Kocap kacarita, Raja Jimbul anu gembul sakali dahar beak sangu sadingkul. Hiji mangsa manehna ngayakeun saembara masak. Eta saembara teh hadiahna memang pikabitaeun. Sing saha jalma anu meunang saembara bakal diangkat jadi candoli karaton ngagantikeun candoli anu ayeuna.
Pamilon dina eta sayembara loba pisan. Ampir kabeh juru masak restoran gede jadi pamilon. Acan jawara-jawara masak ti unggal daerah patalukan. Ari anu jadi juri dina eta sayembara teh nyaeta Bagawan Sari Rasa ti padepokan Hawu Sarebu. Sang Bagawan teh kawentar kana kalinuhungannana dina urusan masak-memasak. Cukup ku ngambeu seungitna hiji masakan, ku manehna geus bisa kanyahoan, naon wae bungbu anu dipake atawa sabaraha lila ngagorengna, jsb. Sanggeus ngaliwatan proses seleksi, ahirna sayembara teh nepi ka babak final (ulah poho 'F' na sing bentes nya he..he..he..). Pamilon anu nyesa di babak final kari dua deui nyaeta Jaka Centong ti gunung Aseupan jeung Candoli karaton tea nyaeta Adipati Kacingcalang. Saembara ieu teh mawa kabungahan ka sarerea, utamana kangjeng prabu Raja Jimbul. Sabab manehna bisa unggal poe ngasaan kadaharan anu ngarareunah hasil karya ahli-ahli masak. Kitu deui para pamilon, sok sanajan maranehna teu bisa asup ka babak final, tapi sahenteuna maranehna bisa ngabuktikeun yen dirina teh lain tukang masak sambarangan, sabab bisa ngiluan kana saembara karajaan. Hal ieu teh tangtu ningkatkeun ajen dirina salaku ahli masak. "Urang moal bisa nyugemakeun sakabeh jalma", paribasa kieu teh sigana mah keuna oge keur acara saembara ieu. Buktina aya saurang anu teu bungah kana diayakeunana ieu saembara. Jalma ieu teh nyaeta Adipati Kacincalang tea. Ari kituna mah kaharti sabab ku ayana ieu saembara, kadudukan manehna salaku candoli karaton jadi kaancam. Sabenerna Adipati Kacincalang teh kaasup jalma linuhung dina widang masak-memasak mah. Samalah lamun dibandingkeun jeung Bagawan Sari Rasa, paling beda saeutik. Ngan nya kitu, ngaran-ngaran jalma anu boga kadudukan, sok poho ka temah wadi. Salila jadi Candoli Karaton, Adipati Kacincalang jadi jalma adigung jeung korup. Kalawan ngagunakeun kadudukanna manehna bisa ngawasa kana perdagangan minyak goreng, daging sapi, kacang kadele jeung beas, sarta barang-barang kabutuhan pangan sejenna. Nu matak teu heran, sanajan tanah karajaan subur, melak regang jadi tangkal ceuk paribasana, angger we harga dahareun teh mararahal. Kusabab daging sapi kudu ngimpor, beas ngimpor, kacang kadele ngimpor, sagala ngimpor. Hal ieu teh akibat kasarakahan Adipati Kacingcalang. Sabenerna geus lila Raja Jimbul nyaho kana kalakuan Adipati Kacingcalang teh. Samalah kangjeng raja mah nyaho leuwih jero deui. Manehna geus nyahoeun yen Adipati Kacingcalang teh sabenerna mah telik sandi atawa mata-mata ti karajaan tatangga. Tapi ku Raja Jimbul teu langsung di tewak, tapi ditalingakeun heula. Sabab manehna hayang nyaho heula, naon tujuana Adipati Kacingcalang nyusup ka jero karaton manehna. Nu matak kangjeng Raja api-api teu nyaho we. Raja Jimbul geus ngerahkeun jajaran intelijenna supaya nalingakeun gerak-gerik Adipati Kacingcalang. Sakabeh aktifitas komunikasi Adipati disadap. Samalah hiji mangsa pihak intelijen Raja Jimbul berhasil nangkep jeung nerjemahkeun transmisi satelit anu dikirim ti istal anu aya di tukangeun gedongna Adipati Kacingcalang. Sanggeus ditalungtik ku saurang intel anu nyamar jadi tukang maraban kuda, ahirna kanyahoan Adipati Kacingcalang nyumputkeun alat transmisi satelitna dina wadah parab kuda, ditutupan ku jukut. Narima laporan ti dinas intelijen, Raja Jimbul beak kasabaranna. Ngan manehna teu sagawayah, Raja hayang 'caina herang laukna beunang'. Ahirna basa keur ngadahar semur jengkol kabeukina, Raja meunang ide ngayakeun saembara masak. Cunduk kana waktu anu geus ditangtukeun, poean final saembara masak. Dina babak final ieu, para pamilon kudu nyieun masakan anu sarua, nyaeta katuangan kasedep kangjeng Prabu Raja Jimbul, nyaeta Semur Jengkol. Jaka Centong geus siap dina tempatna pon kitu deui Adipati Kacingcalang. Sanggeus goong ditakol, maranehna ngamimitian masak. Masing-masing papada ngetrukkeun sakabeh kabisana. ***bersambung*** -- Sent NOT from my BlackBerry® powered NOT by Sinyal Kuat INDOSAT/XL/whatever ***Gue gak punya blackberry, puas?!
