Tadi peuting, malem Jumaah 16 Juli 2009, di Bale Rumawat Unpad, aya pagelaran tembang Sunda, ngan nu nembangna Mojang India, ngarana Anita Subramanian, ceuk beja mah umurna kakara 20 taun. Inyana keur nyuprih elmu di Atlanta hal music etnis. Ku pembingbingna dibere CD tembang Sunda nu ngahaleuangna Euis Komariah, kataji, tuluy hayang diajar, nya nepi ka nyucruk ka Tatar Sunda. Guguruna ka Euis Komariah pisan. Diajarna ngan ukur tilu bulan tapi geus ngawasa opat laras (pelog, sorog, mandalung.....poho hiji deui mah). Ceuk nu mere komentar Ubun Kubarsyah, ieu teh luar biasa kana sensitifitas music ti Anita. Unggal Anita anggeus nambang hiji lagu, nu lalajo keprok ari celengkeung teh Aom Kusman ngomong...lain keprok..mikir atuh..., puguh we nu sejen ge seuri maur, heueuh sirik meureun aya budak ti India bisa nembang Sunda kalawan alus, urang Sunda sorangan can tangtu bisa siga manehna. Tapi aya deui nu mere komentar sanajan bari ngaharewos (nu lalajo di tukangeun kuring) sukur puguh aya bangsa deungeun daek diajar tembang Sunda, jeung pan guruna ge Ceu Euis pisan, mun kitu diajar, guruna di nagri sejen, nu nembang asing, manggung di urang...tah eta mah rada handeueul. Euis Komariah ngajarna make metode ngabeo, diturutan unggal pada, ku Anita di rekam jeung make notasi cacing (teuing nu kumaha). Nya hasilna pagelaran di Bale Rumawat. Bisi panasaran ieu rekaman sorana (hampura rada gede) jeung gambarna Anita. Aya beja ti Bale Rumawat Unpad, engke tanggal 29 Juli 2009 bakal aya pagelaran Sinden Beken, sababaraha sinden nu geus moyan ti nu geus sepuh dugi ka budak ngora, bakal manggung bareng di Unpad.
MSas
