[Urang Sunda] Say no to udud

[sr]

Udud teh cenah hak asasi, mun tea mah enya meureun nyarek udud ka tukang udud teh kaasup ngalanggar. Paingan lamun dicarek sok ngajaranghilek kawas nyarek budak anu keur anteng ulin jeung cocooan kameumeutna, ngan henteu ari nepikeun ka lolongseran mah, kitu peta teh da pangrasana hak asasi ieuh. Komo nyarekna teu jeung wiwaha mah, nyarek kujalan ngajewang roko anu keur dipelenyunkeun tur dikekesek kana tarangna, peta kitu sarua jeung ngendageun sayang enggang tur ngabaruang sorangan. Najan sapanjang jalan dipajang tulisan ngajeblag "say no to udud" ari can ararinsyap mah kana udud tetep we sing pelenyun. Enya cenah ngeunah tur ni'mat udud teh matak hese dipapalerkeun ge, heueuh ngeunah soteh ceuk nu beuki, da ari nu teu beuki mah tetep we pikasebeleun. Salian ti ni'mat pan ngarah gaya cenah. Bener pisan baheula basa can usum hape, asa pangakangna lamun nu dikeukeuweuk dina leungeun teh bungkus roko merek kasohor. Atuh asa leuwih gaya lamun nu dikeukeuweuk teh lain sabungkus wae tapi saselop. Aya nu ngariung langsung lung lung sabungkus sabungkus, padahal nu ngariung teh teu wawuh wawuh acan.   Ieu mah lain ngabela kanu beuki udud, da enya pisan atuh, udud teh mere pamor kanu ududna. Lamun nu diududna sabangsaning roko nu aya mild mild-an perbawana kalem komo ditambah rasa menthol mah, keur kalem teh kul deuih. Ngan kade lamun keur apel ulah mawa roko sambarangan, bisi manawa ka diri sorangan, lantaran mun keur ngobrol, calon mitoha  sok nyidikeun, roko naon anu dibawa. Nya nu mahal ulah nu murah teuing ge ulah, sedang sedang sajah we tapi boga pamor, lain kunanaon ieu mah inggis kubisi mun mawa roko keretek bisi disangka supir beus, komo deui mawa cap upet mah bisi disangka supir bajay. Heueuh pan kuring mah cenah teu beuki udud, tapi apel hayang, nya kieu we atuh, ari teu mawa udud udud pisan mah bisi majarkeun teu kabedag meuli udud udud acan, nya modalan we sabungkus mah, golerkeun dina meja tong diudud atawa teu kudu mawa ududeun ngan waktu apel dina dada gantungkeun tulisan "calon dokter"   Boh kanu udud atawa kanu teu udud, moal gurah geureuh, komo gurah geureuh kanu sok udud bari make cara nu didadarkeun diluhur mah, palalaur, palaur diseureud engang. Pek teh teuing nek udud nek henteu oge,bebas, ngan henteu nepikeun ka nyebutkeun amaluna amalukum mah. Ngan omat kanu sok arudud sing jadi tukang udud nu soleh, bisi can apal mah ciri cirina kawas kieu; mun keur melenyun udud, heug aya kuring nyampeurkeun, golosor saselop, cenah bisi kurang, yeuh sakalian mentahna,bari diseselkeun kana pesak. Atuh kanu teu udud sing jadi ladang amal, mun aya nu ngelepus hareupeun, doakeun we sing geura arinsyap tina udud, mun tetep we arudud, nya tawakal we. Sanajan enya udud teh hukumna makruh najan sakumaha nyanduna moal ieuh di-rahasiah illahi-keun, beda deui jeung nu nyandu judi dina carita ge pan paehna kabentar gelap. Najan geus disilokakeun kitu tetep we nu judi mah tetep rea.   Abong keur suasana tujuhbelasan, nu beuki udud ge ngadadak boga semboyan anyar, sumanget udud opat lima tea, sekali udud tetap udud, cadu mundur pantang ngahutang. Antukna nu teu beuki udud ngan ukur bisa ngagereneng bari satengah nyungkun "tong saudud ududna mun lain ududeunana, sesama tukang udud mah dilarang saling meng-udud euy" Piss ah!   syam ridwan pangamat perududan ti ikatan bau belenok sabojong kenyot     __._,_.___ Komunitas Urang Sunda --> http://www.Urang-Sunda.or.id YAHOO! GROUPS LINKS  Visit your group "urangsunda" on the web.    To unsubscribe from this group, send an email to:  [EMAIL PROTECTED]    Your use of Yahoo! Groups is subject to the Yahoo! Terms of Service. __,_._,___