Baheula nu ngarana mayar pajeg salian ti mayar PBB aya oge nu disebut pancen, ilaharna pancen sok ditagih ku aparat desa, jugul atawa hansip, mayarna oge sok ku pare diitung numutkeun legana sawah atawa lahan. Salian ti eta aya oge pajeg radio jeung telepisi, diasrog ka unggal imah ku petugas pajeg nu harita mah sok disebut tukang pajeg. Mun ringkang ringkang aya jalma datang, make saragam sepe, ditopi jeung ngengelek kantong kulit, geus dipastikeun eta teh tukang pajeg. Mangkana mun aya jalma nu ciri cirina jiga kitu, radio keur disetel ge sok pes we dipaehan, nu tadina reang ku sora radio mun aya tukang pajeg datang, lir gaang katincak, jep we jempling. Aya kalana tukang pajeg sok nanyakeun ka unggal imah,rata rata sok ngajawab teu boga, boga ge cenah radio ruksak bari nembongkeun radio nu batu batrena geus dicoplokan heula, geus ngaliwat mah tukang pajegna, radio teh rareang deui atuh tukang pajeg teh bati dengdek we ceulina ngadedengekeun timana jebulna sora.Nu moal bisa dibohongan mah nu boga tipi, lantaran katingali anteneuna nyarengceling, tapi nyakitu sok pura pura ruksak. Heueuh eta mah gambaran jaman baheula, matak kitu ge meureun kasadarana masih kurang, duka mun ayeuna, da mun nu ngedul mayar pajeg sok disindiran kieu ku iklan "Apah kata Duniaaaaaa!"
Kiwari perkara pajeg keur haneut, lantaran aya oknum petugas pajeg cenah kongkalingkong jeung pat gulipat, nepikeun ka rekening pribadina oge berlipat, inisialna GT kitu cek beja. Gaungna bisa ngelehkeun kasus century malahan Jatiluhur leber ge nu ngabalukarkeun Karawang jeung sabudeureunan kabanjiran eleh sahengna ku kasus ieu. Komo kabejakeun yen GT kabur ka Singapur tambah saheng bae bejana. Mun lagu mah GT teh "Benci tapi Rindu" loba nu mika ceuceub lantaran kalakuanana, tapi loba oge nu miharep GT geura balik, meureun meh bisa ngahaleuang lagu "Katakan Sejujurnyah!" Balukar ti oknum petugas pajeg nu cenah korupsi,padahal salian tigajih oge dibere remunerasi, rahayat loba nu murukusunu malah dipesbuk mah aya nu ngajak boikot sagala. Kitu deui kuayana markus pajeg ieu, sabagian jalma loba nu suudon, teu kaop ningali jalan lalogak sok murukusunu pajarkeun paingan jalan loba nu ruksak da loba diselewengkeun.**SR**
