baraya ieu aya seratan kang tjetje, politikus sunda, sataun ka tukang. sok sanajan kitu jejerna asana masih keneh "relevan" pikeun lenyepaneun urang sarerea. mudah-mudahan aya mangpaatna.
salam, mh ====== Mangle Online. Bahasan. 14-11-03 Kudu Robah Paradigma, Ulah Ngawawaas Maneh Bae Memang euweuh pamingpinna Sunda mah, saur Kang Tjetje Padmadinata tandes. Beda jeung Sunda Uum, ari Ki Sunda mah unsur kualitatip saur Kang Tjetje saterusna. Saperti di Jepang contona, aya kolompok anu disebut Samurai, ceuk istilah Arnold Toynbee mah "the inner creative ferment of the society", lamun uyah rasa asinna, lamun gula rasa amisna. Eta Ki Sunda. Samurai mah boga tata niley nu jentre, tepi ka palanggaran etika leuwih beurat batan palanggaran hukum. Mun aya anu kanyahoan teu boga cedo, teu boga etika, dihukum pati ku dirina pribadi, anu disebut hara kiri tea. Duka tah ari di kalangan urang Sunda, boga atawa henteu tata niley. Kudu puguh ukuranana ari manusa moderen mah. Kang Tjetje ngangken sok heureuy tapi teu heureuy, hirup teh ulah ngaleuwihan Gusti Allah. Tuhan Maha Adil teh make aksara gede, Allah nyadiakeun sawarga keur nu adil, naraka keur anu goreng. Jadi, nurutkeun Kang Tjetje mah eta teh tata niley, mun ditarjamahkeun, kudu puguh, mana ganjaranana, mana penalti hukumanana. Ieu tata niley. Hususna urang Sunda, sim kuring anu teu panuju ka nu asal Sunda, saur Kang Tjetje saterusna. Derekdek ngadongengkeun saurang mitra Sunda ti kalangan tentara anu jaman baruntakna PKI Muso di Madiun, pangkatna Letnan keneh. Salah saurang logojo PKI nyembah-nyembah menta supaya ulah dipaehan, sanajan jelas dosa jeung kasalahanana. "Aduh Pa, abdi mah ulah dipaehan Pa, abdi mah urang Sunda": pokna melas-melis. Pa Letnan molotot sewot. "Ah, komo sia urang Sunda, ngerakeun siah!" dor...dibedil tepi ka hanteuna. Tah ieu tata niley, kulantaran manehna jelas urang Sunda nu geus murtad, gede dosa, dihukum. Jadi nu disebut ulah ngaleuleuwihi Gusti Allah teh di dinya. Kudu aya reward & Punishment di kalangan urang teh. Ari kakurangan urang, can boga Sundaismeu urang mah. Rewuan taun Bani Israel berjoang, tepi ka ayeuna aya anu resep aya anu ceuceub, tapi perjuanganana teh puguh, Zionismeu. Di Sunda mah nu disebut Sundaismeu teh Multi-Polar, Multi pilar, hakekat Sunda nurutkeun Kang Tjetje memang pluralistik. Urang Sunda komunitasna henteu ngawangun aseupan nangkub anu bogaeun puncak, figur pamingpin tea anu pantes dijadikeun panutan. Luyu jeung simbulna, Sunda mah gunung Tangkuban parahu anu puncakna datar atawa rata kumaha tea parahu nangkub, moal jiga aseupan nangkub. Eta sababna Sunda Pluralismeu. Robah Titincakan! Kriteria Sunda nurutkeun Kang Tjetje, aya anu disebut Sunda Pulitik diwangun ku Sunda Nagara, Sunda Budaya Sunda Usaha. Masing-masing anteng di dunyana, nu ngagem paham republikanisme demokratik anteng ngawangun "civil society" (pencerahan berpikir masyarakat, pemberdayaan masyarakat). Nu ambtenarisme kitu deui, sibuk pakepuk ngeusian posisi-posisi penting di pamarentahan, akibat tina sistim Pelita (material-ekonomi), jadi leuwih sibuk ngahontal komersialisme-merkantilisme pribadi. Gambaranana jelas, teu baroga deui rasa sabilulungan. Malah lantaran giung ku dunya, ahirna jadi paroho kana berjuang ningkatkeun harkat katut darajat Ki Sunda. Jajauheun nulung bantu ngaraharjakeun seke selerna di lembur matuh mah. Ti dieu beuki eces katingal, teu aya anu pantes dijadikeun figur pamingpin jeung panutan. Naha elit Sunda geus tepi ka tahapan manusa moderen anu leuwih loba nyawang pikahareupeun batan nyoreang wae ka tukang? Nurutkeun Kang Tjetje keneh, elit Sunda kiwari tacan aya anu tepi kana tahapan eta. Mindeng jeung loba keneh anu resep ngawawaas maneh ngumbar kakelar, bulak-balik nyaritakeun nu baheula, angger dina titincakanana anu baheula. Kulantaran kitu kudu geura robah paradigma atawa titincakan. Tapi lain hartina kudu mopohokeun sajarah. Sunda memang ngalaman jaman kajayaan, kudu diaku. Tapi Tjetje Padmadinata, nu pantes disebut penganjur modernisasi nyebatkeun, eta mah milik karuhun urang, Galuh jeung Pajajaran. Ayeuna anu penting, ti poe ieu ka hareup urang dipentes kudu ngukir prestasi. Jadi, urang Sunda ulah ngagugulung bae kahayang, ulah ngawawaas maneh bae, kudu galib jeung IPTEK. Tapi ieu oge lain hartina nganomer duakeun iman jeung takwa ka Allah, saurna. Miang tina sajarah, lempeng neuteup ka hareup geusan ngangsrodkeun harkat martabat Sunda oge kudu jeung modalna ti mana, naon bae sarana jeung prasaranana, sistimna kudu kumaha, jeung saha bae figur-figurna, geus puguh ari udaganana mah, da samistina boga target anu tangtu. Pandangan-pandangan jeung pamanggih ti sakur anu hadir dina riungan di Mangle poe eta kacida marunelna. Upama nyutat kasaurang AA Gymnatsiar dina kuliahna memeh buka puasa, upama seug eta pamendak, pamadegan Jeung pemikiran anu beda-bada teh heug digumulungkeun jadi hiji, bakal jadi wawangunan anu kacida kokoh kuatna, tohaga. Mun dilarapkeun kana perjuangan Ki Sunda, eta wawangunan teh pastina ge Sunda Jaya tea.[MANGLE: 13-19 Oktober 2003] [hrs] ===== bibit: http://free.angeltowns.com/studio579/ hanca: http://www.geocities.com/hasangarut/ __________________________________ Do you Yahoo!? Yahoo! Mail - Easier than ever with enhanced search. Learn more. http://info.mail.yahoo.com/mail_250 ------------------------ Yahoo! Groups Sponsor --------------------~--> $4.98 domain names from Yahoo!. Register anything. http://us.click.yahoo.com/Q7_YsB/neXJAA/yQLSAA/0EHolB/TM --------------------------------------------------------------------~-> Komunitas Urang Sunda --> http://www.Urang-Sunda.or.id Yahoo! Groups Links <*> To visit your group on the web, go to: http://groups.yahoo.com/group/urangsunda/ <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/
