Jas, pakean resmi, kuring mah saumur-umur kakara make sakali, kitu oge kapaksa. Kuring tara make jas, lain kulantaran nganggap jas pakean gengsi, tapi da asa teu perlu. Waktu di wisuda, cenah kudu make jas jeung toga. Tapi teu boga duit, jeung karunya ka kolot, geus lulus, masih menta dipangmeulikeun jas. Kapaksa ngan di toga wungkul, kitu oge meunang nyewa, kabeneran sakolaan nyadiakeun sewaan.
Waktu rek kawin, kuring nyieun jas. Lawonna meuli, terus neangan tukang ngaput jas anu murah. Meunang ti Ujungberung. Si Kehed teh, teu baleg ngaputna, teu ngeunaheun dipakena, abong murah. Rek nyieun deui, ngan dua poe deui ka kawin. Untung waktu kawin, didandanan pakean adat Sunda, jadi Jas teu baleg teh teu jadi dipake. Tah, kuring mah make jas teh waktu adi pamajikan kawin. Adi pamajikan teh, lalaki meunangkeun urang jakarta. Satadina mah kuring moal make jas, rek make batik we, da teu boga. Tapi pamajikan ngarenghik, kudu ngahargaan maneh cenah, jeung deuih pan sasatna urang teh kolotna si Hendra, saprakna Apa jeung Mamah ngantunkeun. Nya kapaksa kuring meuli jas jeung dasi, sanajan hog-hag heula jeung pamajikan oge. Heueuh da ku mahal tea. Indit nganteurkeun panganten teh ti Sukabumi, subuh keneh. Kuring geus ginding make jas jeung dasi. Maklum anu tara, awak asa rariged, ngan asa genah, asa dijajaket, maklum subuh jeung dina mobil oge make AC. Tepi ka imah Panganten awewe , di tapel wates jeung Tangerang, jam Dalapan. Nu ngabageakeun geus ngajengjreng, mobil-mobil pada ngatur parkirna, Bray panto mobil dibuka, ari heab teh hawa panas mimiti karasa. Geus direncanakeun kuring kudu ngagendeng panganten lalaki. Bari jeung panas, kuring ngagendeng panganten lalaki, dterus leumpang ka imahna panganten awewe. Bus abus ka imah, di jero jelema geus loba pisan. Panganten lalaki dicalikan, kitu deui kuring, Naib geus aya. NGan ampun geuning ieu teh panas pisan. Kipas angin nu dipasang teu karasa. Kesang mimiti kaluar. Kuring pahibut neangan saputangan. Duh eta pamajikan, ku pohoan saputangan teh teu diasupkeun kana saku. Kapaksa leungeun diangkat, dipake ngagisik kesang dina beungeut. Jeung ieu deuih dasi, mani asa tarik pisan nyekek kana beuheung. Panganten dirapalan, kuring nu nyaksian jadi teu khusu, da ieu kesang ngucur wae, baju ditukang geus karasa baseuh. Tungtungna keuheul kanu mawa acara, na lila-lila teuing .... Geus beres sagala tetek bengek upacara, kuring ngaharewos ka pamajikans, lain tadi teh dititah mawa batik. Aya cenah dina tas di mobil. Kuring seseleket kaluar, terus ngadigdig ka tempat parkir mobil, asup ka jero mobil, gancangan jas jeung dasi dilaanan, diganti ku baju batik. Waktu kaluar deui tina mobil, plong hate teh ....asa teu kasiksa. Waktu sasalaman ka para tamu marengan panganten, kuring bisa sura-seuri deui. Jas eta aya keneh, ngagantung di lomari. Ceuk pamajikan teh, keun we teu rugi, apan urang oge boga anak awewe, sugan we aya umur, bisa dipake deui engke ari ngawinkeun si Nia atawa si Tina ....... Baktos, WALUYA Komunitas Urang Sunda --> http://www.Urang-Sunda.or.id Yahoo! Groups Links <*> To visit your group on the web, go to: http://groups.yahoo.com/group/urangsunda/ <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/
