Batan ngalamun ieu mah............ Pangalaman simkuring tadi isuk dina angkot basa rek ngantor ka Nilem Buah Batu, rada isuk keneh miang teh da hayang salse maca koran Pikiran Rakyat. Dina angkot nu harita keur ngetem di gerbang Perum Cibolerang ukur aya dua siswa SMA nu keur maca buku Fisika. Alhamdulillah geuning loba keneh pelajar urang nu tara miceunan waktu keur nu produktip, kitu ceuk gerentes hate. Teu lila angkot teh biur najan harita ukur mawa tilu panumpang. Simkuring jeung dua siswa. Simkuring mah biasa ari dina angkot teh sok milih tempat nu pang tukangna ngarah bisa nyarande. Palebah parapatan Cibaduyut-Kopo angkot teh kakara rada pinuh, mun teu salah mah aya kana dalapan urang. Nu diuk peresis hareupeun kuring teh si bapa muda kira-kira 40 taun-an umurna. Necis jeung berseka, pasti jelema kantoran, ceuk kuring dina hate. Na ari palebah lampu beureum Caringin-Soekarno Hata si bapa kantoran teh ngaluarkeun roko, pelenyun udud bangun ku nimat. Tah palebah dieu kuring rada antipati najan enya udud teh hak pribadi sewang-sewang. Tapi ari di tempat umum mah atuh kudu bisa nalipak maneh. Ceuk bahasa keren na mah introspeksi tea meureun. Panumpang sejen, kitu deui kuring, euweuh nu komentar. Si dua siswa SMA jeung nu diuk peresis dina panto ukur lieuk-lieuk da meureun teu kuat ku mulekna haseup roko. Malah si nini nu diuk di sagigireun kuring mah pura-pura batuk. Tapi si bapa kantoran nu super necis mah ah jongjon we menikmati rokona. Dasar teu nyakola, ceuk hate, bari kuring mukakeun jandela angkot. "Pa,manawi teu kaabotan punten pangmukakeun jandela eta". Ceuk kuring nitah ka si bapa bari nunjuk kana jandela di gigireun manehna. Teu loba komentar si bapa mukakeun jandela bari lung ngalungkeun rokona nu panjang keneh ka luar angkot. Nuhun ,ceuk kuring ka si bapa . Alhamdulillah udara Bandung-pagi-nan-segar masih keneh bisa dinikmati. Oge alhamdulillah, geuning si bapa teh ngarti keneh yen angkot mah lain tempat keur ngaroko. Hayang ngaroko ? Ah silahkan sajah da moal aya nu nyarek atawa nu ngalarang.Tapi di tempat umum atawa dina angkot? No Way ! Tapi mangga wae ketah ari daek disebut jelema teu nyakola atawa egois mah. Tos ah ,eu mah kadar pangalaman tadi isuk .
Misan . --------------------------------- 8:00? 8:25? 8:40? Find a flick in no time with theYahoo! Search movie showtime shortcut.