Góðan dag Hliðskjálf - félag um opin og frjáls landupplýsingagögn, kennitala 5411130880, var stofnað 2013 til að stuðla að frjálsum landupplýsingagögnum á Íslandi.
Boðað er til aðalfundar fimmtudaginn 22. maí 2025 í Bókasafni Kópavogs, í Huldustofu á 3. hæð í Hamraborg 6a, beint við stoppistöð Strætó, þar sem Ásinn, Tvisturinn og margar aðrar leiðir stoppa. Fundur hefst kl 16:00 og þarf að vera lokið 18:00 þegar safninu er lokað. Boðið verður upp á fjarfundartengil. Félagið varð fyrsti skráði Local Chapter hjá OpenStreetMap Foundation 12. janúar 2015 sem þýðir að það er fulltrúi OpenStreetMap á Íslandi, eða eins og segir "country-level or region-level not-for-profit legal entities representing the area's OSM mappers and OSM data when dealing with local government, business, and media." Við höfum verið í samstarfi með ytri aðilum til að bæta gögn á Íslandi, hvort sem það er með ja.is sem opnaði á 360° myndir sínar fyrir kortlagningu í OSM, með Apple Maps sem flutti inn gögn úr Staðfangaskrá eða þá nú, nýjasta verkefnið sem er samgöngunet á Íslandi. Marco Pizzolato frá Náttúrufræðistofnun mun á aðalfundinum kynna verkefnið sem stofnunin er að vinna í sem er samgöngunet á Íslandi. Enginn einn opinber aðili hefur hingað til getað boðið upp á samfellt samgöngunet fyrir Ísland, sveitarfélögin eru með sína vegi og Vegagerðin með sína. OpenStreetMap hefur verið eini gagnaveitandinn sem hefur getað boðið upp á samfellt samgöngunet og það hafa ríkisaðilar sem aðrir nýtt sér. Náttúrufræðistofnun er mikið í mun að vera í góðu samstarfi við OpenStreetMap og leitar því eftir samstarfi og hugmyndum um hvernig þetta getur átt sér stað. Hvernig gögn sem stofnunin fær frá opinberum aðilum geta skilað sér í OpenStreetMap og flæðið þarna á milli. Við óskum eftir framboðum til stjórnar sem og hugmyndum að því hvernig þetta samstarf getur farið fram. kveðja, Jóhannes formaður
_______________________________________________ Talk-is mailing list Talk-is@openstreetmap.org https://lists.openstreetmap.org/listinfo/talk-is
