Tah kuring satuju pisan jeung kang Dudi. Sarerea oge didieu urang Sunda atawa nu mikacinta Sunda, benten pandangan mah biasa, nu penting sarerea ngarasa Sunda.
Kabeneran kuring kungsi ngadongeng di millis sabeulah soal kumaha pangcekadan soal kayakinan nu tadina leutik, malah ngagedean akibat paheuras-heuras. Tapi ieu dongeng saukur nu katangkep ku ingetan kuring ti carita salah saurang nu ngalaman kajadian ieu. Jadi upami aya nu lepat, nyuhungkeun pangapunten sareng koreksianana. Tah ieu dongengna: ======================= Kuring boga dongeng yeuh soal pindah agama, "oleh-oleh" kamari ulin ti Yogya. Di Yogya kuring papanggih jeung Pa X pangsiunan dosen jeung aslina urang Cigugur Kuningan, Anjeunna geus sepuh yuswana langkung ti 75 taun. Anjeunna ngaakangkeun ka kuring teh, padahal mah yuswana jauh. Uplek ngobrol kaditu-kadieu, tepi ka soal MADRAIS .... Cenah ceuk anjeunna Madrais teh masih sakaturunan keneh jeung anjeunna (sa-trah). Madrais teh ibuna urang Cigugur, masih wargi Pa D, ngan ramana teu jelas (aya nu nyebatkeun Pangeran ti Ciawigebang Cirebon). Nuju anomna, Madrais teh masantren jeung jalmina pinter pisan. Hiji waktu anjeunna padungdengan (debat) jeung para Kiai. Para Kiai teh kaelehkeun ku argumentasi Madrais, tapi embung ngaku, tepi ka kaluar ucapan nu teu pikaraoseun Madrais, "Alah ...ari maneh bapana saha?" Ti harita Madrais teh pundung, anjeunna sasatna ngejat, lumpat kana kabatinan/kapercayaan. Maklum turunan jalmi anu ageung pangaruh jeung oge anjeunna jalmi pinter, seueur nu ngiringan kana aliran nu diadegkeun. Salah sahiji ajaranana anti kana hal-hal nu impor/ ti luar. Akibatna Madrais kungsi lebet panjara di jaman kolonial. Jadi tiasa disebatkeun Madrais teh sebenerna mah "pejuang". Ku ngadegna aliran Madrais, urang Cigugur jadi kabeulah dua, aya nu tetep Islam (kaasup kulawarga pa X) aya oge nu ngiring aliran Madrais. Hiji waktu, di jaman geus merdeka, waktos Madrais parantos ngantunkeun, aya nu nikah, pamegetna ti kulawarga Islam, ari istrina ti aliran Madrais. Nikah ieu, akhirna jadi masalah keur dua kulawarga nu sabenerna mah sakaturunan. Masalah ieu akhirna murag ka Pangadilan/ Kajaksaan. Pa X, salaku wawakil ti kulawarga Islam, sabenerna mah geus nyabut perkara ieu, da ceuk anjeunna, rek dikukumaha oge Madrais jeung kulawargana teh masih dulur keneh, teu pantes tepi ka dibabawa ka pangadilan. Tapi jaksa nu nyekel perkara ieu, kabeneran urang Batak Islam, kalahka nyebut ieu jadi urusan kajaksaan/pamarentah. Kajaksaan akhirna ngalarang aliran Madrais. Para pengikut Madrais, akhirna aya nu lebet Islam deui, aya oge nu lebet Katholik. Ari ceuk kuring teh naha make lalebet Katholik? Tah ieu masalahna. Ceuk Pa X mah, para Kiai teh salah cara ngadeukeutanana, sabab make jalan heuras. Contona lamun rek asup Islam deui wajib kudu disunat heula. Akibatna nu sieun disunat pada mugen, maklum geus karolot. Asup weh Pastor, "Kiai" Katholik nu make cara lemah-lembut jeung bisa "ngahubungkeun" Madrais jeung Yesus nu sami2 teu gaduh rama. Nya garaleblus weh arasup Katholik tepi ka ayeuna. Waktu nyaritakeun eta, Pa X nyariosna rada ngalimba:" Padahal sadayana oge dulur-dulur Akang ....." Cag ah, nyuhunkeun pangapunten ka Urang Cigugur, boh nu ti Islam atanapi ti ageman sanes upami seueur lepatna maklum nulisna ukur sakainget .... ================================== Baktos, WALUYA --- In [email protected], "dudi_ss" <[EMAIL PROTECTED]> wrote: > > Mangga Kang Teddy di teraskeun tong ringrang tong haringrang, > patarosan-patarosan samodel kitu "Alloh aya imahan" kedah dipasihan preambul
