> From: "mj" <[EMAIL PROTECTED]> > perkawis perang, di urang kamari2 aya perang leutik/perang lokal. > 1. perang 'integrasi vs anti integrasi', RI vs Fretilin di timtim
Perkara Timtim, kuring inget baheula di taun 1970'an. Harita teh balik ti lembur, ti Sumedang, naek "Colt" (baheula mah nu populer jadi angkutan umum antar kota teh minibus nu merkna Mitsubishi Colt). Waktu asup ka jero mobil, kuring rada kaget eusi panumpang teh tantara wungkul, ngarora keneh. Ari pangkatna mah masih "palang beureum" kabeh. Kuring diuk di jok pantukangna, nyempod dipangjuruna. Sajajalan ti Sumedang ka Bandung, para tantara teh "sempal-guyon" wae, cacakakan, komo deuih ditambahan ku supir nyetel lagu-lagu dangdut. Atuh aya nu joged2an, mani galumbira pisan, siga nu euweuh kasusah. Tina obrolan maranehna kuring jadi nyaho, eta para tantara teh ti Batalyon 301, nu markasna di Cimalaka Sumedang. Teu pati jauh ti lembur kuring, lembur kuring kaasup pangulinan maranehna. Para tantara nu samobil jeung kuring teh ngabring ka Bandung aya urusan ka Kodam Siliwangi. Maranehna tantara nu anyar asup, kakara anggeus dilatih 6 bulan. Sigana mah maranehna galumbira teh, pedah latihanana geus leukasan. Rencanana maranehna teh bulan hareup rek dikirim ka Timor-Timur. Harita mah lalakon katelengesan perang Timor- Timur acan pati kadenge. Jadi waktu ngareungeu maranehna rek dikirim ka Timtim teh, kuring biasa we, siga ngareungeu nu rek tugas di tempat sejen. Sataun ti harita, waktu kuring mulang ka lembur, ngadenge obrolan, cenah ayeuna mah para tantara ti 301 nu sok arulin ka lembur teh teu aya, teu baralik deui, saprakna dikirim ka Timtim. Ceuk beja mah cenah ampir sadayana "beak" diditu. Nu salamet teu ditugaskeun deui di Markas Batalyon tapi di Kodim, bari tanpadaksa. Ngareungeu kitu, ras ....kuring inget ka tantara-tantara nu samobil jeung kuring. Masih katempo wae, beungeut nu gulumbira, beres latihan, pinuh ku harepan, tapi perang meunggaskeun harepan, di Timor-Timur lain perang-perangan, tapi perang enyaan..... Baktos, WALUYA
