Sigana geus sapuk yen kosmologi urang sunda leuwih nyoko kana ngahuma, alatanan nu mindeng dipake kaayaan kontur alam tanah Sunda nu loba gunung, atuh alatan sejen pedah kapanggih di masarakat Kanekes ti bihari tug nepi ka kiwari masih keneh ngahuma. Ngahuma lain bae ngan sakadar ngahuma tapi deuih sok disebut masarakat nu pipindahan (semi sedenter). Lamun enya pipindahan naha pipindahan anu kumaha, nomaden dina harti pindah sakarepna siga kaum Gipsi di Eropah, atawa ngan semi sedenter siga masarakat Kanekes ayeuna?. Keur kuring mah asa cop kana semi sedenter, sacara periodik bakal balik deui ka awal ( ceuk hiji buku masarakat Kanekes mimitina mah salapan taun kakara balik deui ngaropea tanah nu awal, kadieunakeun jadi lima taunan pedah populasi beuki loba hartina lahan beuki saeutik). Lamun pipindahan teh nomaden, meureun imah teh lain banda pakaya nu utama, ngan sakadar tempat reureuh. Sabalikna lamun semi sedenter imah tetep jadi banda pakaya da teu ditinggalkeun, di culjeunkeun, ngan meureun teu pati diurus. Sok sanajan masarakat Kanekes mangsa kiwari imah teh geus jadi banda pakaya nu dienya enya. Tapi sok sanajan kitu urang Sunda geus dicap kosmologis ngahuma. Meureun awal-awalna pisan mah enya nomaden, pipindahan sakahayang, can tangtu balik deui ka tempat asal. Urang enyakeun we siga kitu. Lamun enya siga kitu kira-kira anu dibabawa tur tara leupas teh diantarana parabot, bisa bae mangrupa amparan (samak), wawadahan jeung pakarang. Dina jaman mana atuh eta kajadian teh..?. Nya meureun nganteng we ti mimiti jaman pindahna bangsa bangsa ti daratan Asia ka Indonesia tug nepi ka jaman Pajajaran atawa nepi ka Mataram ngaaneksasi Tatar Sunda (mangga ieu mah bagian ahli sajarah). Kira-kira amparan, wawadahan jeung pakarang naon nu dipake..? Lamun ningali dina buku History of Java Raffles aya berendelan gambar rupa parabot keur tatanen, euweuh gambar bedog, nu aya teh lolobana mangrupa arit malah aya nu siga kujang (kudi tea meureun). Tapi, dibagian pakarang aya gambar rada lengkep, dina gambar ieu aya gambar bedog (golok), disebutkeun eta teh pakarang raja atawa sahenteuna keur pakarang para perjurit raja (urang rada bedakeun antara parabot (alat keur gawe) jeung pakarang (alat keur bela diri), tujuanana mah ambih gampil ngabedakeun antara alat keur gawe jeung keur bela diri). Ana kitu naon atuh alat keur digawe di huma..?. Diantarana nu mindeng katingali mangsa kuring keur budak keneh nyaeta aseuk, tapi pan eta mah sanggeus taneuh dirarata, melak binih teh langsung diasupkeun kana liang meunang ngaseuk. Lamun diwawaas milih tempat keur ngahuma teh tangtu taneuhna dianggap lendo, henteu dina taneuh nu gurawes, deukeut ka susukan atawa wahangan, relatif rata tur lega. Meureun ngabukbak heula, reuma diberesihan tangkal nu ngahalangan dituar sahenteuna dahan bae di tutuh sangkan ulah ngahieuman, alatna nu dipake tangtu nu rada gede, weweg tur ampeg nya pastina leuwih ideal kana wangun bedog. Ari reuma atawa jujukutan mah lain dibabad tapi dirabut ambih akarna kabetot tur tujuanana bari sakalian malikeun taneuh. Taneuh teu dipacul da pacul mah alat keur nyawah dina taneuh nu hipu kacaian, dina lahan keur huma cukup ku sosogrok siga aseuk. Meureun, lamun tea mah bisa aya kacindekan yen bedog teh salah sahiji parabot keur ngahuma, atawa sebut we keur masarakat nu lain nyawah, hal ieu bisa ditingali ayana wangun nu meh sarimbag jeung bedog di daerah nu lain nyawah, saperti di Sumatra, Kalimantan jeung tempat sejen, aya nu nyebut klewang, parang, penai, mandau. Aya nu bade nambihan atanapi ngoreksi..mangga diantos pisan pedaranana. Aeh enya di daerah Cimahi caket Batujajar aya nu disebat daerah Tipar, geuning tipar teh hartosna sami sareng huma.
MSasmita.
