Mimitina mah ka imah kuring katatamuan ku hiji lalaki, ceuk inyana manggih alamat teh tina Internet, tujuan datangna ka imah kuring rek neangan buku ngeunaan kujang, pedah eta kuring teh muka Rumah Baca Buku Sunda, cenah susuganan aya buku ngeunaan kujang. Hanjakal buku ngeunaan kujang teh euweuh, jeung sakanyaho kuring buku ngeunaan kujang anu husus ngabahas kujang can aya, can kungsi aya nu terbit. Aya ge ngan saukur sababaraha makalah atawa artikel dina koran atawa jurnal. Sakanyaho kuring anu nulis artikel ngeunaan kujang teh antarana : Snouck Hurgronje (1904), Rouffaer (1909), Hazeu (1904), Mubirman, Anis Jatisunda, Iip Zilkuifli Yahya, Haris Sukanda Natasasmita. Dina internet manggihan di www.indotalisman.com/kujang.html ( boa boa aya keneh, ka baraya anu terang punten sim kuring pasihan wartos), aya deui nyaeta artikelna Andrean Linder ngeunaan Panday Domas, hal ieu bisa jadi aya kaitanana jeung para empu anu asalna ti Pajajaran.
Tamu anu datang tea, terus we ngobrol sabulangbentor ngeunaan kujang jeung keris, lantaran kuring ge kataji kana kujang utamana dina palebah dokumentasina, nya tungtungna sapuk rek nepungan sababaraha kawawuhan anu kira-kira bakal nyaho ngeunaan kujang, nya dina tanggal 5 April 2007, kumpul di imah kuring aya 6 jalma, ngobrol uplek, aya nu resep ngoleksi kujang, aya nu boga gosali keur keris, gosali kujang, malah aya wartawan oge. Harita ngararancang gempungan leuleutikan di imahna Mas Wisnu di Pinus Regency Bandung. Tujuan gempungan aya dua nyieun paguyuban jeung diniatan ngumpulkeun bahan pikeun nyieun buku ngeunaan kujang. Gempungan leuleutikan tanggal 14 April 2007 kalakonan, lumayan anu hadir teh aya 17 jalma, kolektor, ti Musium Sri Baduga, Wartawan, akademisi, gosali, atuh anu ngan sakadar resep ge aya. Hasil gempungan mutuskeun nyieun PPK, Paguyuban Pecinta Kujang (tadina kuring ngusulkeun KPK, Komunitas Penggemar Kujang). Ketuana can ditunjuk, can karuhan saha-sahana, gempungan satuluyna bakal dilaksanakeun tanggal 28 April 2007 tempatna di Musium Sri Baduga. Gempungan tanggal 28 April 2007 geus dilaksanakeun tempatna di Musium Sri Baduga, nu hadir ngan 14 jalma, tapi leuwih euyeub tina profesina, lantaran aya kolektor, gosali keris, gosali kujang, ti ISI Solo, ti Musium, ti Balai Kajian Sejarah, ti Balai Arkeologi, jeung kuring nu ngan sakadar pangsiunan. Putusan tina ieu gempungan nyieun Tim Kecil keur ngararancang AD/ART kaasup nyusun struktur organisasi bari neangan nominasi pikeun ketuana. Tim Kecil teh diwangun ku 5 jalma, kaasup kuring. Kuring ge sakalian laporan geus nyieun email keur PPK nyaeta [EMAIL PROTECTED] atuh keur saheulaanan nyieun blog keur tempatna pengumunan intern bari bisa dikanyahokeun ku balarea, blogna nyaeta : http://paguyubankujang.blogspot.com Rapat munggaran tim kecil rek dilaksanakeun tanggal 3 Mei 2007 di Jl Kuningan Bandung. Tina obrolan santai rada loba nawu pangalaman tur kanyaho ti Mas Subandi ti ISI Solo, ngeunaan hal kerisologi, empu, jste. Mas Subandi ge keur nyusun buku ngeunaan kujang malah keur nyieun kujang pamor anu panggedena ( cenah mah satangtung jalma, lamun geus diperahan kurah leuwih dua meter jangkungna) hayang diasupkeun ka MURI ( he he .seuri maur bari rada hanjelu...naha nya kalahka dijieun ku urang Solo..?), ayeuna kakara anggeus 40%. Baraya, loba keneh hal hal ngeunaan Sunda anu encan didokumentasikeun (dijieun buku), diantarana ragam hias, batik, toponimi (buku toponimi nu aya kakara Bogor) , jste. Hayu ah urang babarengan ngotektak Kasundaan (kahade Kasundaan teh ulah ngan sakadar dihartikeun anu sifatna teologi wungkul). Aeh enya aya kapanasaran, kapan dina lambang Propinsi Jawa Barat teh aya gambar kujang, tah cik anu terang sugan tiasa masihan bongbolongan saha anu ngadesain eta lambang, lamun aya perdana nomer sabaraha taun sabaraha, jaman gubernur saha, kasang tukang pangna kujang aya dina eta lambang. Aya eta ge nu mere nyaho cenah mah aya di perpustakaan DPRD I Jabar, ngan kuring teh can kaburu ulin kadinya, malum pakepuk ku cicing tea. Loba organisasi anu make lambang kujang, Unpad, Perceka, Kodya Sukabumi, Kab Bogor, Kodya Bogor, Kab Cirebon. Naon atuh ari Kujang teh....?, naha bet asa beuki poekeun. MSasmita
