--- In [email protected], "oman abdurahman" <[EMAIL PROTECTED]> wrote: . Hiji bukti yen US masih meryogikeun falasifah model kitu. > > baktos, > manAR >
Leres pisan, Kang. Mangga teraskeun medar perkawis diajar ka sato ieu teh. (Oge ka Kang Ganjar sareng nu sanesna). Malih, ngolebat emutan: Kumaha upami pejemuhan ngeunaan ieu aya nu pirajeunan mangnyimpenkeun dina koropak milis (files). Supados langkung gampil ngarujukna. Oge, gampil di mana aya kaperyogian nu sanes. Upamana, bade dibukukeun. Nyimpen dina milis sailaharna, kawates ku waktos. Abdi milarian posting-posting lami (taun 2001), nu pinuh ku wacana sospol, nu teu kawadadahan buku-buku terbitan Perceka, tos teu tiasa. Tos dikonci. Pedaran salira ngeunaan Sunan Ambu, Siksa Kandang Karesian, oge nu sanesna, pamendak sim kuring, kalintang mangpaatna. Nu hartosna, aya saena dikoropakan. Kitu deui pedaran Kang Eddy, Kang Ilen, sareng sawatara wargi sanesna, nu nembongkeun sisi esoteris budaya Sunda. Kalih ti eta, pakait sareng palasipah, ajaran moral, atanapi naon nu ku abdi disebat sisi esoteris budaya Sunda eta, sim kuring oge hoyong terang perkawis "elmu" Kasumedangan sareng elmu Kagaluhan. Pon kitu deui naon nu disebat Perjalanan, Agama Sunda (nu tadi wengi, cenah, saur Aa Sudirman, janten topik Derap Hukum SCTV), jste. Intina mah nya sagala ajaran nu aya di Tatar Sunda atanapi pakuat-pakait sareng budaya Sunda. Ari perkawis Kasumedangan, sareng Kagaluhan, pedah bae sakalina ngobrol jeung sawatara sepuh sok kaluar kekecapan: "Bapa Anu mah ngagem Kasumedangan". Bari upami diudag langkung tebih, aranjeunna sok ngahulag ku alesan "can waktuna". Atawa memang anjeunna teu terang pisan. "Bapa ge ceuk cenah," kitu saur aranjeunna. Kagaluhan, lian ti sawatara sepuh sanesna di Ciamis, oge natrat dina seratan Pa Djadja ngeunaan sajarah Ciamis. Di dinya anjeunna nyebat perkawis Galuh Galeuhna Galih. Pedarannana, dina pamendak sim kuring, teu patos nyugemakeun. Mung saparagrap. Teu ngaberendelkeun kumaha-kumahana, nu sipatna "sistematis" nu nunjukkeun yen eta teh "elmu". (Atawa, boa-boa, naon nu dipedar MJ dina novel ka tiluna, dongeng ngeunaan jabang bayi, nu nyabit-nyabit perkara "nurani" satemenna medar perkawis eta? Kumaha MJ?). Seueur saleresna mah nu hoyong diuyup tina ieu milis teh. Tapi, samentawis mah nya perkawis ieu heula. Manawi Bah Willy, Kang Syam, MJ, oge nu sanesna, tiasa nyaeur gorowong nu aya? Baktos, Pun Maman
