Kakaren ti HBH Keresek
Ieu mah mung sakadar pangalaman pribadi dina ngahadiran Halal Bihalal KUSnet di Pasantren Keresek dinten saptu ping 4 November 2006. Baktos, mrachmatrawyani Kasasar ka Sabda Alam Cipanas Rencanana ti Depok teh hayang miang jam 4 an, tapi dina prakna mah kakara jam 5.30 sore. Wanci magrib masih di Cawang keneh. Sababaraha kali nelpon kang Ndoell, sugan teh jumaah oge ka Keresek. Ari kitu teh cenah, jeung teh Imas sabtu isuk-isuk. Tapi dibere nomor hp na kang Deni. Alhamdulillah, lamun dijalan kasasar aya nu mandu. Jam 7 an kakara asup ka tol. Di jalan lancer, teu macet. Istirahat heula sabada liwat Sadang. Si cikal ngadon dahar sangu goreng heula. Nepi ka tol padalarang jam 9.30. Informasi ti kang Deni lebah-lebahna Keresek masih teu pati jelas. Mangkaning kuring tara jarambah ka wewengkon priangan wetan, jadi teu aya gambaran sama jalan anu rek disorang. Sabada kompromi jeung pamajikan, mobil dipengngkokeun ka Garut. Harita teh geus jam satengah sawelas, jalanan sepi pisan. Tibatan nyasar-nyasar teu puguh, ahirna ka Cipanas weh, ceuk batur pamajikan di Cipanas ngendong wae di Sabda Alam. Jam sawelas kakarek nepi ka Sabda Alam. Buru-buru laporan ka Kang Deni. Awak geus cape, kasasar di Sabda Alam Cipanas. Padahal Kang Deni geus nyayogikeun tempat di Keresek. (alhamdulillah kasasar ka Cipanas, lamun diteruskeun ngaliwatan Limbangan, pasti kasasarna. Sabab waktu mulang ti Keresek ngaliwatan rute anu disarankeun ku panicia, jigana moal nepi, komo deui jalan tengah peuting) Sumanget Jihad ka HBH KUSnet Enya kudu boga sumanget jihad (usaha anu soson-soson kalayan niat anu panceg) lamun rek ngahadiran HBH KUSnet di Pasantren Keresek. Jiga nu kaalaman ku kuring, dua poe saeuncanna poe H HBH, katarajang flu. Dokter mah nyarankeun supaya kemis-jumaah teh istirahat total. Tapi kusabab dibere amanah ku panicia jadi seksi surat-sorot dina acara HBH KUSnet, era ku panicia sejenna. Sanajan bari jeung sakapeung nyetiran mobil bari jeung ngantuk oge, dilakonan. Gogoda sejenna, barudak jeung pamajikan mugen teu daek ka Keresek. Ari budak mah mugen teh, hayang kokojayan dina cai panas. Ari pamajikan mah alesanana teh cape(mopo). Atuh, rundingan deui, ngayakeun kompromi, daek ka Keresek tapi sorena kudu geus mulang. Jam sapuluhan, kuring sorangan muru ka Keresek, setor muka ka panicia sejenna, sakalian nitip tustel ka Kang Deni, keur dokumentasi acara. Pamajikan jeung barudak masih istirahat di Sabda Alam. Sabada setor muka, balik deui ka Cipanas, ngajemput barudak. Barang datang ka Keresek Deui. Alhamdulillah acara kakarek dimimitian. Tapi kamera videona can aya, atuh rada rineh, soalna tugas motret geus diserahkeun ka panicia sejenna. Conto sejenna anu boga sumanget jihad ka KUSnet teh, kaalaman ku Kang Tito. Waktu ngobrol jeung pamajikan kuring, minggu kamari pisan kang Tito sakulawarga mulang ka Surabaya sabada pere lebaran. Tapi jumaah kamari, sosoranganan naek kareta ka Bandung deui (datang saptu subuh), ngaburu ka HBH KUSnet. Waktu kuring di jalan rek mulang ka Depok (masih di Cibatu) paamprok jeung Kang Maman Gantra, sosoranganan naek mobil (pastina oge rek ka pasantren Cikeresek). Padahal asana teh dina daftar anu konfirmasi rek datang ka HBH teu aya ngaran kang Maman. Jin Pasantren Keresek Kunanon kuring maksakeun ka Pasantren Keresek? Sabab panasaran, baheula taun 1970 an (atawa taun 1980 an?) maca dina majalah Mangle, aya carita nyambung (Jin Pasantren Keresek). Pikeun anu sok maca majalah Mangle mah pasti moal bireuk deui carita nyambung eta, jiga carita nyambung sejenna, nyaeta onom ti Rawalakbok. Hayang nyaho jiga kumaha Pasantren Keresek teh anu jadi seting carita dina majalah mangle. Jadi salila 30 taun kuring memendam kapanasaran ka Pasantren Keresek. Pasantren Keresek teh geuning ayana di hiji lengkob, luasna aya meureun 2 hektaran mah. Taneuhna sistem terasering (bertingkat-tingkat), taneuna subur, aya sababaraha imah, kobong, aula jeung imahna kang Deni. Aya tangkal buah anu keur buahan, meujeuhna lamun keur pirujakeun mah. Aya sababaraha balong, aya tangkal duren tapi ngaranggas, malum usum halodo. Di tukangeun pasantren aya walungan tapi caina teu ngalir. Bener kajadian, kuring manggihan bungkeuleukanana jin Pasantren Keresek. Sabada acara utama lekasan, aya acara ningali peta kuno jaman Karajaan Pajajaran jeung ningali bandera jaman Ciung Wanara. Tah, dina acara eta teh, katingali pisan jin Pasantren Keresek, sababaraha kali ngaleketek mang Jamal, anu keur serieus ningali peta kuno. (sok wae taros ka mang Jamal, ngarasa dileketek heunteu waktu ningali peta kuno) Dunungan jeung Juragan Jawara Ki Akis teh salah sahiji anu meunang pangajen ti KUSnet, sabage salah sahiji seniman pantun Sunda. Harita teh Ki Akis unjuk gigi mintonkeun kaahlian mantun, bari jeung metik kacapi. Puguh wae atuh hadirin ngarasa surprise, aya pertunjukkan seni pantun sunda anu jarang kasaksian. Ki Akis teh urang Banjaran, umurna geus 85 taun, tapi dedeg pangadegna jiga masih umur 50 an. Moal aya nu nyangka. Baheula mah aktif jadi guru sakola SMP, diajar pantun sacara otodidak teu aya nu ngajaran. Waktu ku kuring dicaritakeun bapa kuring pernah tugas di Banjaran ahir tahun 1960 an, Ki Akis ngomentaran oh atuh, tuang rama mah dunungan abdi. Taun harita Ki Akis masih jadi Guru. Tapi kiwari Ki Akis geus jadi Juragan jeung Jawara pantun Sunda. Teu Kabagean Bajigur, Domba guling & Brownies Teh Ika Ti awit HBH kahiji jeung kadua KUSnet, can kalaksanakeun bagadang jeung anggota KUSnet sejenna. Ari kahayang mah HBH katilu teh bisa ngiluan ngasaan daging domba guling garut, bajigurna teh Mpup, atawa Browniesna Teh Ika anu telat datang (jadi weh teu kaburu dihidangkeun dina acara saptu siang). Tapi kompromi jeung anak, pamajikan, hasilna kudu mulang ka Depok buru-buru. Jadi anu salah teh dahar beurang euweuh daging domba, bajigur jeung kueh Brownies Teh Ika. Hadro jeung Hard rock Aya kamonesan anyar dian acara HBH KUSnet katilu ayeuna. Si pembawa acara (Kang Ikmal jeung teh Al Ghifari), nyebut kecap hadro. Grup kasenian ieu teh ti Bungbulang, sesepuhna kasenian ieu, salah sahiji anu meunangkeun pangleler ti KUSnet. Harita oge dipintonkeun kasenian hadro. Nyaeta sakumpulan barudak anu ngibing (gaya penca silat) bari jeung diiringi ku lalaguan anu islami dipirig tatabeuhan genjring, kendang jeung tarompet. Sok sanajan hadro ieu make gaya penca silat oge, tapi sipatna heunteu hard rock (keras). Kasenian ieu di sababaraha tempat sok dingaranan kasenian rudat. Titipan ti HBH Keresek Balik ti acara HBH, kuring katitipan ku kang SR jeung ua Sasmita, kaos, buku keom jeung vcd seni beluk, keur disosialisasikeun di Kampus UI Depok. Pasar nu potensial pikeun ngamasyarakatkeun anu aya pakaitna jeung Kasundaan. Ke ku kuring rek ditawarkeun ka para anggota SIMPAY di FIB UI. Maenya tinu puluhan anggota teu aya nu katarik. Peuseur Migeuykeun Masyarakat Sabada ningali Pasantren Keresek, ditingali tina aspek geografis, sajarah jeung SDM nu aya, kuring boga kacindekan, sabenerna Pasantren Keresek boga potensi pikeun jadi tempat peuseur migeuykeun (Pusat Pemberdayaan ) masyarakat satempat. Naha dina widang ngalestarikeun lingkungan, elmu pangaweruh umum, pusat pabukon KUSnet, atawa pelatihan-pelatihan sejenna. Ieu asupan keur KUSnet, upama pasantren Keresek jadi salah sahiji pilot project program KUSnet, kuring ngadukung pisan. Pananggung jawabna serahkeun wae ka Jin pasantren Keresek. Tah, lamun kang.... (salon Bupati Garut) bener-bener jadi Bupati Garut, program anu utama, jadikeun Pasantren Keresek Pusat Pemberdayaan Masyarakat. Hayang ka Pasantren Keresek Deui Ieu komentar pamajikan kuring, sabada nganjang ka pasantren Keresek. Cenah mah hayang nganjang deui ka Keresek. Padahal mah, pamajikan kuring teh ti barang datang ka Keresek teh, ngajoprak wae (sare) di tepas imah kang Deni. Hawana sejuk, pokna teh. Komo deui bari jeung dahar di tepas imah kang Deni, mani kabayang nimatna. ____________________________________________________________________________________ Sponsored Link Get an Online or Campus degree Associate's, Bachelor's, or Master's - in less than one year. http://www.findtherightschool.com Komunitas Urang Sunda --> http://www.Urang-Sunda.or.id Yahoo! Groups Links <*> To visit your group on the web, go to: http://groups.yahoo.com/group/urangsunda/ <*> Your email settings: Individual Email | Traditional <*> To change settings online go to: http://groups.yahoo.com/group/urangsunda/join (Yahoo! ID required) <*> To change settings via email: mailto:[EMAIL PROTECTED] mailto:[EMAIL PROTECTED] <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/
