Para wargi sadaya, Asa mindeng dina ieu milist aya anu ngusulkeun 3 ajen inajen kasundaan, ceuk cenah, pikeun eusining visi-misi tug dugi ka program pamarentahan. Anu 3 teh karakter: JUJUR, PINTER jeung WANI. Lakadalah, geuning aya capres jeung cawapres anu migunakeun eta ajen inajen/karakter kapamimpinan dina wangun slogan kampanyena. Heunteu ari nyeples pisan mah, ngan eusina mah sarua bae, nyaeta: JUJUR, CERDAS dan BERANI.
Is, ulah GR heula, sabab bisa bae batur oge boga anu kitu. Enya masing saha bae oge bisa nepi ka eta slogan anu tilu teh. Ngan, boa- boa matak mincut warga Kusnet eta Capres & Cawapres teh? Ah keun bae, apan LUBER tea, jeung hakna dipilih jeung milih mah. Pamugi bae leres dina prak-prakanna-engke lamun kapilih-kitu: JUJUR, CERAS jeung WANI. Aya deui Capres & Cawapres anu slogan na teh "PERCAYA DAN MAJU, MAKMUR IDONESIAKU". Lamun dibedah mah slogan anu ieu oge da moal pati beda jeung JUJUR, CERDAS, dan BERANI. Geura bae, basa ngaluuuhan pajemuhan hiji rarancang kampanye ti hiji cawapres, aya anu ngabejaan, yen cenah "Percaya" dina slogan di luhur teh ngandung 3 katerangan. Anu tilu teh nyaeta: 1) Percaya Kepada Tuhan, 2) Percaya kepada Negara, 3) Percaya pada Kemampuan Sendiri. Diantara tandana percaya ka Pangeran teu aya sanes JUJUR tea. Enya sakumaha sifat Nabi anu amanah tea, tandana percaya ka Pangeran mah anu panggampangna taya sanes kajujuran tea. Terus, percaya ka nagara hartina, diantarana, yen lembaga Negara teh masih diperlukeun, ngan nagarana ku nu ngawangun kapinteran rakyatna. Enya, sakumaha tujuan kamerdekaan dina UUD 45 tea: Mencerdaskan kehidupan Bangsa. Ngurus nagara jeung tujuan ayana Nagara pakait jeung kapinteran atawa "keCERDASsan" pangurus nagara jeung masyarakatna. Anapon "percaya pada Kemampuan Sendiri" ngarupakeun lajuninglaku tina cerdas. Keur naon ari cerdas oge lamun teu percaya kana kamapuan sorangan mah. Kukituna, sajaba "cerdas", anu percaya kana kamampuan dirina sorangan mah tangtuna oge WANI. Da moal aya kepercayaan kana kamampuan sorangan, lamun taya kawani. Enya sakumaha baheula, 32 tahun ka tukang, sanajan sakitu parentulna teknokrat lulusan LN, tapi da teu aya kawani tea, tetep bangsa urang teh ukur jadi tukang kaput pola kahirupan bangsa, utamana dina hal ekonomi, anu geus ditangtukeun ku kongsi antara modal jeung kakawasaan. Enya modal jeung kakawasaan anu jero-jero na mah neruskeun pangjajah moderen ti LN. Tetela atuh PERCAYA teh bisa ditafsirkeun leuwih jauh jadi JUJUR, PINTER (atawa CERDAS) jeung WANI. Ari "MAJU" jeung "MAKMUR INDONESIAKU" rek disimpen dimana? Maju sigana nyurup kana Orde Prestasi tea. Lamun pamimpina geus mibanda karakter Jujur, Pinter, jeung Wani, kana moal jauh pikeun ngahontal kamajuan alias prestasi tea. Anapon MAKMUR, eta mah hasilna engke lamun pamimpin jeung anu nuladanna (rakyat anu dipimpinna) geus ngalaksanakeun JUJUR, PINTER jeung WANI babarengan dina proses ORDE PRESTASI (sagalana diukur ku pretasi anu diwangun ku kajujuran, kapinteran, jeung kawani). Pakaitna slogan di luhur jeung 3 ajen-inajen mataholang kasundaan (ceuk sapalih warga Kusnet) aya kitu? Asana aya. Coba bae urang toong saliwatan. JUJUR atawa Percaya kahiji (Percaya ka Pangeran) teh ngarupakeun sikep anu prak-prakanna teh aya dina SILAS (Silih Asih, Silih Asah jeung Silih Asuh). Ku cara sejen dijelaskeun, SILAS teh program langsung tina sikep JUJUR. Ari percaya ka nagara atawa PINTER eta diperlukeun pikeun NGERTAKEUN BUMI LAMBA. Enya, neundeun ajen kahadean atawa modal pikeun jaya di bhuana dina amal bakti ka papada manusa. Ngertakeun Bumi Lamba anu tujuanna ngawalatrakeun sarerea kalawan adil, tangtu bae perlu kajujuran, ngan dina ngalaksanakeunna perlu kamotekaran. Urusanna aya dina wadah managemen. Anapon WANI jeung Percaya kana kamampuan sorangan pakait dalit jeung KABUYUTAN. Nyalindungan jeung mulasara lemah cai, ti mimiti banjar karang pamidangan, lembur sorangan, dayeuh sorangan tug tepi ka nagri sorangan merlukeun kawani jeung kapercayaan kana kamampuan sorangan salian ti kajujuran jeung kapinteran. Enya, upamana, kawani pikeun tetep heunteu ngajual hulu cai ka nu boga modal-sakumaha nawarna anu boga modal-sabab cai teh banda pikeun kalohjinawian balarea. Pon kitu keneh dina miara lingkungan sejenna anu kaasup kabuyutan, saperti leuweung, walungan, titinggal sajarah, jst. Aeh, na siga ngarojong 2 calon Pres-Wapres, nya? Tuda anu apal slogan na ngan dua-duana eta. Jeung deui lain maksud rojong rumojong ieu mah, miangna mah kusabab kaeleketek ku slogan kampanye ti 2 Capres-Wapres bae. Eta cenah bisa ngait, nya tuda dikait-kaitkeun. Sugan bae atuh ngait terus. Wayahna ka anu ngarojong Capres-wapres sejenna mah heunteu "pakuat-pakait", jalaran heunteu apal slogan aranjeunna jeung paur teu ngait. Cag, manAR ------------------------ Yahoo! Groups Sponsor --------------------~--> Yahoo! Domains - Claim yours for only $14.70 http://us.click.yahoo.com/Z1wmxD/DREIAA/yQLSAA/0EHolB/TM --------------------------------------------------------------------~-> Komunitas UrangSunda --> http://www.UrangSunda.or.id Yahoo! Groups Links <*> To visit your group on the web, go to: http://groups.yahoo.com/group/urangsunda/ <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/
