Mawa Leunca ka Walanda Ku Mang Jamal
Pereluna ka Walanda teh lain ngan ukur hayang ngasaan datang ka negeri nu bangsana kungsi ngajajah Nusantara ku cara nyieun nagara Hindia Belanda nu ayeuna jadi Indonesia, tapi susuganan manggih tambahan bahan pikeun nyusun disertasi nu rek dikeureuyeuh di Program Ilmu Seni Rupa & Desain ITB nu jejerna perkara Estetika Sunda tea. Kabeneran Dikti ngayakeun program Sandwich-like pikeun mahasiswa tingkat doktor. Nya milu daptar, alhamdulillah, lulus seleksi. Gura-giru nyieun paspor, da nu baheula geus kadaluwarsa. Milih nagara Walanda jeung kampus Universitas Leiden teh dumasar beja yen di Leiden aya pabukon KITLV tea, nu ngoleksi sagala rupa soal Indonesia nu tangtuna aya soal Sunda. Sugan di dinya manggih naon rupa nu keur diteangan. Indit teh bareng jeung Asnita Frida Sebayang, mahasiswa program doktor Planologi ITB. Manehna mah rek ka Universitas Groningen, Walanda Kaler. Sabenerna ka Universitas Leiden teh duaan jeung Innes, dosen Seni Patung Fakultas Seni Rupa & Desain ITB, ngan Innes rek indit pandeuri. Naek Pesawat Malaysia Ku travel biro dipesenkeun tiket pesawat Malaysia Air System (MAS). Poe ngapung geus ditangtukeun, 29 Oktober 2009. Ti awal mula boga kereteg yen pastina rute penerbangan Jakarta-Amsterdam teh, persisna mah ti bandara Sukarno-Hatta Cengkareng ka Schiphol Belanda pasti bogana Garuda Indonesia. Ngan kusabab aya larangan pesawat Indonesia teu meunang ngapung ka Eropa, pedah kamari-kamari loba pesawat penerbangan Indonesia nu marurag, jalur eta sigana mah 'disewakeun' ka penerbangan Malaysia. Enya we, basa pesawat turun di Schiphol dina pengumumanana dina speker, pilot nyaritakeun yen penerbangan ieu gawe bareng Malaysia Air System jeung Garuda Indonesia. Pesawat nu ka Eropakeun mah nu badag, Boeing 747-400. Kalolobana penumpang bule wungkul. Kabagean diuk teh jeung sapasang bule Amsterdam nu tas jalan-jalan ka Australia. Katembongna duanana resep maca, da dina pesawat teh mun teu sare, duanan maca buku basa Walanda. Si Ibu, basa pesawat geus luhureun daratan Eropa, ngajak ngobrol ku basa Inggris. Nya mimitina mah nanyakeun naha kuring teu sare-sare. Sabab ari pas manehna hudang, sok kasampak kuring keur nonton tv leutik nu napel dina tonggong jok hareup. Padahal sare oge sanajan sakerejepan. Si Ibu tatalek, rek naon ka Walanda. Nya dicaritakeun yen rek ka Universitas Leiden salila tilu bulan. Ngobrol uplek basa Inggris nu kabeneran marucunghul deui bari sakapeung saralah. Apaleun latar akademis widang desain interior-nu deukeut ka arsitektur, manehna nyaritakeun sababaraha tempat di Amsterdam jeung Belanda umumna nu cenah desaina alus. Nyebut oge tempat imah munggaran karya Gerrit Ritvield nu mangrupa realisasi teori gaya desain De Stijl- gaya nu kapangaruhan ku aliran seni lukis Neo-plastisisme (atawa disebut oge seni lukis De Stijl Piet Mondrian). Gaya desain ieu lahir di Leiden taun 1917. Schiphol Turun ti pesawat di bandara Schiphol Belanda jam 10an. Hate surak. Lain kunanaon, eta we, ngalaman ka Eropah deui sanggeus dua belas taun, bari manggih deui usum tiis (winter). Tahun 1997, munggaran ka Eropa teh. Eropana oge ka wewengkon nu teu pati kawentar di urang, nyaeta ka Kopenhagen Denmark, pikeun diajar desain mebel sasemester di Kunstakademiet Arkitekskole. Harita mah meunang beasiswa ti Danida (Danish Agency for International Development). Bedana harita mah datangna Januari, keur meumeujeuhna tiis, hawa tiisna ge teu kira-kira, 15 darajat celsius handapeun enol! Jadi luhureun cai di basisir teh loba balok es, alatan beungeut cai laut katiisan teuing. Kitu deui, beungeut cai di dano, beku, nepi ka bisa dipake leumpang. Di Finlandia jeung Swedia mah dipake maen ski tea. Ayeuna teh keur musim gugur (fall/autum). Disebut musim gugur, sabab dangdaunan maruragan tina tangkalna. Cara alam pikeun nyaimbangkeun kahirupan. Sabab salila usum tiis, cahaya panon poe saeutik pisan malah euweuh, jadi dangdaunan muragkeun maneh da teu bisa ngalakukeun fotosintesis tea. Sanajan can boga kamer kos pikeun cicing, karasa tenang datang ka Walanda mah. Make jurus piraku teu manggih urang Indonesia. Samemehna geus neangan kawawuhan di Belanda utamana Leiden, ngaliwatan internet, milis jeung facebook, sakalian neangan tempat pikeun kos. Kamer mah aya ngan can manggih nu cocog utamana dina segi harga sewa. Biasa, neangan nu murah. Cara nyewa kamer di batur mah, kudu nunda duit jaminan, basa Walandana borg (boreh) tea. Neangan kawawuhan mah, nya manggih sababaraha urang Indonesia, malah urang Sunda pisan. Diantara kang Rahman di Wassenaar, nu rek nginjemkeun sapedahna salila di Lieden. Ka kang Rahman wawuh ngaran geus rada lila, da anjeuna nu boga milis [email protected]. Hiji deui kang Deni 'Shudung' Natasuanda. Duanana nikah ka urang Walanda. Wanoh ka Kang Deni mah dituduhkeun ku kang Abdul Hamid, dosen di Jurusan Bahasa & Sastra Indonesia Unpad. Turun di Schiphol teh reugreug we nu aya, da salamet jeung nepi ka Walanda, sanajan sabenerna can boga tempat ampih. Nuhun pisan ka kang Deni, nu ngahaja ngajemput bari ngajak ka tempatna nganjrek di Leiderdorp, kaleren Leiden. Ngendong meunang dua peuting. Kang Deni 'Shudung" Natasuanda teh urang Cimahi kalahiran taun 1965, blasteran Panjalu-Ujung Berung. Bapa kang Deni urang Panjalu Ciamis sareng Ibu ti Ujungberung. Kuliahna di Jurusan Sejarah Fakultas Sastra Universitas Andalas Padang. Meunangkeun istri urang Walanda, Gerdien Schriek. Duanana panggih di kampus Unand Padang eta. Kan Deni boga bati tilu, Olivier (7), Esmee (4) jeung Morris (2),. Milu ka panganjrekanana, di apartemen Standhurst wewengkon Laan van Ouderzorg, Leiderdorp, kalereun Leiden. Sapopoe kang Deni damel di hiji supermarket Dirk. Apartemen nu dicicingan geus kapimilik kang Deni, cenah bari cicilinana can lunas. Hargana 200.000 euro (wayahna ulah dikurs ka rupiah nu rp 14.000) bisi reuwas! Rencana teh rek indekos di Koningstraat, Leiden. Kang Deni ngontak ka Akbar, mahasiswa S2 Universitas Leiden urang Sukamiskin. S1-nya ti UIN Jakarta. Imah eta teh cenah nu urang Indonesia, nu nikah ka urang Walanda. Aya kamer lima. Kabagean di lantey tilu, pangluhurna. Cikur & Leunca Di Amersfoort, deukeut Amsterdam, aya urut mahasiswa kuring urang Majalaya nu kawin jeung urang Walanda. Apal kuring rek ka Walanda, manehna pesen pangmawakeun cikur jeung leunca. Cenah rek dipelak di Walanda, sugan jadi. Bari gegelendeng, pesenan teh teu elit pisan, manehna malah maksa menta pangmawakeun. Nya menta ka anak mitoha pangmeulikeun cikur & leunca di pasar, wadahan terus selapkeun dina koper. Rada paur oge dipariksa di imigrasi Walanda. Lain nanaon, nerangkeun cikur & leunca dina basa Inggris kumaha. Rencana teh nya rek disebut we sayuran. Tapi alhamdulillah, di bagian pemeriksaan koper, cikur jeung leunca teu dicuriga nanaon, atuh salameut nepi ka nu pesen di Amersfoort Belanda. Jauh mela-melu! Poe Senen 2 November, datang ka kantor Prof Peter Nas nu ngabageakeun bari nyuguhan kopi (lain nyieun sorangan, meuli tina mesin kopi) jeung kueh. Bageur pisan londo teh, loba mere bongbolongan utamana sagala rupa nu perlu pikeun kuring neangan nu euweuh salila di Leiden. Pabeubeurang panggih jeung alumni tea di stasion Leiden. Nya cikur jeung leunca oge ijasah manehna nu disalin ka basa Inggris teh dibikeun. "Rek nyoba dipelak di tukangeun imah mitoha," cenah. ---- Dimuat Cupumanik no 78, Januari 2010.
