|
Barang Arjuna , anu dipasihan kasempetan mimiti
milih , Duryodhana elekesekeng , manahna kalintang mentegegna , rarayna katingal
rada sepa , ku margi hanjelu anu banget pisan . Teu kantos lami Arjuna ngandika
:"Nuhun diri Kaula dibere kasempetan mimti ku Kakang Kresna , jadi ieu
kasempetan teh bakal digunakeun ku Kaula . Tah pilihan Kaula mah tetap , diri
pribadi Kakang Kresna , nu bakal dipilih teh , da Kaula mah datang kadieu
soteh lain rek ngajak Kresna perang , tapi ngajak Kresna supaya daek
ngabela Pandawa enggoning siasat perang ."
Bingah amarwata suta , bingahna ka giri giri ,
Duryodhanaaa kaaaton . Barang ngadangu eta pilihan Arjuna , kalintang Duryodhana
bingah manah , tadina mah sok sieun Arjuna milih Kartamarma kalawan pasukanana
nu kasohor waranian jeung tara eleh ; da ari Kresna mah keur naon ,
ari teu ngilu perang mah , teu guna guna . Panasehat perang mah loba di
Astina oge teu kurang kurang ; ngan ieu naha Ki Arjuna eta ku bodo katotoloyoh
, dibere kasempetan kahiji , lain milih Kartamarma malah milih Kresna ?
Naha kitu Si Arjuna teh geus siwah ? Tapi keun we lah , rek siwah rek
henteu , pokona mah aing geus meunang pasukan Meralaya anu sakitu tarangginasna
; tangtu aing dipuji ku Paman Sakuni ." Kitu gerentes manah
Risang Duryodhana .
Kresna enggal wae matur :"Tah geuning kitu cenah ,
pilihan Ki Arjuna teh , kumaha pandangan Pangeran Duryodhana ?"
Duryodhana enggal ngawaleran :"Euh sukur atuh ari
Arjuna geus nangtukeun pilihanana mah . Ngan bae Arjuna ! Naha enya sampean teh
milih Kresna , ti batan pasukan nu ngarebu tur kuat ?" Duryodhana ngalelekan ,
negeskeun .
"Teu kapindo gawe , Kaula milih Kresna pribadi ,
masing teu perang jurit oge ; hartina tah mangga wae pasukan Meralaya mah bagean
kakang ."
"Hahahahaahha , heueuh atuh nya , da Kaula mah ngan
ukur pamilihan , sesa . Jadi nya kapaksa we Kaula narima ka na eta bagean . Tah
atuh Kresna , Kaula moal panjang nyarita , sabab loba deui nu rek disaba , Kaula
nganuhunkeun pisan kana kahadean andika , mere pasukan ka Kaula . Arjuna ke ku
Kaula ditunggu di Medan Danalaga !"
Enggalna bae Duryodhana gesat gesut kaluar ti
Meralaya bade nuju ka Mandura nepangan mitra Kinasih nya eta Prabu Baladewa
atanapi Balarama .
Tunda nu nuju milampah perjalanan , kocapkeun
Kresna naros ka Arjuna :" Kaipe ( Ipar ) , ku naon sababna bet milih akang
pribadi , padahal pan akang mah teu milu perang , naon gunana atuh
?"
"Kresna , masing kalah kumaha oge , Kaula mah
leuwih butuh sampean pribadi , ti batan ratusan rebu prajurit . Pikeun diri
Kaula , Kresna teh teu bisa dibandingkeun jeung ratusan rebu atawa jutaan
prajurit sakumaha lobana oge , lantaran kapan sampeyan pisan nu nyaho kalemahan
jeung kakuatan Kaula lamun maju jurit . Jadi Kaula bakal tambah gede hate , mun
aya Kresna di sagigireun Kaula ."
"Hahahahaha , edaaas ieu Ki Arjuna , meureun inget
waktu perang ngalawan Kangsa nya ? inget sok , saha tah nu leuwih loba nelasan
musuh , Kresna atawa Arjuna ?"
"Hahahahaha , harita Kaula ngelehan maneh ,
lantaran aya Sumbadra , kapan cenah tong calutak ka dulur saluhureun , nya
kapaksa Kaula nurut . Mun anjeun maehan hiji musuh , kakara Kaula oge milu
maehan hiji musuh . Tah nu matak , tingali engke di na Perang BHarata Yudha , di
dinya Kresna bakal eleh Ku Kaula , hahahahaha . Tah ieu pentingna mah , nu matak
Kaula milih Kresna teh ."
"Hahahahaha , kumaha Kaula bisa ngitung saha sahana
nu ditelasan ku sampeyan , Arjuna ? Boa boa prajuit si utu si eta we meureun nu
bakal dipaehan teh !"
"Pasti bakal kasakseni , lantaran Kaula minangsraya
ka sampeyan teh , euweuh deui lian ti rek menta sampeyan daek teu daek kudu jadi
Kusir Kaula ."
"Tah ari geus ngarahul teh biasa Ki Arjuna mah .
Moal enya pangkat Kaula Raja , rek diturunkeun jadi Kusir ?"
"Tapi kusirna hiji Pahlawan Perang Pandawa , nu
loba kawani teu mundur ngalawan musuh najan ngarebu , hiji kahormatan
nu gede pisan . Lantaran ari di na peperangan mah , geus teu nyaho deui mana
Raja , mana Ponggawa . Pokona saha nu jago , eta Pahlawan
gede ."
"Heug atuh ari kitu mah , Kaula daek jadi Kusir
kareta Arjuna nepi ka tutasna pisan . Kaula moal alang kumapalang , bakal
ngusiran nepi ka tungtungna pisan ."
Enggalna wae dua "sobat medok" teh silih rangkul ,
duanan ngagukguk nangis , ku margi waas emut nuju aranom keneh ; dimana harita
Ki Janaka ngudag ngudag Arayana , dipapag ku Rara Ireng nu nunjuk nunjuk ka
Arjuna , nepi ka Arjuna teu walakaya , ku margi reuwas diseuseulan ku Sumbadra .
Harita Arjuna teh kapentang asmara ku Sumbadra ( Rara Ireng ) , nepi ka pasrah
serah bongkokan diborogod ku Sumbadra .
Hanca ,
Abbas
Amien
Komunitas UrangSunda --> http://www.UrangSunda.or.id
Yahoo! Groups Links
|
