Urang mulih deui ka Sunda..... Lieur mikiran BBM naek jeung sajabana.
TUJUH RAJA SAMAGAMA
Carois nagri linuhung
Rahayat sabar tur surti
Rajana ragrag tunggara
Naek tahta teu kajudi
Turun tahta diemprakan
Silih ganti dipeupeurih
Raja munggaran kamashur
Calakan kasep tur sakti
Gagah rongkah jeung wibawa
Pidato ngaguyang ati
Rahayat kasirep manah
Cahyaning satria mukti
Raja numindeng tafakur
Mungguh alum ujug nyepi
Rahayat kokoreakan
Dibalur fitnah nu sirik
Kakecrik ku jala tunda
Sireum beureum ngegel matih
Raja nu diagung-agung
Nyorodot mihape wanci
nyangsangkeun ageman sukma
Jaladri tangtos ngajadi
Jaga rahayat santosa
Ngibing kinanti mustari
Raja kadua lumungsur
Caka ciki ngabeberik
Sireum beureum paburisat
Nuwantun enggal dibedil
Nu sieun dijeun kerak
Nu nyumput disapu martil
Katenjo okos nu makmur
Rahayat nagog ceurik
Ngusap tuur bari ketap
puerih peujit burit pati
buruh dipelak ngarenghap
malipir kasisi pabrik
Peurih rahayat ngagulung
Nyuntrungkeun raja ngaguling
Pahlawan nu kabeurangan
Ngarasa geus meunang wangsit
Padahal suing sabeulah
Milu aug bari ngingsring
Raja katilu mucunghul
Tuturubun beuki seuri
Pinter kusagala bisa
Elmu nyieun manuk beusi
Na uteuk ajol-ajolan
Polostrong ka jalmi-jalmi
Raja kaopat dituntun
Sinatria demokrasi
Luhung elmu dinul Islam
Kabogoh sakabeh santri
Putu wali nu karomah
Panutan para kiyai
Harepan digawir waktu
Diteundeun dilamping wangi
Rahayat kaburu hanjat
Raja buru-buru indit
Inggis ka nu mangku hajat
Mulang ka bu nu ngawit
Raja kalima ratu
Istri binangkit tumampi
Kalangkang cahyaning rama
Sabar darana nunggeulis
Geulisna wening cisoca
clak putih manah widuri
Sireum hejo ngagurumut
Miceungceum nami agami
Nyi ratu ngaheungheum nyaah
Sadaya sami walagri
rametek nu ngagareuwah
ratu mesem bari peurih
Ratu mulih waktor suwung
Rahayat keur henang hening
Galinggey tahta ditilar
Layar beureum gentos kelir
Walatra hejo ngajajar
Kembang korma ngalalantri
Raja kagenep jol manggung
Dipunjung diisin-isin
Naek tahta teu kahaja
Nyugemakeun nurarungsing
Nyumponan kalangkang banda
Panyumputan nu korupsi
Raja ngadawuh samutut
Nyarios ageman suci
Miwuruk bari can hadas
Ngajak eling bari nyengir
Rahayat kapegung urat
Rek ngadat lapar na peujit
Peurih kawengku ku imut
Balangsak kahibur janji
Rahayat panjang kasabar
Mungguh ngahampura deui
Bari nyuntrungkeun rajana
Pamimpin pating garuling
Raja nengkas embung mundur
Nagri paciweuh ngulisik
Hukum adonan bibika
Sanjata pamungkas diri
Hakim jaksa ngiring bingah
Kenging cengcelengan kendi
Ragrag mah moal kaluhur
Caang mah moal ti peuting
Raja nyekek kasorangan
Simeut meuting dina jeunjing
Tikusruk kana durukan
Rengse lalakon nagari
Sumpingna raja katujuh
Samagaha nyinglar pamit
Bulan nyimbeuhkeun cahaya
panonpoe bingah ngibing
Tahta purba ngawit muka
Sitinggil sumping ti langit
Sinatria beunghar rengkuh
Dada mencrang ku kanyaah
Panutan sagala alam
Sakti ku weningna ati
Marahmai alam bungangang
Sumping santri ti surgawi
Raja nu teu batal wudu
Rahayat murak kabungah
Seubeuh beuteung mundel peujit
Ciri nagri loh jinawi
Paheula heula sidekah
Paburu-buru ngawajit
Raja nu tabu kubendu
Welas asih sering nangis
Ngaraos seueur kakirang
Sanaos buktos santosa
Teu weleh nyuuh hampura
Sumamprak sakujur batin.
-------------------------------------------
---------------------------------
Yahoo! Toolbar kini dilengkapi dengan Search Assist. Download sekarang juga.
