mako sarancaknyo pantai Padang tu batua-batua dibenahi dan dikelola sacaro profesional. Kalau indak talok dek pamarentah, suruah investor mangalolanyo. Kalau lah investor nan mangalola, ambo raso indak ka ado lai tukang pakang jo tukang pangua, atau sarok nan baserak-serak. Karano kalaulah profesional pangalolaannyo, pasti kasadonyo disadiokan, mulai dari sarana pandukuang sampai ka keamanannyo," kato Tan Baro maagiah ide. Espe St.Soeleman Copyright (c) 2007 - 2008 Harian Singgalang --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet - Tulis Nama, Umur & Lokasi anda pada setiap posting - Dilarang mengirim email attachment! Tawarkan kepada yg berminat & kirim melalui jalur pribadi - Dilarang posting email besar dari >200KB. Jika melanggar akan dimoderasi atau dibanned - Hapus footer & bagian tdk perlu dalam melakukan reply - Jangan menggunakan reply utk topik/subjek baru =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
