|
Tos pada tarerang PORJI? Ih sanes, sanes
Pekan Olahraga Paraji. PORJI teh singketan tina Kompor Tai
Ragaji, kompor anu bahan bakarna ku tai ragaji. PORJI ieu mimiti mucunghul
saprak aya kanaekan BBM. Kunaekna BBM jalmi-jalmi maruterkeun uteukna,
kumaha carana sangkan dapur ngebul, tapi eusi dompet henteu ngiring ngebul
gara-gara kedah meser minyak tanah anu hargana salangit, nya salah
sahijina ngajanggelek PORJI. Kumaha atuh carana midamel sakadang PORJI
teh ? Saleresna teu sesah sesah teuing midamelna, cekap milari tilas kaleng
cet 25 kiloan, teras handapna disemen minangka dadasarna, atuh luhurna ngadamel
rarangka kanggo nagogeun seeng, katel atanapi sabangsana. Saparantos rengse
lebetkeun tai ragaji, teras nganggo suluh hiji minangka cocolokna. Jegur
disundut. Upami hoyong enggal marong, tiupan ku songsong, saparantos marong mah
gatengkeun we, bari siduru sajam teu karaos kulub suuk tos munyutuk, ngan kade
ari ngulub tulang mah teu kenging diantosan bari patuangan tos ngerebek lapar,
sanes nanaon. Lami!
Biasa ari jalmi mah sok tuturut munding,
ngadamel saurang, ari breng teh sa rt pipilueun. Atuh puguh we anu tadina tai
ragaji narambu diunggal juru,bayatak diunggal jarian teh kiwari teu sirikna
paboro boro da papada perlu. Boa-boa jaga mah tai ragajina ge dijual sakarung
saanu rebueun, boa-boa hargana ge ngaleuwihan harga minyak tanah, boa-boa
meulina ge kudu siap siap ngantri, ah boa-boa engke mah loba nu nimbun da
aya beja hargana nek naek deui. Mun enya teh kajadian, asa kabina bina teuing,
Mangga we bayangkeun, ngantri meuli tai ragaji. mending
mun ngaragajina ku ragaji simso,orokaya ku ragaji honghang
pisakumahaeun cangkelna nungguanna. Enya mun dipikir-pikir mah lieur, kieu salah
kitu salah. Kiwari nu kaharti ku uteuk rahayat leutik mah, ngan hiji,
turunkeun deui harga BBM sabihara bihari, sangkan kompor minyak anu tos bulukan
teh bisa diaranggo deui. Atuh anu tos kadung garaduh PORJI sakali kali
mah bisa diaranggo siduru bari ngabubuy hui cilembu. Pek we ka pamarentah
mun tega mah taekeun deui harga BBM taun hareup, ngan kudu siap-siap nyetak
kartu miskin anyar jutaan siki deui. Piss ah, hidup PORJI !
SR Komunitas Urang Sunda --> http://www.Urang-Sunda.or.id YAHOO! GROUPS LINKS
|
