Sabenerna geus sadar ti keur budak mula yen kuring teh teu bisa nyanyi, da eta we mangsa keur sakola rakyat lamun aya pelajaran kesenian teh nu panghoreamna lamun geus dititah nembang kahareup, no sok ditembangkeun teh iwal ti Kinanti nu nepi ka ayeuna ge masih apal keneh, unina teh : Budak leutik bisa ngapung Babaku ngapungna peuting Nguriling kakalayangan Neangan nu amis amis Sarupaning bubuahan Naon bae nu kapanggih Lian ti eta mah euweuh nu bisa, matakna kuring kungsi dilandi ku Juragan Guru harita Si Kinanti. Tah hal eta pisan nu ngajadikeun kuring kurang PD (percaya diri), komo lamun dina kasempetan ruang riung heug kudu maju kahareup nyanyi boh karaoke atawa dipirig ku organ tunggal, wah kajeun teuing jingjrit mundur ti pakalangan, biasa alesan mah loba sangkan nyingkah tidinya, rek meuli roko heula atawa hayang kahampangan heula jeung rupa rupa alesan sejenna. Kitu deui cubak cabak kana alat musik teu bisa pisan, kungsi mangsa keur rumaja ngilu kana grup degung, diajar teh nabeuh jengglong, hih da mimindengna mah dicarekan we, majarkeun teh teu keuna kana wirahma, ceuk nu ngajar harita ."Cik atuh dengekeun make perasaan dimana kuduna nakol teh ulah padu habek bae.", kuring mah weleh teu bisa nyurup masing ngadengekeun tidengo-dengo ge. Nya ti harita kuring tara pirajeunan cubak cabak kana instrument musik, kitu deui nyoba nyoba ngahaleuang, embung, teu bisa. Sedengkeun musik (rek diatonis atawa pentatonic) teh gabungan sababaraha instrumen, lamun tea disadana sewang-sewangan meureun kadengena moal matak pikagenaheun malah sabalikna bakal rawing ceuli, tong boro kitu kapan rek ngong ngahaleuang oge kudu merenah asupna, palebah mana nyurupna, teu bisa padu ngong. Ceuk Si Cepot ngamaenkeun musik teh teu beda jeung ngolah nagara, ah lain nagara meureun da nagara mah lega teuing ambahanana, ngamaenkeun musik teh teu beda jeung ngolah kulawarga, ngolah rumah tangga, kudu sareundeuk saigel sabobot sapihanean, kudu sawirahma, ulah pakia-kia, ulah sewang-sewangan. Ongkoh aya Menko Kesra, ngarana ge kesra, kesejahteraan rakyat, tapi instrument lain hayang naekeun TDL (tariff dasar listrik), euweuh rumusna karasa ku rahayat, naek (tambah biaya) teh bakal jadi sejahtera, lamun dina musik mah kadengena leuwih leuwih ti falsetto meureun,..aeh aeh hampura kuring yeuh eta mah hal nagara nya,...tapi kapan bakal aya pangaruhna kana kastabilan rumah tangga atuh. Lamun dina hiji pagelaran orkestra, heug aya weh nu ningnang saeutik tangtu dirigen teh bakal buru buru ngarobah supaya harmoni ulah kaganggu, tong boro ningnang nu nabeuh instrumen dalah panongton narik nafas ge kudu lalaunan, kaci keprok kalawan rame lamun hiji lagu geus lekasan, tah meureun anu disebut dirigen dina nagara mah nya presiden tea, atawa sang bapa lamun dina rumah tangga, naha geus aya ojah teu nya ieu dirigen nagara teh, pedah we karasana ku rahayat samodel kuring mah ayeuna teh kaharmonisan keur teu saimbang. Aeh enya kuring ge osok nyanyi teh, mimindengna dina hiji upacara resmi lamun aya paringetan ti nagara, upamana kudu upacara dina paringetan 17 Agustusan, tah nyanyi teh sok babarengan jeung nu sejen kitu ge tara satakerna ukur kunyem we nyaeta nyanyi lagu wajib, lagu kebangsaan, dina prakna nyanyi lagu kebangsaan teh sok rada norolang pedah mindeng tea meureun ngan jadi teu pati ngalenyepan eusina, mudah mudahan we para pangagung nagara mah kacida ngalenyepan kana eusi lagu teh, ulah ngan sakadar apal cangkem, da ari apal cangkem mah budak leutik ge bisa, ari keur kuring onaman teu nanaon apal cangkem ge da rahayat ieuh he he..! Lamun ditengetan jaman kiwari nu meh unggal poe aya demo, ti mimiti demo masak nepi ka demo ngaput baham atuh komo lamun demo hareupeun Gedong Sate, sok dibarengan ku ting keuleuweuh nyanyi, koor, lalaguanana rupa-rupa aya Halo halo Bandung jste, atuh ana kitu mah beuki loba we gunana bisa ngalagu, bisa nyanyi teh. Ceuk sakaol tangga nada do re mi fa sol la si, cenah mah nu nyusuna teh biarawan abad ka XI anu ngarana Guido d'Arezzo dicokot tina lagu himne Latin nyaeta Ut Re Mi Fa So La, tapi kuring kungsi maca hiji buku (kuring poho deui buku naon, asana mah Iber, ngan weleh teu kapanggih) cenah mah eta teh asalna ti ahli musik Islam. Cing ari Da Mi Na Ti La (pentatonis anu dipake dina musik Sunda).....Mi Mi Ti Na Ti Na Da Da......eta teh meunang saha nya....kurah koreh teh can manggih keneh...aya nu terang...? Geus ah poe ieu mah, isukan rek nyobaan ngaco deui. MSasmita
[Non-text portions of this message have been removed] Komunitas Urang Sunda --> http://www.Urang-Sunda.or.id Yahoo! Groups Links <*> To visit your group on the web, go to: http://groups.yahoo.com/group/urangsunda/ <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/
