Nuluykuen hanca nu katukang
Mangga geura leunyeupan bari urang ngaji diri sorangan naha geus bener jeng
papagon agama atawa jauh mempang tina agami nu ku uurang diagem
Tipayun nembe dugi ka Quran Surah Al-Baqarah Ayat ka 6 ayeuna urang guar
nusalajeungna.
Quran Surah Al-Baqarah Ayat ka 7
Khatamallaahu alaa quluubihim wa alaa samihim wa alaa ab-shaarihim
ghisyaawatuwwa lahum adzaabun azhiim
Hartina :
Allah ngonci hate jeung pangdengena, oge matana dipeungpeunan; nya pikeun
mareanehna adzab anu beurat kacida
Tafsirna :
Lamun dielingan tetep mungkir, dipapatahan kalahka ngabantah, rupa-rupa
kila-kila alamiah nu nuduhkeun ayana galagat kiamat saperti lini, banjir,
kahuruan, taneuh urug, gunung bitu jeung pirang-pirang bancang pakewuh nu
rarongkah henteu ditolih, nya ari enggeus embung-embung teuing digeuing atawa
teuhayang dipikanyaah dipikadeudeuh mah, sakalian hate jeung ceulina dikonci
mati ku Allah Swt. Jeung matana dipeungpeunan sapageuh-pageuhna. Pek rek kumaha
bae ayeuna mah, rek mamprung hirup ngaberung ngalajur napsu ngumbar kahayang,
tunggul diparud catang dirumpak, keur mantenna mah saeutik ge moal matak
kaciwit kulit kabawa daging. Teu, Allah mah teu bakal rugi saeutik-eutik acan.
Rek ngabadaus mawa karep sorangan kuma karep teuing, tapi engke dialam
akherat ulah sambat kaniaya, ulah majar diteungteuinganan, pasti bakal
nandangan tunggara nu beurat tanya papadana, disiksa dina naraka salalawasna.
Ninggang di nu nyakrawati bahu denda saperti Firaun jeung Namrud, lamun hate
geus dikonci pasti bakal dolim sawenang-wenang ngagulanggaper kaom dhuafaa,
moal aya rasrasan nganiaya jalma-jalma nu geus teu walakaya. Cacah kuricakan
pating jarerit kalaparan moal kadengeeun da ceulina geus di cocokan. Nu pating
laloher langlayeuseun moal kadeuleueun da matana geus dipengpeunan.
Quran Surah AL-Baqarah Ayat ka 8
Wa minannaasi mayyaquulu aamannaa billaahi wa bil-yaumil-aakhiri wamaa hum
bimuminiin
Hartina :
Di antara manusia aya nu ngaromong; Kami percaya ka Allah jeung kana poe
aherat, padahal manehna the lain jalma-jalma nu ariman
Tafsirna :
Dawuhan Gusti Allah dina ayat ieu pikeun ngelingan urang supaya awas tur
waspada sabab di antara babaturan urang nu sagulung-sagalang the aya nu
mindingan beungeut ku saweuy, api-pai mikanyaah mikaasih padahal sirik pidik
belang bayah, api-api iman padahal kafir nye eta munafik tea.
Diturunkeunana ayat ieu the aya patula-patalina jeung tingkahlaku dedengkot
munafikin urang Yahudi nya eta Abudllah bin Ubay. Siga nu enya harita teh
manehna nyampeurkeun semu rengkuh sirikna teu dedepaan siga nu isin baru uluk
salam jeung sasalaman ka Abu Bakar, Umar Jeung Ali. Nyarita galecok bari pigeuy
siga nu enya-enya gumbira terus ngobral puja jeung puji ka nu tiluan ku
ngedalkeun ucapan nu meunang ngaraeh saperti panghulu Bani Haysim,
Syaikhul-Islam, al-Faruq, hartawan nu dermawan, jeung rea-rea deui. Memeh undur
teu poho andum salamet heula.
Allah nu maha uningan kana uteuk tongo walang taga, boh nu nembrak boh nu
nyumput di jero gunung batu atawa nu nyelepet dina liang cocopet, nimbalan
Malaikat Jibril supaya nepikeun ayat 8 ieu ka Rasulullah saw. Sangkan awas tur
waspada.
Jaman harita mah kaum munafikin di Madinah teh kakarek saeutik teu loba
kabina-bina saperti ayeuna. Tapi sabuni-buni tarasi teu burung kacingcirihi,
geura upama kaum Muslimin bentrok jeung kaom kafirin, da sok di kekeyek ku nu
katepena islam teh angger kaom Muslimin. Breh kaciri cerongna. Loba nu
ngakukeun Islam tapi teu wawuh kana huruf al-Quran, ditanya naon hartina wahyu
ngabigeug, komo ari kana hadist mah siga anu anti, ngimpi ge meureun diangir
mandi da buktina aya golongan inkarusunnah. Katepena mah bener Islam tapi lamun
kumpul jeung batur salembur nu recok dialeohkeun the taya lian iwal ti
paririmbon, ari nu sok diguliksek ku urang dayeuh nu geus kabarat-baratan lain
al-Quran tapi buku-buku falsafah karya Plato, Aristoteles, Socrates jeung
saparakanca.
Dihiji RW ummat Islam nu geus mukalaf nurutkeun sensus aya kana 500 urangna,
tapi nu sok ka masjid mah beunang di itung dina curuk. Di kampung kitu di
dayeuh kitu, malah dina shalat subuh mah kadang-kadang aya imam tanpa mamum.
Diantara kaom munafikin the aya nu hianat, beungeutna nyanghareup ati
mungkir, pura-pura mikacingta Islam, saperti nu disinyalir dina Hadist Riwayat
Bukhari jeung Muslim. Dina hiji poe para shahabat Hudzaifah ngayakeun gunem
catur jeung Rasulullah. Salah saurang ti shahabat aya nu nyarita kurang leuwih
saperti kieu Ya Rasulullah, sayaktosna abdi sadaya kapungkur nalika masih
jahiliyah hirup tagiwur dina karusuhan nu taya kendatna, lajeung Allah maparin
kasaean nakdirkeun abdi sadaya jadi umat Islam; hirup tengtrem sabilulungan,
naha saparantos kasaean ieu teh bakal timbul deui kakacauan? diwaler ku
anjeuna; Bener bakal aya
Shahabat teh nanya deui; Naha saparantos kakacowan teh bakal aya deui
kasaean? Saur Rasulullah; Enya bakal datang deui kahadean tapi bakal kacampur
ku dakhanun. Ceuk nu nanya; Naon dakhanun teh, ya Rasulullah? Anjeuna
ngawaler; Jalma-jalma nu mere pituduh lain pituduh kuring (dina riwayat nu
sejen; Jalma-jalma nu ngagunakeun cara-cara lain tisunnah kuring) jeung nurut
kana pituduh salian ti pituduh kuring, ku maraneh kanyahoan jeung kudu
disingkahan. Shahabat nanya deui; Naha saparantos kasaean the aya deui
kawaonan? Di waler ku Rasulullah; Aya tukang dawah dina bangbarung
sababaraha panto jahanam. Jeung sing saha nu nurut kana uar pangajakna,
tanwande manehna di keceburkeun kana naraka.
Shahabat nanya deui: Ya Rasulullah, mugi diterangkeun sifat-sifat maranehna
teh ka abdi sadaya. Saur anjeuna; Dhahirna mah maranehna teh sarua jeung
urang pada pada Islam, nyaritakeun aya-ayat al-Quran jeung Hadist.
Ceuk shahabat: Abdi sadaya kedah kumaha upami papendak sareng nu kawas
kitu? Waler Rasulullah: Hidep sararea ulah kaluar tina jamaah kaom Muslimin
jeung imamna. Ceuk shahabat: Kumaha upami teu aya maranehna? Saur Anjeuna:
Jauhan kumaraneh Sakumna golongan eta, sanajan hidep sararea sangsara nepi ka
ngadahar akar-akaran. Nepi ka maot ulah rek biluk ka para daI nu aya dina
bangbarung sakabeh pantona.
Sakitu heula Isuk pageto urang lajeungkeun deui kana aya nu ka 9
----------------------------------------------------------------------
AGUS PAKUSARAKAN
+62 81283 776 62
http://www.hr-uwj.com
----------------------------------------------------------------------
http://aguspakusarakan.blogspot.com/
http://geocities.com/prabu_siliwangi
http://geocities.com/lodaya_9
http://azzoman.indonetwork.co.id/
http://siliwangi.blogs.friendster.com
http://inkas.wordpress.com
__________________________________________________
Do You Yahoo!?
Tired of spam? Yahoo! Mail has the best spam protection around
http://mail.yahoo.com
