Basa keur nyaba ka leiden, panggih jeung babaturan kang Rachman (nu gaduh milis [email protected]) tea. Nya panggihna di imah kang Rachman di Wassenar. Ceu Tuti Coelen Atmawijaya. Urang Cikutra Bandung. Lalakon hirupna rame : beres kuliah ti biologi unpad, ceu tuti ngadongeng, "pan sayah mah hideung, jadi teu payu di bandung teh" cenah. Haha. terus ka bali jadi dosen di universitas udayana. Dua taun ti harita, ngalamar beasiswa australia pikeun sakola master, nya lulus terus, sakola di universitas australia. Tapi teu rengse. Sabab dosena, Robert Coelen, urang walanda nu ti lulus SMA, sakola ka australia nepi ka PhD widang virology (duka tah, naon eta, tanya Kumi) ngajak nikah. 12 taun di australi, boga budak dua, andrea (13) jeung cynthia (11), istri wungkul. Lalucu, maklum Indo. Di kampus australi eta, terusna Robert ngurus urusan internasional kampus. Jabatan eta diteruskeun di universitas leiden, vice president of international office. Nya ceu Tuti oge milu pindah ka walanda. nya di bumi kang Rachman harita pendak oge jeung Robert Coelen. Si kuring sok nyebut Meneer, tapi ceu Tuti nyaram, sebut we Robert cenah. Haha. rada kagok, sabab sacara adat sunda, umurna saluhureun jeung sacara akademik, senior (PhD). Ayeuna Meneer Robert pindah gawe ka universitas di Leuwarden, walanda kaler.
Ti harita mindeng diajak ka imahna di sisi Leiden, ceu tuti nyebutna pulau, sabab komplek imahna (lolobana dieusi ekspatriat) dilkurilingan ku kanal. Taun baruan 2010 jeung si Riva nu ngahaja datang di helsinki finland, di bumi ceu Tuti, maen petasan ngapung tea. Sasab heula da salah nempo peta dina Google map, haha. si horeng ceu Tuti teh resep nulis. Nya alesanana mah loba waktu luang. Ku sabab cenah di walanda mah teu meunang gawe, alatan urusan ijinna can aya (tuti boga passport australi, sedang Robert mah dwi-kewarganegaraan, australi-walanda), nya dina waktu luang beres ngurus rumah tangga teh nulis. Novelna nu dipedalkeun indie, kamari diloncing di YPK parapatan braga. Judulna kutunggu dirimu di yunani. Panitia atawa sohibul betna, PP-SS, paguyuban panglawungan sastra sunda. Kang godi suwarna di fb kungsi nanya, naha novel basa indonesia diloncing ku pp-ss, nya cek ceu Etti RS, pupuh PP-SS, salah sahiji alesan sabab nu nulisna asup ka S tungtung (sunda, urang sunda). Hehe. Ceu Tuti ngaku gempeur sabab teu biasa cenah, ongkoh da nulis novel oge ngan ukur ngeusi waktu luang. Ari carita nu ieu mah, ngalalakonkeun urang Subang, Amalia, Lia, nu meunang beasiswa sakola ka universitas Leiden terus meunang hadiah dina acara tv, piknik ka Kroasia, jst. Panggih jeung Pieter, bule londo duda anak dua, jst. Nya carita wanoja US nu nyaba di eropa kitu. Duka tah resensina make basa inggris ku Hawe Setiawan geus di upload atawa acan di sundanesecorner.org. blog eta ku hawe diniatan pikeun promosi budaya sunda ka jauhna. Jadi make english. Acara poe saptu 12 juni kamari kaitung lumayan. Malah Prof Saini KM-salah saurang inohong sastra US oge budayawan- oge kersa sumping. Kang Adang S, pangarang Sunda nu pangsiunan tangtara, ceu Aam Amalia, Tini Kartini -sababaraha pangarah senior, soni farid maulana, panyajak entragan acep zam-zam noor , jrrd. Nu ngabahas novel eta Hawe Setiawan jeung ceu Ninon, (Dr Safrina Noorman Soemadipraja, dosen english departement UPI). Isuk ceu tuti mulang ka walanda. Di bandung ngan tilu minggu. Waktuna beak keur reuni jeung babaturan cenah. Ngahaja teu mawa kulawarga, da ari mawa kulwarga teh teu pati bebas kaasup nginepna ge di hotel cenah. Ari sorangan mah bisa ngendong di bumi sepuhna. Barudakna geus nelpon cenah, "mom, I miss your cooking." Hehe. Wilujeng angkat ceu, kumpul deui jeung kulawarga di walanda.
