Musieum Geologi Anjog ka Musieum Geologi, awak rancucut. Ah, tapi cuex beybeh* Musieum nu diadegkeun tanggal 16 Mei 1928 ieu, meunang bantuan ti Japan International Cooperation Agency (JICA), dibuka deui & diresmikeun ku Wakil Persiden Megawati Soekarnoputri tanggal 23 Agustus 2000. Harita SBY masih keneh jadi Mentri Pertambangan Energi.
Sup ka rohangan hareup aya pameran poto pegunungan Karst di Padalarang nu karek diresmikeun ku bentang iklan Bodrex, Wagub Dede Yusuf. Musieum ieu dibagi jadi 3 rohangan nyaeta, rohangan Sajarah Kehidupan, rohangan Geologi Indonesia jeung rohangan Geologi dan Kehidupan Manusia. Di musieum ieu diteundeun jeung dikokolakeun materi geologi kayaning fosil, batuan, mineral nu dikumpulkeun minangka hasil gawe lapangan di Indonesia ti mimiti taun 1850. Tah, geuning... nu diteangan teh keur ngajugrug di bah pojok, rorongkong T-rex, huntuna nyanggereng (naha teu disada "ting!" nya? Puguh da lain iklan Pepsodent hihii), kaasup sato nu panggalakna jaman harita* Euleuh Gusti, ni badag ningan! Dipoto? Ih, pasti atuwh*logay (loba gaya) dihandapeun rorongkong T-rex* Salian ti eta aya rorongkong badak, gajah, kuya, srrd. Sup ka rohangan hiji deui, loba rupa-rupa batok sirah jelema, aya nu leutik, aya nu gede, nu polos jeung borelang. Nu aneh mah batok sirah urang Perancis, cameuh, naha bisa kitu nya? Ceuk ceunah mah urang Perancis teh romantis (leres Kang Tanaoers?), trus naon hubunganana jeung cameuh? hehehe*Hanjakal rohangan nu hiji deui teu kaburu dititenan, da kaburu dibubura ku petugas, waktuna beak. Atuh da teu beakeun waktu kumaha? Lila teuing di musieum KAA, aya nongton bareng sajarah nu dipedar ku tokoh2 & saksi mata nu aya keneh dikieuna, tapi keun bae* jadi nambahan pangaweruh. Ke*ke* asa teu ningali Mang Oman, Bos Geologi, kamana nya? Puguh da lain petugas musieum, jaba poe Minggu, nya pere meureun heuheu*Kaluar ti musieum Geologi, hujan nu tadina geus leutik jadi ngagedean deui. Suku mimiti karasa cangkeul, cik impleng ku baraya geura ti Jl. Asia Afrika kituu*leumpang ka Jl. Diponegoro, bari huhujanan deuih?... Musieum Pos Indonesia Ti taun 1931 keneh geus mimiti dibuka Musieum Pos Telegraph & Telepon (PTT) di Kantor Pusat PTT, Jl. Cilaki no. 55 (ayeuna 73) Bandung. Gedong ieu kungsi kaluli-luli, ampir kapopohokeun, antukna taun 1980, Direksi Perum Pos & Giro nyieun panitia keur ngahirupkeun deui eta musieum. Tanggal 27 September 1983 dina raraga Hari Bhakti Postel ka 38, musieum ieu diresmikeun & dibuka keur balarea ku Menteri Pariwisata Pos & Telekomunikasi, Achmad Tahir dibere ngaran Musium Pos dan Giro. Mimiti tanggal 20 Juni 1995, ngaran musieum diganti jadi Musium Pos Indonesia saluyu jeung pausahaanana. Eusi musieum ieu kayaning prangko nu aya di Indonesia jeung nagara-nagara nu aya di sakuliah dunya. Salian eta dipamerkeun oge alat-alat nu aya pakuat-pakaitna jeung sejarah pos di Indonesia kayaning kiloan, alat nyitak parangko, surat-surat, armada tukang pos srrd. Kiwari, ampir unggal jelema, ti pejabat nepi ka jelema leutik boga HP. Ngirim surat teu kudu nulis, diasupkeun kana amplop, napelkeun perangko (bari diletak ku ciduh), tapi cukup ku SMS atawa email. Nu masih keneh kawilang "aya keneh harepan" nyaeta ngirim barang nu aya bungkeuleukanana, eta ge mun teu kalindih ku pausahaan jasa kurir swasta nu leuwih alus dina ngalayananana contona Tiki, Pandusiwi, Elteha, DHL, Fed-Ex, srrd. Mun nitenan kaayaan ayeuna, pihak kantor pos teu geura bebenah, bisa tinggal ngaran & bener-bener dimusieumkeun. Gedong Sate Hayang seuri oge, ningali Teh Herni & Kang Gibson nu nyangsaya bari nundutan (capeeun) dina troli nungguan hujan raat. Alhamdulillah, ngaso heula bari dahar beurang ditukangeun Gedong Sate. Hujan masih keneh ngaririncik. Beres dahar aya acara bagi-bagi hadiah, mani rame areak-eakan, maklum barudak ngora. Kelompok nu tadina dibagi lima, jadi dibagi dua. Aya nu balik ka imahna sewang-sewangan, aya nu nuluykeun naek ka munara Gedong Sate. Kuring & Teh Herni, sapamadegan, masing tuur leklok tapi keukeuh hayang nyaho kumaha kaayaan di luhur. Napas ngahegak, eungap. Taraje paragi ka luhur leutik (ampir saawakeun) jaba mani luhur pisan, tapi bakat ku hayang nyaho, nepi oge ka luhur. Subhanallah, ni endah ningali kaayaan kota Bandung ti luhur sanajan bari hujan ngaririncik ge. Loba korsi jangkung, jiga di café-café* naek deui ka luhur sarua loba korsi, paragi niis meureun. Hanjakal kaayaan jadi rarujit da loba cai hujan nu ceret asup ka jero. Teu voho, jutrak-jetrek heula difoto. Teu lila di luhur teh da kaburu burit, sieun dibubura deui kunu jaga. Saacan turun, nitenan heula pameran sabangsaning foto2 sajarah Gedong Sate & Jawa Barat, jeung parabotan khas Sunda. Tipada suku beuki lek-lok, Kang Gibson ngajakan naek lift, ari pek teh nyasab heuheu* Pamiarsa, sakitu heula siaran langsung ti Gedong Sate-Bandung. adioz, amigoz, permioz* :) ro2
