|
Teu tisasarina isuk isuk keneh
mang Sadeli geus singkil, biasana mah panon poe can moncor kana bilik mah can
waka hudang, angger we morongkol tur pabeulit jeung sarung dodotna. Tapi isuk
harita mah beda, panampilanana geus ginding, awakna geus melenghir,
buukna geus leucir, siga nu nek indit jauh. Puguh we
pamajikanana heraneun, pok nanya.
" Bapana..nek indit kamana ieu teh
?"
" Nek ka Cikeas !" jawabna pondok
" Ka Cikeas...ka imahna SBY ?" ceuk pamajikanana
nyanyahoanan. Kiwari ngaran Cikeas teh ngadadak tenar tur remen pisan
diomongkeun, sabab diwewengkon eta pisan calon persiden anu katelah SBY
nganjrekna, komo saprak SBY geus dipastikeun unggul mah teu sirikna unggal jam
aya nu datang timimiti pajabat, guru honorer, para pagawe anu nek di parehaka
jrrd. Daratang mawa maksud jeung tujuan anu beda beda. Malahan ceuk nu
rahul mah aya kelompok ibu ibu arisan ngahaja nek ngocok arisanana
ngadon ditempat SBY, sakalian cenah silaturahmi.
" Enya ka imahna SBY !" jawab mang Sadeli bari
kakaratak kana lomari siga aya nu diteangan. " Emana.... ijasah bapa
dikamanakeun ?"
" Har ari bapana...lain SD ge pan nepikeun ka
kelas tilu lin? make nanyakeun ijasah sagala...nya jang nanahaon atuh
?"
" Keur ngalamar deuleu...sugan we aya lowongan
jadi mentri !"
" Heuheuy deuh...cik atuh usap beungeut,
Istigfar, ulah ngalindur wae da geus beurang ieu teh !"
" Tong sok kitu...bapa ge sadar deuleu..malahan
leuwih tisadar...wajar deuleu lamun bapa aya maksud ngalamar jadi mentri, sabab
emana ge nyaho lin suara SBY dilembur urang unggul. Cing saha nu baheula
gogorowokan kampanyeu, pan nu kieu patut !" ceuk mang Sadeli asa pangjasana,
bari terus kencling indit.
" Bapana eta naon anu dina map ?" ceuk pamajikan
mang Sadeli, dumeh ningali salakina ngagigiwing map.
" Teuing atuh da manggih ti handapeun hambalan
baju !"
" Bapana...montong dibawa eta mah surat kawin
!"
" Jeun teuing ah !" tembal mang Sadeli teu malire
bari terus ngungkug indit.
Di satengahing jalan mang Sadeli papanggih jeung
mang Kohir kumplit jeung pamajikanana.
" Li..silaing nek kamana geus ginding euy
?"
" Nek ka Cikeas, ari iling nek kamana make
dikawal sagala geuning?!" pokna bari ngareret kapamajikan mang
Kohir.
" Ka Cikeas, ka imahna SBY ?" mang Kohir malik
nanya
" Heueuh !"
" Atuh kaparengan, puguh dewek ge nek
kaditu!"
" Har nya aya naon ?"
" Puguh kieu euy..pan pamajikan dewek teh keur
nyiram , teu gugur teu angin ujug ujug hayang ningali jegrigna SBY,sukur sukur
cenah bisa sasalaman, mun teu kalaksanakeun, pasti anak dewek
jagana ngelay euy !"
" Beu...beu..kaya kieu mah beurat jadi persiden
ayeuna mah euy, buktina can nanaon ge sagala tetek jeung bengekna
permasalahan tumplek kana taktak persiden !"
" Ari dipikir saliwatan mah enya siga kitu, tapi
pan persiden ge engkena ngangkat mentri jeung kabinetna !"
" Puguh eta nu jadi pikiran dewek teh
!"
" Naha kitu ?"
" Puguh maksud kaditu teh, dewek nek
ngalamar jadi mentri, kumaha mun lamaran eta ditarima heug dewek diangkat jadi
mentri Deperindag atawa menko ekuin meureun unggal poe teh kakantor dewek loba
nu demo, patani nungtut harga gemuk murah, ray poena ibu ibu nungtut harga
sembako murah, poe sejena LSM nungtut harga BBM murah, tada teuing
rieutna...ah kajeun bedo we...bedo jadi mentri !"
" Jadi bedo indit ka imah SBY ?"
" Jig we silaing...dewek mah jadi hoream barina
ge itu sijalu can dipangalakeun jukut !"
" Beu mun kitu mah dewek ge bedo euy, jeung deui
aya beja poe ieu ditempat SBY moal ngayakeun open house. Kumaha mamahna mun
ningali SBY teh dina tivi wae atuh !" ceuk mang Kohir bari neuteup
pamajikanana.
" Duh utun inji hampura ema mun jaga hidep
ngelay, sakali deui hampuraaaa..... !" ceuk pamajikan mang Kohir bari ngelus
ngelus beuteungna anu keur sumedeng bungkeyang./sr
Komunitas Urang Sunda --> http://www.Urang-Sunda.or.id
Yahoo! Groups Links
|
